Bann Témoin Jéova i fèt pa bann zanivèrsèr la, parské zot i kroi ké Bondié i èm pa bann fèt komsala. La Bib i di pa i fo pa fèt bann lanivèrsèr la, mé li èd anou réfléchi su désèrtin zégzanp é konpran kosa Bondié i pans la dési. Alon oir kosa la Bib i di èk kat poin.

1.   Bann zanivèrsèr nésans néna bann zorijine payen. In liv i èsplik ousa i sort bann fèt la : néna té kroi, ké lo jour lanivèrsèr in moun, « bann zèspri é bann démon té pé fé ali lo mal » mé ké « si son bann kamarad té la, é ké té souèt ali lo bonèr, sa té protèj ali » (Funk & Wagnalls Standard Dictionary of Folklore, Mythology, and Legend). Lo liv Coutumes et usages des anniversaires an anglé i di ké, dann tan lantikité, fé bann rojis nésans lété « inportan pou gingn fé loroskop » gras la « sians mistik lastroloji ». Lé ékri osi « lo kroiyans an lien èk bann bouji lanivèrsèr néna lo pouvoir majik réaliz bann soué ».

    Mé dapré la Bib, nou doi pa pratik la maji, alé oir dévinèr, fé bann pratik démoniak ni « dot zafèr komsala » (Détéronom 18:14; Galat 5:19-21). An plis ké sa, si Bondié la détrui la vil Babilone, lé parské sak té abit la ba té pratik lastroloji, ké lé an lien èk bann dévinèr (Izai 47:11-15). Bann Témoin Jéova i rod pa chakinstan ousa i sort bann koutum. Mé kan la Bib i done bann zèsplikasion ké lé bien klèr, zot i ékout ali.

2.   Bann promié krétien té fèt pa bann zanivèrsèr nésans. Dapré in lansiklopédi, pou bann promié krétien, « fèt in lanivèrsèr nésans té in koutum payen » (The World Book Encyclopedia). La Bib i mont ké tout bann krétien i doi suiv légzanp sak bann zapot é bann disip Jézu té fé (2 Tésalonisien 3:6).

3.   Lo sèl fèt obligatoir pou bann krétien lé pa in nésans, mé sé sélèb la mor Jézu (Luk 22:17-20). I étone pa nou parské la Bib i di « vo mié lo jour la mor olèrk lo jour la nésans » (Éklézias 7:1). Dan son bann dèrnié jour su la tèr, Jézu lavé in joli réputasion dovan Bondié. Donk lo jour son mor té vréman pli inportan ké lo jour son nésans (Ébré 1:4).

4.   Dan la Bib la poin in sèrvitèr Bondié la fèt son lanivèrsèr nésans. La pa oublié. An vré, la Bib i koz su dé fèt lanivèrsèr bann domoun ké té sèrv pa Bondié. Mé dan bann lanivèrsèr la, la èspas in zafèr d’mové (Jénèz 40:20-22; Mark 6:21-29).

 Kom tout paran i èm zot marmay, bann Témoin i fé bann kado, i organiz bann ti fèt ant kamarad é dot zafèr pou zot zanfan. Zot i fé léfor suiv légzanp parfé Bondié, k’i done bon zafèr son bann zanfan (Matié 7:11). Bann zanfan Témoin Jéova i san pa zot privé. Ala kosa détroi i di :

•   « Lé pli valab gingn i kado kan nou atand pa » (Tammy, 12 zan).

•   « Mèm si mi gingn pa kado lo jour mon lanivèrsèr, mi èm bien lo surpriz mon bann paran i fé amoin kan zot i achèt sa in not jour » (Gregory, 11 zan).

•   « Ou kroi ké dis minut, détroi bonbon èk in chanson, sé in fèt ? Si ou vien la kaz ou va oir sé koué in vré fèt ! » (Eric, 6 zan).