Bann Témoin Jéova la jamé gingn otan manjé spirituèl su léléktronik. Na in bonpe zandroi dan l’monn ousa nout bann frèr é seur i gingn pa achèt in labonman lintèrnèt. Dann désertin zandroi kouran i koup toultan, lintèrnèt lé tro lan oubien sinonsa na poin dutou lintèrnèt.

 Malgrésa lé posib astèr pou in bonpe nout bann frèr é seur télécharj bann publikasion su léléktronik mèm si zot la poin lintèrnèt ! Koman sa lé posib ?

 Gras la Box JW, in ti boit ke la donn bann zasanblé ousa lé difisil gingn lintèrnèt. Dan ti boit la, na in routeur ke la achté èk in lantrepriz, in lojisièl ke not sèrvis informatik la fé, bann publikasion su léléktronik é bann vidéo ke nou retrouv su jw.org. Chak ti boit i kout apepré 60 ero.

 Sé kan zot lé la sal du Roiyom, ke bann frèr é seur i pe utiliz zot tablèt ou zot téléfonn pou konèkt azot an ouifi avèk la Box JW, pou télécharj bann publikasion é bann vidéo. Mèm sak na laparèy lé finn vieu ou fay kalité i gingn konèkt azot. Mé koman la Box JW i donn bann dèrnié publikasion kan lasanblé la poin lintèrnèt ? Buro nasional i mèt su klé USB bann dèrnié publikasion ke nou trouv su jw.org é li anvoiy sa régulièrman bann zasanblé. É ansuit sak néna su bann klé i pe èt charjé dan la Box JW. Chak klé i kout apepré 3,50 ero.

 Koman la Box JW i èd nout bann frèr é seur ? Nathan Adruandra, in papa i viv dann péi Républik démokratik du Kongo, i ésplik : « Souvandéfoi ma la ésay télécharj bann fim “Ô Jéhovah, en toi j’ai placé ma confiance !” é “Souvenez-​vous de la femme de Lot”. Mé jamé ma la ganié, é sa té dékouraj amoin. Astèr, mi gingn télécharj bann vidéo su mon téléfonn é sa i èd amoin ansègn ankor mieu mon bann marmay. »

 In frèr ki èd bann zasanblé dann péi Nijéria pou instal la Box JW la di : « Pou bann frèr é seur, la Box JW lé vréman in kado d’Jéova. Astèr, zot lé vréman kontan télécharj plu fasilman bann publikasion é bann vidéo ke lé dann nout bann zouti pou ansénié. »

 La anvoiy plu de 1 700 ti boit bann zasanblé dan péi Lafrik, Loséani é Lamérik du Sud, é lé prévu anvoiy in bonpe ankor dot zasanblé. Koman i pèy tousala ? Gras bann zofrann pou laktivité mondial, ke lé fé souvan su donate.pr418.com. Mèrsi bokou pou tout sak zot i donn èk gran keur.