KONTINIÉ VÉYÉ !
Bann siantifik la avans lo zégui lo révèy la fin lo monn : Kosa la Bib i di ladsu ?
Lo 24 Janvié 2023, bann siantifik la avans lo zégui lo révèy la fin lo monn a pli pré koté minui. Pou zot kan lo zégui va ariv su minui sra la fin lo monn.
« “Lo révèy la fin lo monn” i roprézant tout bann sakouyaj su la tèr. Mardi, bann siantifik la avans lo zégui révèy la pli pré koté minui akoz tout kalité malizé ké i èspas koméla mèm, kom la gèr Lukrèn, bann ménas la bonb nukléèr é bann chanboulman lo tan » (AFP International Text Wire).
« Mardi, bann siantifik la di i rès rienk 90 sogonn pou lo zégui “lo révèy la fin lo monn” ariv su minui, jamé domoun su la tèr té pli pré armagédon » (ABC News).
« In group siantifik i sort dann tout péi la di ké jamé avansa la vi domoun su la tèr té ménasé kom koméla » (The Guardian).
Èské la fin lo monn i tard pa pou arivé é la tèr va disparèt ? Èské i fo nou gingn kapkap pou sak i sa arivé plis dovan ? Kosa la Bib i di ?
Sak nora dan lavnir
Dapré la Bib, « la tèr i rès pou toultan » é nora domoun ké « va viv dési pou toultan » (Éklézias 1:4; Psom 37:29). Donk nora toultan la vi dési la tèr é domoun i gingnra pa détrui nout planèt.
Mé la Bib i di bien nora in fin. Par égzanp li di « lo monn lapou disparèt » (1 Jan 2:17).
Pou konèt kosa la Bib i di su la fin lo monn, lir lo sujé « La fin du monde est-elle proche ? Qu’est-ce que l’apocalypse ? ».
Pou konèt kosa la Bib i di su sak i sa arivé dan pa lontan, lir lo sujé « Quand la fin du monde viendra-t-elle ? ».
Kas pa la tèt
La Bib i èd anou gard in bon moral mèm si néna in ta problèm su la tèr. Koman li fé sa ?
La Bib i done anou bann konsèy pratik (2 Timoté 3:16, 17). Par égzanp, pou konèt koman la Bib i pé èd aou gard in bon moral malgré bann malizé ou pas dédan, lir lo sujé « Comment ne pas se laisser submerger par l’inquiétude ».
Lèspoir la Bib i done pou lavnir lé fiab (Romin 15:4). Li èsplik anou bien kosa i èspas koméla é kosa i sa arivé dan pa lontan, komsa nou kas pa la tèt, nou tienbo nou larg pa malgré tout bann zafèr i èspas su la tèr.
Pou ké zot i gingn profit plis sak néna dan la Bib, nou invit azot èk gran kèr aksèp in létud gratuit dépi koméla mèm.
a « Lo révèy la fin lo monn sé in linvansion pou prévien domoun ké i tard pa nou sa détrui tout sak néna su la tèr avèk tout kalité zarm danjéré ké nou mèm la fé. [Révèy la lé pa in vré révèy], li lé in zimaj pou rapèl anou tout bann sakouyaj su la tèr ké nou doi afronté si nou vé rès vivan su nout planèt » (Bulletin of the Atomic Scientists).