Pou premié foi, nout fami de frèr é seur partou dan le monn va regard le mèm program lasanblé réjional an mèm tan, an juiyé é out 2020. Pousa, té falé anrejis le program an vidéo, aprésa tradui ali an plu d’500 lang. Pou mèt an plas in projé komsa, é mèn ali jusko bout, an jénéral i fo 1 an ou plus. Mé kom lavé le pandémi koronavirus, bann tradukteur lasanblé réjional 2020 « Mont ke zot keur lé toultan kontan ! » lavé mèm pa 4 moi pou fini travay la.

 Pou fé se gran travay la, le sèrvis dèd pou bann tradukteur avèk le sèrvis ki okup bann zacha dan l’monn ke lé o sièj mondial bann Témoin Jéova, la donn zot koudmin. Le sèrvis dèd pou bann tradukteur la remarké k’in bonpe zékip traduksion lavé bezoin ankor plus matèryèl pou bien fé zot travay, surtou mikro bon kalité. Le sèrvis ki okup bann zacha dan l’monn la gingn achèt 1000 mikro é la fé liv sa dan prèske 200 zandroi in pe partou dan l’monn.

 Pou fé zékonomi la achté bann mikro an gro, la anvoiy tout in mèm landroi pou prépar bann koli é aprésa la anvoiy sa in pe partou dan l’monn. Gras se bann zacha an gro, an tou chak mikro èk le bann fré d’transpor la kout anviron 170 dolar amérikin (150 ero). Sa la pèrmèt fé in lékonomi de plu de 20 % su le pri chak mikro.

 Le sèrvis i okup bann zacha dans l’monn la du achèt se bann mikro é anvoiy sa an avril é an mé 2020 alor k’in bonpe zantrepriz té i tourn o ralanti akoz le pandémi. Malgrésa, fin moi d’mé la plupar bann zantèn traduksion, Bétèl é lé zot buro traduksion la gingn le matèryèl zot lavé bezoin.

 Jay Swinney, ke lé résponsab le sèrvis i okup bann zacha dan l’monn, la di : « Depui l’débu juska la fin se projé la, la u in bon lantant ant bann sèrvis Bétèl é le bann fourniseur an deor. Mèm si nou la fé zéfor nout tout ansanm pou projé la, sé rienk gras léspri sin Jéova ke nou la gingn ariv o bout osi vitman é pou pa tro chèr. »

 Nicholas Ahladis, ki travay dan le sèrvis dèd pou bann tradukteur, i ésplik : « Alor ke bann tradukteur té konfiné, zot té vréman kontan gingn se matèryèl la. Mèm si zot té pa avèk inn é lot, lékip la gingn tout sak i fo pou bien travay ansanm. Komsala, zot la gingn tradui é anrejis bann diskour, bann fim, bann chanson an plu de 500 lang. »

 Projé la — mé osi bokou dot ankor — la pèrmèt fé pas le program lasanblé réjional 2020 « Mont ke zot keur lé toultan kontan ! » a tout nout fami frèr é seur dan le monn. É si nou la gingn achté le matèryèl nou lavé bezoin sé gras bann don ke zot la fé èk gran keur, kisoi su le sit donate.pr418.com oubien dot fason ankor.