An 2022, larjan bann gouvèrnman la dépansé pou bann zafèr militèr, surtou par rapor la gèr néna ant la Rusi èk Lukrèn, la mont juska 2,24 miliar dolar amérikin. Néna in buro laba dan la vil Stokolm dann péi la Suèd, k’i analiz bann dépans bann péi i fé pou achèt bann zarm. An 2023, li la sort in rapor dési sak la èspasé dan lané 2022, ala sak li di :

•   Larjan bann péi Lérop la dépansé pou bann zafèr militèr, « la ogmant plis 13 % an 2022. Dépi la guerre froide, jamé nou la vu in logmantasion komsa pou bann péi Lérop. »

•   « Pou la Rusi […] son bann dépans la ogmant apépré 9,2 %, sa i fé d’li lo troizièm péi k’i dépans plis larjan pou larmé dési la tèr. »

•   Bann Zéta Zuni, banna mèm i mèt lo plis larjan pou larmé dan lo monn. Dan tout sak lé dépansé dési la tèr dann domèn militèr, « 39 % sé bann Zéta Zuni. »

 Ala sak lèspésialis Nan Tian, in moun la done la min pou fé rapor la i di : « Nou oi néna bonpé larjan i tourn pou fé march lo marché bann zarm pou la gèr, é bann péi i kontinié dépans ankor plis k’avan. Sa i fé mont anou, ké lo monn nou viv anndan, na pu la sékurité. »

 La Bib lavé di noré bann ralé pousé é bann gèr ant bann gran gouvèrnman jordi, é li done anou lo sèl lèspoir pou la pé.

•   La Bib i di ké lépok nou viv anndan sé lo « tan la fin » (Danièl 8:19).

•   Lo liv Danièl lavé di a lavans, ké dann tan la fin, noré kom in konpétision pou lo pouvoir dési la tèr. So bann gouvèrnman noré lans azot dan in « lafrontman », pou la dominasion. Konpétision ant bann péi la, i pous banna dépans in ta larjan (Danièl 11:40, 42, 43).

 Pou konèt plis dési profési la, rogard lo vidéo Une prophétie qui s’accomplit : Daniel chapitre 11.

•   La Bib i done lasirans ké Bondié va anlèv tout gouvèrnman bann zom la mèt an plas. Li « va mèt an plas in roiyom k’i sra jamé détrui. É roiyom la, sra pa sou la dominasion okin pèp. Li va ékraz tout bann roiyom la é va détrui azot, é li tousèl va dur pou toultan » (Danièl 2:44).

•   Jéova a nout Bondié i tard pa va fé sak bann domoun dési la tèr i gingn pa fé : mèt la pé pou toultan. Koman ? Son roiyom dann sièl, va anlèv tout bann zarm, é va fini pou d’bon èk la violans (Psom 46:8, 9).

 Pou aprann plis dési sak lo Roiyom Bondié va fé, li lartik «Sous le royaume de Dieu, « la paix abondera ».’”