Lo fason d’viv végane : Kosa la Bib i di ladsi ?
Partou dési la tèr, néna in bonpé domoun k’i intérès azot pou lo fason d’viv végane.
« Èt végane sé in fason pansé é in fason d’viv ousa domoun i fé tout sak lé posib pou pa maltrèt é utiliz bann zanimo, kisoi pou manjé, abiyé ou pou dot zafèr ankor. » (The Vegan Society)
Détroi moun i dévien végane pa rienk parské zot i sousi azot pou bann zanimo mé osi parské zot i sousi azot la natur, zot santé oubien lé par rapor zot rolijion.
« Èt végane lé pa jus in fason manjé, domoun i oi sa surtou kom in kroiyans, in désizion ké lé bon, é in moiyen pou chakèn, rand lo monn méyèr. » (Britannica Academic)
Èské èt végane sé la solusion pou bann problèm dési la tèr ? Kosa la Bib i di ladsi ?
Koman nout Kréatèr i oi bann zom èk bann zanimo
La Bib i amont ké Jéova a, nout Kréatèr, la mèt bann zom odsi bann zanimo é li la done banna lotorité su zot (Jénèz 1:27, 28). É osi, Bondié la pèrmèt ké bann zom i manj bann zanimo (Jénèz 9:3). Parkont, li lé pa dakor kan i maltrèt bann zanimo (Provèrb 12:10).
Avèk sak la Bib i di, chakèn i désid par li mèm si li manj la viand ou pa. b Lé pa nout désizion ladsi ké va fé oir anou an mié dovan Bondié (1 Korintien 8:8). É na poin pèrsone i doi kritik nout choi su sak nou désid manjé (Romin 14:3).
La solusion pou in méyèr lavnir
La Bib i di pa ké sé nout manièr d’viv ké va règ tout bann problèm dan lo monn. Sé akoz la politik, bann sèrvis sosial é lékonomi ké néna in ta problèm dan lo monn é na poin pèrsone i gingn fé in zafèr pou sa. La Bib i di :
« I gingn pa mèt droit sak lé tort » (Éklézias 1:15).
Nout Kréatèr va tir bann malizé ké nou koné jordi. La Bib i ansèrv bann zimaj pou èsplik sak nou va konèt.
« É moin la vu in nouvo sièl èk in nouvo tèr ; parské lansien sièl èk lansien tèr la disparèt, é na pu la mèr. » (Révélasion 21:1).
Bondié va ranplas bann gouvèrnman bann zom, sétadir « lansien sièl », par « in nouvo sièl », son Roiyom dann sièl. Roiyom-la va tir « lansien tèr », sétadir bann méchan, é va ranplas par « in nouvo tèr », sétadir sak i vé viv sou son dominans.
Sou lo dominans lo Roiyom Bondié domoun va aprann viv an pé èk bann zanimo é rèspèk la natur (Izai 11:6-9).
a Jéova lé lo non Bondié (Psom 83:18).
b La Bib i domand anou « rofuz [...] lo san » (Akt 15:28, 29). Sa i vé dir ké nou doi pa manj tout kalité manjé néna lo san dédan, ni boir lo san, ni manj la viand ké lé pa sègné.
Agard sa osi…
ESSENTIAL BIBLE TEACHINGS
Poukosa Bondieu la kréé la Tèr ?
Not tèr lé vréman in joli zafèr. Ant la Tèr é le solèy néna égzakteman la distans ki fo, li lé panché kom ki fo é li tourn otour solèy égzakteman la vitès ki fo. Poukosa Bondieu la mèt tout son keur pou fé la tèr ?
