Non, nout tèr i sra jamé détrui, ni brulé èk dofé, ni ranplasé par in not. La Bib i amont anou ké kan Bondié la fé la tèr sété pou ké domoun i viv dési pou toultan.

•   « Sak i obèi Bondié nora la tèr pou zot, é zot va viv dési pou toultan » (Psom 37:29).

•   « [Bondié] la mèt an plas la tèr su son bann fondasion ; jamé va tir ali tèrla (Psom 104:5).

•   « La tèr i rès pou toultan » (Éklézias 1:4).

•   « Sak la form la tèr, é la bien mèt ali an plas, [...] la pa fé ali pou rien, mé [...] la fé ali pou k’i abit dési » (Izai 45:18).

 Jéova i lèsra pa domoun détrui la tèr pou d’bon, kisoi èk la polusion, la gèr oubien dot zafèr. Olèr k’sa, li va « détrui sak lé antrinn détrui la tèr » (Révélasion 11:18). Koman li va fé sa ?

 Bondié va pran in roiyom parfé dann sièl, pou ranplas bann gouvèrnman koméla, ké la pa gingn protèj la tèr (Danièl 2:44 ; Matié 6:9,10). Sé Jézu Kris lo Garson Bondié va dirij gouvèrnman la (Izai 9:6,7). Kan li té su la tèr, Jézu la ansèrv son pouvoir fé mirak pou komand la natur (Mark 4:35-41). Kom li lé lo roi dann Roiyom Bondié, li sra kapab kontrol tout la tèr èk la natur. Pou règ bann problèm la natur, li va fé rovni la tèr kom lété dann jardin Lédèn (Matié 19:28 ; Luk 23:43).

 Non, la Bib i di pa sa. Fo lidé la, sé akoz in mové fason konpran 2 Pièr 3:7, k’i di : « Lo sièl èk la tèr koméla lé rézèrvé pou dofé. » Alon oir dé lidé inportan pou bien konpran bann mo la :

1.   Nadfoi la Bib i ansèrv bann mo« sièl », « tèr » é « dofé » dan in not sans. Par égzanp, nou lir dann Psom 97:1 : « ké la tèr lé kontan. » Isi lo mo « tèr » i vé dir bann domoun i viv su la tèr.

2.   Sak lé ékri avan è apré 2 Pièr 3:7 i èd anou konpran kosa i lé lo sièl, la tèr è dofé dann vèrsé la. Bann vèrsé 5 é 6 i rapèl anou sak la èspasé lépok Noé. Lo Déluj la détrui lo monn dann tan la ; malgré sa nout planèt lé ankor la mèm. Olèr k’sa lo Déluj la détrui bann domoun mové lépok la, sétadir la « tèr » (Jénèz 6:11). Li la détrui osi lo « sièl », sétadir sak té dirij so monn la. An vré, sak lété détrui sé bann mové moun, mé pa nout planèt. Noé èk son famiy la rès an vi kan monn la la disparèt, é zot la kontinié viv su la tèr apré lo Déluj (Jénèz 8:15-18).

 « Dofé » dann 2 Pièr 3:7 sétadir la dèstruksion, va fé disparèt lo monn mové, mé pa la tèr, parèy kom la èspasé avèk dolo lo Déluj. Bondié la promèt « in nouvo sièl é in nouvo tèr è ladan nora la justis » (2 Pièr 3:13). In « nouvo tèr », sétadir in nouvo pèp, i sra dirijé par in « nouvo sièl », sétadir in nouvo gouvèrnman, k’i sra lo Roiyom Bondié. Kan Roiyom la va dominé, la tèr va vnir in paradi ousa nora rienk la pé (Révélasion 21:1-4).