Kosa la Bib i di su bann famine k’i ariv dan lo monn jordi ?
Bann gran dirijan dann péi lo monn antié, té antrinn koz su inn an parmi lo bann pli grav problèm dan lo monn. Zot té vé pu ké domoun su la tèr i soufèr akoz zot na poin manjé. a Zot la di : « Alon finir èk la famine. » Mé èské in jour nou va gingn fé sa ? Kosa la Bib i di ladsi ?
La Bib lavé di a lavans ké noré bann famine dan lo monn jordi
La Bib lavé di a lavans ké noré bann famine nout lépok, li apèl sa « bann dèrnié jour » (2 Timoté 3:1). Lé pa Bondié lotèr bann famine-la, mé li lavé prèvni anou ké bann zafèr komsa té sa arivé (Jak 1:13). Ala dé profési la Bib k’i koz ladsi.
« Nora bann famine […] dan in landroi apré lot » (Matié 24:7). Profési-la i amont bien ké noré bann famine dan in ta péi. Na poin tro lontan bann gran siantifik b la ékri : « Lo monn lé antrinn pèrd lèr, i gingn pa anlèv la famine, ni trouv in solusion pou ké tout domoun i gingn achèt bon manjé pou rès an bone santé, parské soi lé tro chèr, soi na poin dutou ». Dan in ta péi, omoin san milion domoun i gingn ni achté, ni trouv lo manjé zot la bézoin. Akoz sa, lé tris, néna in bonpé i mor.
« É agard ! moin la vu, in choval noir, è sak té su son do navé in balans dan son min » (Révélasion 6:5). Dann profési-la, lo choval é sak té su son do, i roprézant la famine pandan bann dèrnié jour. c Sak lé su lo do choval-la, néna in balans dan la min pou pèz bann rasion manjé. Pandan k’li lé antrinn galopé, néna inn voi k’i di, lo manjé va vnir plizanpli chèr, é li konsèy domoun pa gaspiyé (Révélasion 6:6). Sé sa mèm k’i èspas jordi, kan nou oi koman, partou dan lo monn, domoun i manj pa kom k’i fo. Néna bann miliar domoun, i gingn pa achèt bon manjé, parské soi na poin, soi lé tro chèr.
Koman i sa fini èk la famine
Bann lèspèsialis i di, nou néna manjé plis k’i fo pou tout domoun su la tèr. Bin alor, akoz néna la famine ? Dapré la Bib, koman Jéova d, sak la fé anou, va trouv in solusion pou sa ?
Lo problèm : Si néna la famine sé akoz la mizèr, é bann diférans ant bann pov é bann rich, é bann gouvèrnman i gingn pa trouv in solusion pou tousala.
La solusion : Lo roiyom Bondié ké lé parfé va ranplas bann gouvèrnman su la tèr ké lé pa parfé dutou (Danièl 2:44 ; Matié 6:10). Jordi néna in ta domoun mizèr i gingn pa trouv manjé kom k’i fo, mé kan roiyom Bondié va dirij la tèr, tousala va chanjé. Dayèr kan la Bib i koz su Jézu, lo Roi lo roiyom Bondié, li di : « Li va sov domoun mizèr k’i kri o sokour, é osi lo pti maléré é sak na poin pèrsone pou èd ali. […] Nora lo grin an kantité dési la tèr ; anlèr bann montagn, nora an kantité » (Psom 72:12, 16).
Lo problèm : Akoz bann gèr, néna bann gro déga é bann tan la kriz, akoz sa mèm, i gingn pa done manjé tout domoun.
La solusion : «[Jéova i ] fé arèt bann gèr su tout la tèr. Li kas lark é li briz la lans ; li détrui bann chario la gèr dann fé » (Psom 46:9). Bondié va détrui bann zarm la gèr é tout sak lé résponsab bann gèr-la. Komsa, tout domoun va gingn trouv zot manjé fasilman é san gingn kap kap. La Bib i fé promès-la : « Bann jus va fléri é nora in bonpé la pé juskatank la lune va disparèt » (Psom 72:7).
Lo problèm : Akoz lo tan i chanj vitman, i mèt la vi domoun an danjé, é la natur i dégrèn bann bitasion é bann zanimo.
La solusion : Bondié va kontrol la natur pou ké tout bann plant i pous san problèm. La Bib i di : «[Jéova i] fé arèt lo siklone ; é [li fé ké] bann lam la mèr i arèt fé dézord. […] Li fé ké lo dézèr i dovien in létan èk in bonpé pié jon i pous anndan. Tèr-la, li fé rès sak lo vant lé vid […]. Banna i fane lo grin dann bitasion é i plant bann pié rézin é tousa i done an poundiak » (Psom 107:29, 35-37).
Lo problèm : Domoun mové é rapiang, i fabrik manjé lé pa bon pou la santé, oubien zot i aranj azot pou ké lo manjé, i ariv pa juska sak néna gran bézoin.
La solusion : Lo roiyom Bondié va fé disparèt tout domoun malonèt é mové (Psom 37:10, 11; Izai 61:8). La Bib i di ké Jéova lé «[Sak] i rand justis pou domoun krazé, é [Sak] i done dopin pou domoun lo vant lé vid » (Psom 146:7).
Lo problèm : Tou lé zan, dan lo monn, plis in tièr manjé soi lé gaté, soi lé gaspiyé.
La solusion : Kan roiyom Bondié va dirij la tèr, nora pu tousa gaspiyaj-la. Kan li té su la tèr, Jézu té fé atansion pa gaspi manjé. Par égzanp, in jour li la done manjé plis 5 000 moun. Aprésa li la di son bann disip : « Alé ramas bann morso k’i rès, komsa na poin gaspiyaj » (Jan 6:5-13).
Lo roiyom Bondié va fé disparèt tout bann problèm k’i amèn la famine. Sé pousa domoun sra tro kontan aoir in bon kalité manjé an poundiak (Izai 25:6). Pou konèt plis su sak lo roiyom Bondié i sa fé, agard lartik « Kansa le roiyom Bondieu va komans dirij la tèr ? »
a Agenda 2030 de développement durable, ké tout bann pèi dann Nasion Zuni la mèt an plas an 2015.
b L’État de la sécurité alimentaire et de la nutrition dans le monde 2022, ké lo Fonds des Nations Unies pour l’enfance, le Fonds international de développement agricole, l’Organisation des Nations Unies pour l’alimentation et l’agriculture, l’Organisation mondiale de la santé et le Programme alimentaire mondial des Nations Unies, la fé ansanm.
c Pou konèt plis, su lé kat choval dann liv Révélasion é sak lé su zot do, agard lartik « Les cavaliers de l’Apocalypse : qui sont-ils ? ».
d Jéova sé lo non Bondié (Psom 83:18). Agard lartik « Kisa i lé Jéova ? »
Agard sa osi…
BANN KÉSTION LA BIB I RÉPONN
Kosa i lé lo sign k’i amont ké nou viv bann « dèrnié jour », ou « lépok la fin » ?
Nou pé konèt kosa i lé bann dèrnié jour gras sak la Bib i di.
ESSENTIAL BIBLE TEACHINGS
Kosa i lé le Roiyom Bondieu ?
Kan li lété su la tèr, Jézu té i koz surtou su le Roiyom Bondieu. Depui tré lontan, son bann disip i pri pou ke se Roiyom i ariv.
