Koman donn in lédukasion séksuèl nout bann zanfan ?
Sak la Bib i di
Kisa i devré donn in lédukasion séksuèl bann marmay ? La Bib la donn se rol la bann paran. Bonpe paran la trouvé ke bann konsèy la lé util pou zot :
Pa bezoin zot lé jéné. La Bib lé fran kan i koz su le konportman séksuèl é bann parti séksuèl. An plus ke sa, dann tan avan, Bondieu té i voulé ke bann ti marmay dann le peup Israèl, lété ansénié lad’su (Detéronom 31:12 ; Lévitik 15:2, 16-19). Ansèrv bann mo réspéktueu, pou pa lès antann ke le konportman séksuèl é bann parti séksuèl, lé bann zafèr ke lé malprop.
Parl de sa tibout par tibout. Olèrk atann ke li rant dan ladolésans, pou di tout su la séksualité ansanm out marmay, tipe tipe donn ali bann détay, dapré sak li pe konprann (1 Korintien 13:11).
Ansègn zot marmay su sak lé bon é sak lé mové. Défoi i ariv, ke lékol i donn bann kour su lédukasion séksuèl. Parkont, la Bib i ankouraj bann paran, a pa koz rienk su koman bann parti séksuèl lé fé. I fo osi ke zot i ansègn bann marmay, le bon fason pansé, é le konportman ki fo avoir, su la séksualité (Provèrb 5:1-23).
Ékout out marmay. Si zot zanfan i poz azot bann késtion su la séksualité, pa bezoin afol azot, é fé pa bann fim dan zot tèt non plu. I fo ke zot lé « toultan paré pou ékouté, pran le tan pou kozé » (Jak 1:19).
Koman protèj zot zanfan kont bann moun ki ve abuz de zot séksuèlamn
Aprann out zanfan ajir kom ki fo si li lé agrésé.
Inform azot. Ransègn azot su le taktik ke bann zagréseur séksuèl néna labitud utilizé (Provèrb 18:15 ; gard le chapit 32 le liv Les jeunes s’interrogent. Réponses pratiques [volume 1]).
Fé vréman in kont avèk kosa i éspas dan la vi out marmay. Lès pa zot zanfan avèk in moun, san konèt si se moun la lé fiab, é fé atansion ke zot zanfan i retrouv pa li touseul « pou fé sak li ve » (Provèrb 29:15, Segond 21).
Èd zot zanfan avoir in fason pansé rézonab su lobéisans. Bann zanfan i doi aprann obéi zot paran (Kolosien 3:20). Seulman, kan zot i ansègn zot zanfan ki fo toultan obéi a ninport kisa kom adult, i sra plu fasil pou in moun abuz su li séksuèlman. Bann paran krétien i pouré di zot zanfan : « Si in moun i di aou fé in nafèr ke Bondieu i ièm pa, fé pa li » (Akt 5:29).
Fé bann zégzèrsis pratik. Ansègn zot marmay sak li doi fé, si in moun i ésèy profit su li kan zot lé pa la. Mèt an plas bann situasion, pou aprann zot zanfan gingn kouraj di : « Arèt ! Mi sar di tout ! » é kour vitman. I fodra petèt répèt pluzieur foi le mèm zafèr, parske in marmay i oubli fasilman (Detéronom 6:7).
