Dapré le dèrnié liv la Bib, 666 lé le nonm, ou le non, le bébèt sovaj ke na 7 tèt èk 10 korn é ki sort dan la mer (Révélasion [ou Lapokalips] 13:1, 17, 18). Se bébèt la i reprézant tout bann gouvèrnman su la tèr é ke i dominn su « tout nasion, é tribu, é lang, é peup » (Révélasion 13:7). Le non « 666 » i mont ke pou Bondieu, tout se bann gouvèrnman la pa marché. Poukosa nou pe di sa ?

  Li lé pa rienk in non. Tout bann non ke Bondieu i donn i ve dir in nafèr. Par égzanp, Bondieu la donn Abram (non ke i ve dir « Papa ke lé o [an lèr] ») le non Abraham (nom ke i ve dir « Papa in bonpe demoun [in tralé] »). Li la chanj son non kan la promèt a li de fèr d’li le « papa d’in bonpe nasion » (Jenèz 17:5, ti not). Lé parèy, le non « 666 », ke Bondieu la donn le bébèt, i korèsponn bien a sak li reprézant.

  Le chif 6 i reprézant sak lé pa parfé. Dan la Bib, souvandéfoi bann chif lé sinbolik. Le chif 7, par égzanp, i représant sak lé konplé ou parfé. Pou Bondieu, le chif 6 (sétadir 7 moin 1) i pe èt kèkchoz ke lé pa fini ou ke néna in défo ou i pe èt osi son bann zènmi (1 Kronik 20:6 ; Danièl 3:1).

  3 foi pou rann lidé plu for. Défoi la Bib i répèt 3 foi in lidé pou rann a li plu for (Révélasion 4:8 ; 8:13). Le non « 666 » i mont bien mèm ke pou Bondieu, bann gouvèrnman la, la pa march dutou. Bana té pa kapab mèt la pé èk la sékurité pou toultan. Seulman roiyom Bondieu va gingn fé sa.

Le mark le bébèt

 La Bib i di koma ke demoun i gingn « le mark le bébèt sovaj » parske zot i « admir » ali, i suiv ali é i sava juska ador ali (Révélasion 13:3, 4 ; 16:2). Lé vré, sa i pe resanm in ladorasion kan bana i donn loneur a zot péi, a zot bann zanblèm ou a zot larmé. Nou pe lir dan l’Encyclopédie de la religion (angl.) : « Demoun ki ador zot péi sa lé devnu kom inn anparmi bann plu gran relijion dan le monn jordi a. »

 Kan in moun i gingn le mark le bébèt su son min droit ou su son fron, kosa sa i ve dir ? (Révélasion 13:16). Kan li té pou koz su bann komanman ke li lavé donn le nasion Israèl, Bondieu la di : « Sa i doi èt amaré kom in sign su zot min é kom in mark su zot fron » (Detéronom 11:18, Bible du Semeur). Sa i té ve pa dir ke bann Zisraélit té doi ékri sa su zot min ou su zot fron, mé zot té doi pluto lès le bann parol Bondieu gid azot dan tout sak zot té i fé é tout sak zot té i pans. Lé parèy, le mark le bébèt lé pa in mark ki mèt su le kor, kom le tatoij le nonm 666. Se mark la, lé plus in sinbol ki permèt anou rekonèt tout sak i lès le sistèm la politik dirij zot vi. Sak néna le mark le bébèt, zot i drès azot kont Bondieu (Révélasion 14:9, 10 ; 19:19-21).