Lapot Pol la ékri sa : « Kan mi vé fé sak lé jus, néna sak lé mové an moin » (Romin 7:21). Èské ou la fine rosan lo mèm zafèr ké li ? Si oui, lartik-la, i pé èd aou pou tienbo, dovan lanvi fé in mové zafèr.

•  Sak i fo konèt

•  Sak ou pé fé

•  Kosa banna i pans

 Souvandéfoi, nou lé tanté pou fé mové zafèr akoz linfluans lé zot. Sé pousa la Bib i di ké « Bann mové frékantasion i gat bann bon zabitud » (1 Korintien 15:33). Out lantouraj é osi tout sak ou antand dann radio, télé, lintèrnèt, i pé influans aou é fé lèv bann mové lanvi an ou. Tousala i pé done aou lanvi fé mové zafèr é pous aou pou « suiv la foul pou fé lo mal » (Égzod 23:2).

 « Kom nou vé èt èmé é kom nou vé fé parti in group, sa i pé pous aou fé parèy lé zot, rienk pou ké banna i aksèp aou » (Jeremy).

 Kosa ou pans ? Si lo plis inportan pou ou, sé sak lé zot i pans dé ou, akoz i sra plis dir tienbo dovan in tantasion ? (Provèrb 29:25).

 Sak i fo nou rotien : Larg jamé out bann prinsip akoz la présion lé zot i mèt dési ou.

 I fo ou lé sur out bann kroiyans. Si ou lé pa sur ké out bann kroiyans lé vré, ou sra kom inn ti poupèt dan zot min, é banna va fé la boul sanm ou. Vodré mié suiv lo konsèy ké la Bib i done : « Rogard par zot mèm tout bann zafèr ; tienbo larg pa sak lé bien bon » (1 Tésalonisien 5:21). Si ou konpran mié out bann kroiyans, sra ankor plis fasil pou pa chanj lopinion, é ou sra moin tanté pou fé in nafèr kontrèr out bann kroiyans.

 Kosa ou pans ? Èské ou koné poukosa bann prinsip Bondié dési lo bien é lo mal lé pou out bien ?

 « Ma la romarké, chak foi mi rès fidèl mon bann kroiyans é ké mi tonb pa dan in tantasion, lé zot i rèspèk amoin plis » (Kimberly).

 In légzanp dan la Bib : Danièl. Kan li té ankor pétèt in jènjan, ‘Danièl té bien désidé’ obéi bann loi Bondié (Danièl 1:8).

 I fo ou koné out bann poin fèb. La Bib i koz dési bann « zanvi la jénès », sé bann lanvi ké lé vréman for kan nou lé jèn (2 Timoté 2:22). Sa i pé èt bann zanvi sèksuèl, mé osi, lanvi èt aksèpté par lé zot oubien lanvi vol par zot prop zèl, alor ké zot lé pa ankor paré pou ansort azot tousèl.

 Kosa ou pans ? La Bib i di ké « chakèn lé tèsté kan li lès ali antréné é piéjé par son prop lanvi » (Jak 1:14). É aou, kèl zafèr i fé aou plis anvi é k’i tant aou pou fé ?

 « I fo ou lé onèt avèk ou mèm, su sak i pouré tant aou lo plis. Fé bann rochèrch pou konèt koman tienbo ansanm, ékri bann zidé ké ou va gingn utilizé. Komsa, prochin kou, kan ou sra dovan lo tantasion, ou va konèt koman ténir ansanm » (Sylvia).

 In légzanp dan la Bib : David. Parfoi li la lès ali influansé par son lantouraj oubien par son bann prop zanvi. Mé David la tir loson dési son bann zérèr é li la fé zéfor pou chanjé. Li la domand Jéova : « Done amoin in kèr pur é chanj tout mon fason pansé, pou ké li rès droit » (Psom 51:10).

 Pran lo bon désizion. La Bib i di : « Lès pa lo mal gingn la viktoir dési ou » (Romin 12:21). Na poin rien i oblij aou tonb dann tantasion. Ou pé choizi fé sak lé bien.

 Kosa ou pans ? Kosa ou pé fé, pou èt sur ké ou pran lo bon désizion kan ou lé tanté pou fé in mové zafèr ?

 « Mi majine koman mi va santi amoin apré, si mi té lès amoin tanté. Èské mi va santi amoin mié ? Pétèt oui, su lo kou. Mé kosa va doné avèk lo tan, é pli tar ? Mi va santi amoin pir ké avan. Èské i vo vréman lo kou ? Non ! » (Sophia).

 In légzanp dan la Bib : Pol. Mèm si li la admèt, li navé bann mové koté, li la désid konbat sa. « Mi done mon kor lo kou é mi trèt ali kom in lèsklav » (1 Korintien 9:27).

 Sak i fo nou rotien : Sé ou k’i kontrol tout, sé ou k’i désid koman ou va réaji dovan in tantasion.

 Rapèl aou ké bann tantasion lé pou in tan. Melissa, 20 an i di : « Kan mi té o lisé, lavé in ta zafèr té tant amoin, mé jordi tousa i di pu moin rien. Sa i soulaj amoin : sa i vé dir ké mèm si néna bonpé zafèr i tant amoin an so moman, domin mi sra pu tanté par sa, é in jour kan mi va ropans tousa, mi va di amoin ké ma la bien fé tienbo ansanm »