Nou pans néna apépré sink miliar domoun i sa rogard la koup du monn ant lo 20 novanm juska lo 18 désanm 2022. Bonpé i pans ké bann konpétision komsa, i pèrmèt fé avans bann gran projé, é pa sèlman aoir in bon lanbians dann stad.

•    Nelson Mandela, in lansien prézidan Lafrik du sud la di : « Lèspor néna lo pouvoir chanj lo monn. Li done linspirasion. Li néna lo pouvoir mèt lunité ant bann nasion, pouvoir ké na poin bonpé néna ».

•    Gianni Infantino, prézidan la FIFA a la di : « Football [..] i uni anou dan lèspoir, dan la joi, dan la pasion, dan lamour, é dan nout diférans ».

 Èské la koup du monn, oubien dot zévènman èsportif, i pé vréman niabou amèn so bann gayar zafèr nou viend lir jus anlèr ? Èské néna in lèspoir pou la pé é lunité ?

 Sèt ané, la koup du monn lété plis k’in sinp konpétision pou joué balon. Lorganizasion tournoi la, la fé lèv bann sobatkoz dési problèm sosial, mayé èk la politik, kom par égzanp, bann droi d’lom, bann zistoir rasis ant domoun, é bann diférans dann domèn lékonomi.

 Malgré sa, néna bonpé i pans ké bann gran lévènman èsportif su la tèr, kom la koup du monn, lé in gayar lamuzman. Mé franch vérité, mèm si néna détroi i kroi for mèm zot lidé, bann konpétision komsa i pé pa mèt in vré lunité, k’i dur pou toultan. An vré, tousala i fé mont souvan bann konportman é bann manièr d’fé k’i diviz, é dapré la Bib, bann zafèr la i konfirm bien nou viv dann pèryod « bann dèrnié jour » (2 Timoté 3:1-5).

 Dan la Bib, nou trouv in vré lèspoir pou lunité su la tèr. Li promèt anou ké tout domoun su la tèr sra uni, é sra dirijé par in gouvèrnman dann sièl k’i apèl « lo Roiyom Bondié » (Luk 4:43 ; Matié 6:10).

 Lo Roi Roiyom la, Jézu Kris, va fé an sort ké nora la pé su tout la tèr. La Bib i di :

•    « Bann jus va fléri, é nora bonpé la pé » (Psom 72:7).

•    « Parské li va sov lo moun pov lapou kri o sokour [..] Li va sov banna kont loprésion é kont la violans » (Psom 72:12, 14).

 Dépi koméla mèm, tout lamontraj Jézu la doné i rasanm bann milion domoun dan lunité, é sa dann 239 péi. Zot la aprann rojèt la èn. Pou konèt plis ladsi, ou pé lir lo séri lartik néna kom tèm « Briser le cercle de la haine ».