Problèm dolo partou dési la tèr : kosa la Bib i di ladsi ?
Nou tout nou la bézoin dolo prop pou viv. António Guterres sékrétèr jénéral l’ONU la rapèl : « Ké nou koné déja in gro problèm dolo alor ké partou dési la tèr, i arèt pa domand ankor plis dolo. » Lé difisil pou bann miliar domoun trouv dolo ké lé prop.
Strdel/AFP via Getty Images
Èské in jour nora dolo pou tout domoun, oubien èské va règ problèm-la ? Kosa la Bib i di ladsi ?
Kosa la Bib i di su lo mank dolo ?
La Bib i di ké tout domoun nora dolo. Li di osi ké nora dolo dous an poundiak dési la tèr.
« Dolo va aparèt dann dézèr, é bann rivièr dan la plèn sèk. La tèr ké lé sèk va d’ni in létan kouvèr èk bann jon, é nora in takon sours dolo ousa la tèr lé sèk » (Izai 35:6, 7).
Akoz nou pé kroir promès-la ? Alon gard ansanm sak la Bib i di, su in fason ké la tèr lé fé.
Kosa la Bib i di dési la tèr é lo roulman dolo ?
Bondié la pa kré la tèr dann vid, mé li la fé sa pou ké domoun i abit dési (Izai 45:18).
Bondié la fé la tèr pou mèt la vi dési, li la fé la natur in fason pou k’i gingn done dolo prop an kantité.
« [Bondié i] fé mont lao bann gout dolo ; la vapèr i transform an gout la pli ; aprésa bann nuaj i fé tonb la pli ; bann gro pli i tonb su tout domoun » (Job 36:27, 28).
Bann vèrsé-la i èsplik in fason sinp, kosa Bondié la mét an plas dan la natur pou ké dolo i dovien prop é i ranpli ali par li mèm. Dolo i sort la tèr é la mèr, aprésa li mont anlèr, li vien an nuaj, aprésa li ardésand an pli. Sé par sa mèm, domoun é bann zanimo néna dolo dous toultan (Éklézias 1:7 ; Amos 5:8).
« Kan va ariv lo moman k’i fo mi va done azot gro grin la pli, komsa va gingn rékol in bonpé dési la tèr, é bann pièdboi ké lé dann karo bitasion sra charjé èk frui » (Lévitik 26:4).
Bondié i koné ké pou fé pous bann rékol, i fo néna asé la pli é sa o bon moman. Dann tan bann Zisraélit, kom banna té bann plantèr, Bondié lavé promèt azot ké li té sar done azot asé dolo pou gingn in ta rékol.
I tard pa, sak Bondié la fé pou bann Zisraélit, li va fé pou tout la tèr (Izai 30:23). An atandan, problèm dolo, plizanpli i agrav partou dési la tèr, é sé pa rienk parské na poin la pli. Kosa la Bib i propoz kom solusion pou bann problèm dolo néna jordi ?
Nora pu problèm dolo
Lo roiyom Bondié dann sièl va dirij la tèr (Danièl 2:44 ; Révélasion 11:15). La Bib i di ké Bondié va anlèv tout bann problèm ké néna partou dési la tèr, par égzanp, problèm dolo (Matié 6:9, 10). An plis ké sa, roiyom-la va fé d’zafèr ké domoun jordi lé pa kapab fé.
Problèm : Lo gro problèm dolo lé osi akoz lo chanjman klima : li fé mont lo nivo la mèr, kan la pli i tonb in bonpé dolo i mont, é an plis néna bann gro problèm sésrès.
Solusion : Lo roiyom Bondié va rofé la natur, pou ké la tèr i arvien bien. Ala sak Bondié la promèt : « Agard ! Moin lé antrinn fé tout bann zafèr nèv » (Révélasion 21:5). Mèm dan bann zandroi ousa la vi lé dur, la tèr lé sék, nora in bonpé dolo é in bonpé la vi (Izai 41:17-20). Roiyom Bondié va métriz la natur osi.
Kan Jézu té dési la tèr, li la kalm in gro koudvan (Mark 4:39, 41). Par sak li la fé, li la mont in bout lo pouvoir ké Bondié la done ali. Kan Jézu Kris va ansèrv lo Roiyom Bondié pou dirij la tèr, domoun va viv an pé é an sékurité. Zot nora pu pèr bann katastrof la natur é osi sak i pé ariv azot.
Problèm : Dolo sou la tèr, dann rivièr, dan létan, anndan-la néna dolo dous, mé akoz bann gran lantropriz ké lé rapiang é osi akoz domoun i réfléchi pa sak zot i fé, sa i rand dolo sal. Sak domoun-la i fé, i agrav lo problèm dolo.
Solusion : Bann rivièr, bann létan, la mèr é la tèr, Bondié va mét sa pur é prop. La tèr va d’ni in paradi. Kom in fonnkèr, la Bib i di: « Lo dézèr é lo péi ké lé sèk nora in gran kontantman. La plèn ké lé an dézèr va konèt la joi é va fléri parèy safran » (Izai 35:1).
Kosa va ariv sak i fé pa in kont èk lé zot é la natur ? Bondié la promèt ké li va « détrui sak lé antrinn détrui la tèr » (Révélasion 11:18, ti not; Provèrb 2:21, 22).
Problèm : Kom i jèr mal dolo, bann rézèrv dolo dous i bès vitman é zot na poin lo tan roranpli.
Solusion : Sé la volonté Bondié ké va fé su la tèr, é pa la volonté domoun k’i pans rienk zot mèm (Matié 6:9, 10). Dapré Izai 11:9 « la tèr i sra ranpli èk la konésans Jéova a ». Avèk in gayar lamontraj komsala é lo gran lamour ké nou néna pou Bondié é pou tout sak li la fé, domoun va pran bien soin nout joli tèr é osi tout sak li la done anou. Sa lé posib parské lo roiyom Bondié va amont anou lo méyèr fason d’fé pou jèr tousala.
Pou konèt plis su sak lo roiyom Bondié va fé, lir lartik « Kosa le roiyom Bondieu va fé ? » .
Lir lo chapit 35 lo liv Izai dan la Bib pou konèt koman la tèr i sra dann paradi.
Pou konèt plis su sak Bondié va fé pou la tèr é pou domoun, agard lo vidéo Poukosa Bondieu la kré la tèr ?
a Jéova sé lo non Bondié (Psom 83:18). Agard lartik « Kisa i lé Jéova ? »
Agard sa osi…
BANN KÉSTION LA BIB I RÉPONN
Kosa la Bib i di si i ariv ke la natur i sakaj tout zafèr ?
Èske tousala lé in punision Bondieu ? Èske Bondieu i èd sak la subi bann déga la natur ?
ESSENTIAL BIBLE TEACHINGS
Kosa i lé le Roiyom Bondieu ?
Kan li lété su la tèr, Jézu té i koz surtou su le Roiyom Bondieu. Depui tré lontan, son bann disip i pri pou ke se Roiyom i ariv.
