Bann Témoin Jéova i fé zéfor pou suiv bann lamontraj Jézu la doné, parèy kom son bann zapot la fé. Lartik la i amont diféran kroiyans inportan ké bann Témoin Jéova néna.

1.   Bondié. Nou ador lo sèl vré Bondié ké lé toupuisan, lo Kréatèr, é li apèl Jéova (Psom 83:18 ; Révélasion 4:11). Li lé lo Bondié Abraam, Moiz é sak Jézu osi (Égzod 3:6 ; 32:11 ; Jan 20:17).

2.   La Bib. Nou kroi ké la Bib lé la parol ké Bondié la fé ékri pou tout bann domoun (Jan 17:17 ; 2 Timoté 3:16). Nout bann kroiyans lé bazé su bann 66 liv, ké néna dan la Bib, kisoi dési « Lansien Tèstaman » ou lo « Nouvo Tèstaman ». Jason BeDuhn, in profésèr la rolijion la bien èsplik sa, kan li la ékri ké bann Témoin Jéova i baz « zot kroiyans é zot fason ador Bondié [su] sak lé vréman ékri dan la Bib, san chanj rien dédan é san désid a lavans sak zot i èmré trouvé anndan la a ».

    Malgré nou aksèp tout sak lé ékri dan la Bib an antié, nou fé pa parti lo mouvman fondamantalis. Nou rokoné ké désèrtin parti la Bib lété ékri dan in langaj sinbolik, sétadir in langaj ousa nou la bézoin dot zèsplikasion pou konpran é k’i fo pa pran azot promié dégré, mé oir kosa néna dèrièr (Révélasion 1:1).

3.   Jézu. Nou suiv bann lamontraj é légzanp Jézu Kris é nou done ali lonèr parské li la sov anou é li lé lo Garson Bondié (Matié 20:28 ; Akt 5:31). Donk nou lé bann krétien (Akt 11:26). Mé, dan nout létud la Bib nou la aprann ké Jézu Kris lé pa lo Bondié Toupuisan é ké na okin landroi dan la Bib i koz dési la kroiyans la Trinité (Jan 14:28).

4.   Lo roiyom Bondié. Sé in vré gouvèrnman dann sièl, mé sa lé pa in zafèr ké lé dann kèr bann krétien. Li va ranplas bann gouvèrnman bann zumin dési la tèr é li va réaliz lo projé Bondié pou la tèr (Danièl 2:44 ; Matié 6:9, 10). Li sa pa tardé pou fé sa, parské bann profési la Bib i amont ké nou viv « bann dèrnié jour » (2 Timoté 3:1-5; Matié 24:3-14).

    Jézu lé Roi lo roiyom Bondié dann sièl. É li la komans gouvèrné an1914 (Révélasion 11:15).

5.   La délivrans. Nou pé èt sové dé nout péché èk la mor gras lo sakrifis Jézu, ké la done son vi kom in ranson. (Matié 20:28 ; Akt 4:12). Pou èt sové, bann domoun i doi pa sèlman fé mont zot foi an Jézu, mé zot i doi chanj zot fason d’viv é fé batiz azot (Matié 28:19, 20 ; Jan 3:16 ; Akt 3:19, 20). In moun i mont ké li néna vréman la foi par son bann zaksion. (Jak 2:24, 26). Mé la délivrans lé pa in zafèr ké nou gingn komsa ; nou gingn ali par « la favèr Bondié i fé èk gran kèr » (Galat 2:16, 21).

6.   Lo sièl. Bondié Jéova, Jézu Kris èk bann zanj fidèl i abit dann sièl b (Psom 103:19-21 ; Akt 7:55). Na rienk inn ti group domoun, 144 000 o total, ké va roviv pou rès dann sièl é pou gouvèrn koté Jézu dann Roiyom Bondié (Danièl 7:27; 2 Timoté 2:12; Révélasion 5:9, 10; 14:1, 3).

7.   La tèr. Bondié la fé la tèr pou ké bann domoun i rès dési pou toultan (Psom 104:5 ; 115:16 ; Éklézias 1:4). Bondié va done bann domoun k’i ékout ali in gayar santé é la vi pou toultan dési la tèr dann paradi (Psom 37:11, 34).

8.   Lo mal èk bann soufrans. Tousala la komansé kan in lanj la drès ali kont Bondié (Jan 8:44). Dépi li la drès ali kont Bondié, i apèl lanj la « Satan » è osi « Diab », parské li la mont la tèt Adan é Èv pou ké banna i suiv ali. É sa la antrèn bann gran malèr pou bann désandan Adan é Èv (Jénèz 3:1-6 ; Romin 5:12). Pou répond bann kèstion dési lo bien é lo mal ké Satan la fé lévé, Bondié i pèrmèt lo mal èk bann soufrans, mé li va pa tolèr sa toultan.

