Sak domoun i di : Bann Témoin Jéova i kroi pa ké bann doktèr lé kapab èd azot é zot i fé pa soign azot.

 An vré : Nou rod lo méyèr fason posib pou soign anou é nout bann marmay osi. Kan nou néna in problèm santé, nou sa oir bann doktèr ké lé an kapasité soign anou é opèr anou san ansèrv lo san. Nou rokoné é nou aprési osi ké néna bann gran progré dann domèn médikal. Dayèr, bann trètman san transfuzion lo san, ké lé fé pou soign bann Témoin Jéova, jordi toulmoun i gingn profit sa osi. Astèr, dan in bonpé péi, pou fé in soign ali, in moun i pé choizi pa mèt lo san pou évit aoir problèm, parské sa i pé amèn bann maladi, i pé aji dési lo sistèm imunitèr é osi parské in moun i pé komèt in lérèr.

 Sak domoun i di : Bann Témoin Jéova i kroi ké la foi i aport azot la gérizon.

 An vré : Nou fé pa bann mirak pou géri domoun.

 Sak domoun i di : I kout vréman chèr fé soign anou san transfuzion.

 An vré : Kan nou soign anou san mèt lo san, sa i diminué bann dépans médikal a.

 Sak domoun i di : Néna bonpé Témoin Jéova é zot zanfan, i mor chak lané parské zot i vé pa mèt lo san.

 An vré : Sa lé pa vré ditou. Souvan bann chirurjien i fé bann lopérasion vréman lour (lopérasion lo kèr, lopérasion lo zo èk zartikulasion, lopérasion pou grèf bann zorgane...) é sa, san ansèrv lo san b. Sak i fé soign azot é zot bann marmay osi, kan zot i mèt pa lo san, dabitud zot i rotrouv asé vit la santé, é mèm zot i romèt azot pli vit, ké sak la mèt lo san c. An tou ka, pèrsone i pé di vréman k’in moun malad va mor si li mèt pa lo san, oubien si li va viv si li mèt lo san.

 Si nou mèt pa lo san sé akoz nout bann kroiyans, é lé pa lié avèk bann zafèr médikal. Lansien é lo nouvo tèstaman i done anou lord pa mèt lo san (Jénèz 9:4 ; Lévitik 17:10 ; Détéronom 12:23 ; Akt 15:28, 29). An plis ké sa, pou Bondié, lo san i roprézant la vi (Lévitik 17:14). Donk, nou obéi Bondié é nou rèspèk ali, parské li la kré bann domoun, sé pousa nou pran pa ditou lo san.

 Lavé in lépok, bann tèknik pou soign san transfuz lo san — té apèl sa, soign domoun san mèt lo san — dann domèn la santé, banna té oi sa kom bann tèknik tro danjéré, i di mèm ké lété kom in suisid. Mé dépi détroi zané, bann fason pansé i chanj Par égzanp, an 2004, nou té lir dan in lartik ékri dan in liv pou la formasion médikal : « La dévlop plin tèknik pou soign bann Témoin Jéova ké néna in problèm santé, va ansèrv bann tèknik-la dan bann zané i ariv d. » An 2010, in lartik dan lo ti liv Heart, Lung and Circulation té i di : « Bann “lopérasion san transfuzion” i dévré pa èt rézèrvé rienk pou bann Témoin Jéova. Bann lopérasion san transfuzion i doi èt an parmi bann moyen utilizé tou lé jour pou opèr domoun »

 Dan lo monn, jordi bann doktèr par milié i ansèrv bann tèknik pou rézèrv in koté lo san lo moun, pou fé bann gro lopérasion san transfuzion. Bann fason komsa pou opèr domoun san transfuzion, lé utilizé dan bann péi ké la pou dévlopé é in bonpé domoun malad ké lé pa Témoin Jéova i vé ansèrv osi tèknik-la