9.   La mor. Kan bann moun i mor zot i arèt viv. (Psom 146:4 ; Éklézias 9:5, 10). Zot i souf pa dann in lanfèr dofé.

    Bondié va fé roviv bann moun par miliar gras la rézurèksion (Akt 24:15). Mé, pou sak i voudra pa konèt é aplik bann lamontraj Bondié, kan zot va arlévé, zot va èt détrui pou toultan, san okin lèspoir pou roviv (Révélasion 20:14, 15).

10.   La famiy. Nou rèspèk sak Bondié la mèt an plas dési lo mariaj dann promié débu : li la uni in sèl bonom èk in sèl madam, é lo sèl rézon biblik pou divorsé, sé kan inn la komèt in péché sèksuèl (Matié 19:4-9). Nou lé sur ké bann prinsip la Bib plin la sajès i èd bann famiy viv éré (Éfézien 5:⁠22–6:1).

11.   Nout ladorasion. Nou mèt pa a jonou dovan la kroi é nou ador okin lèstatu ni okin zimaj k’i roprézant la vièrj ou in not zafèr (Détéronom 4:15-19; 1 Jan 5:21). Ala détroi zafèr inportan k’i fé parti nout ladorasion :

    •   Nou pri Bondié (Filipien 4:6).

    •   Nou lir é nou étudié la Bib (Psom 1:1-3).

    •   Nou pran lo tan réfléchi su sak nou aprann dan la Bib (Psom 77:12).

    •   Nou rotrouv anou ansanm pou prié, étudié la Bib, chant kantik, nou fé mont nout foi par nout bann komantèr la Sal é nou ankouraj nout bann frèr é sèr é osi tout sak i asis rénion èk nou (Kolosien 3:16; Ébré 10:23-25).

    •   Nou prèch « gayar nouvèl Roiyom la » (Matié 24:14).

    •   Nou èd sak la bézoin (Jak 2:14-17).

    •   Nou konstrui é nou antrotien nout bann landroi ousa nou fé nout ladorasion (k’i apèl Sal lo Roiyom) é osi dot batiman ké nou ansèrv pou nout bann zaktivité lamontraj la Bib dési tout la tèr (Psom 127:1).

    •   Nou done kou d’min pou sak la viv in katastrof.(Akt 11:27-30).

12.   Nout lorganizasion. Partou dési la tèr néna bonpé lasanblé, é dan chak lasanblé néna in group zansien ké lé la pou gid anou. Bann zansien lé pa bann prèt é zot lé pa péyé pou sak zot i fé (Matié 10:8; 23:8). Nou domand pa domoun la dim é i fé jamé la kèt dan nout bann rénion (2 Korintien 9:7). Larjan ké nou ansèrv pou nout bann zaktivité lé bazé rienk su bann zofrand volontèr é pèrsone i koné kisa la doné.

     Lo Kolèj santral, sé inn ti group krétien ké néna lèspèrians, k’i travay dann buro mondial, é zot i gid bann Témoin Jéova partou dési la tèr (Matié 24:45).

13.   Nou lé uni. Partou dési la tèr, nou lé uni ansanm dan lo mèm kroiyans (1 Korintien 1:10). Nou fé bann gro zéfor pou ké an parmi nou na poin divizion ant chak ras, ant chak kiltir ou ant domoun pa mèm nivo sosial (Akt 10:34, 35; Jak 2:4). Mèm si nou lé uni dan nout bann kroiyans, nou pran nout prop désizion. Chak Témoin Jéova i fé son bann choi é pousa li baz ali su son prop konsians gidé par la Bib (Romin 14:1-4; Ébré 5:14).

14.   Nout fason konport anou. Dan tout nout bann zaktivité, nou fé zéfor pou mont lamour pou lé zot san atand rien an rotour (Jan 13:34, 35). Nou rojèt tout sak Bondié i èm pa, par égzanp, ansèrv lo san in mové fason kom bann transfuzion lo san (Akt 15:28, 29; Galat 5:19-21). Nou èm la pé, é nou may pa dan bann gèr (Matié 5:9; Izai 2:4). Nou rèspèk bann gouvèrnman dan lo péi ousa nou viv, é nou obéi bann loi, tan ké sa lé pa kont bann loi Bondié (Matié 22:21; Akt 5:29).

15.   Nout rolasion èk lé zot. Jézu la done komandman la : « Ou doi èm out prochin kom ou mèm. » Li la di osi ké bann krétien « i fé pa parti lo monn » (Matié 22:39; Jan 17:16). Donk nou ésèy « fé sak lé bien anvèr toulmonn », é an mèm tan nou may pa nou dutou dan la politik é nou vé pa dutou amay anou avèk dot rolijion (Galat 6:10; 2 Korintien 6:14). Mé nou rèspèk bann choi ké lé zot moun i fé dan bann zafèr la (Romin 14:12).

 Si zot néna dot kèstion dési bann kroiyans bann Témoin Jéova, zot i pé gingn dot zinformasion dési nout sit lintèrnèt. Zot i pé osi pran kontak avèk in buro nasional, alé in rénion pa loin zot kaz oubien sa koz avèk in Témoin Jéova ousa zot i abit.