Peršo Korinťanenge 11:1-34
11 Avka sar me kerav oda, so o Kristus, ta tumen keren oda, so kerav me.
2 Phralale pheňale, paš savoreste, so keren, na bisteren pre oda, so tumenge phenďom a so tumen sikhľarďom. Vaš oda tumenge kamav te phenel, hoj oda, so keren, keren igen lačhes.
3 Aľe kamav, kaj te džanen, hoj dojekh murš andro zboros, mušinel te šunel* le Kristus. E romňi mušinel te šunel peskere romes a o Kristus le Devles.
4 Sako murš, savo pes modľinel abo vakerel le Devleskere lava a thovel peske vareso pro šero, kerel ladž oleske, ko les ľidžal.
5 A dojekh džuvľi, savi pes modľinel abo vakerel le Devleskere lava, aľe na thovel o khosno* pro šero, kerel ladž oleske, ko la ľidžal. Bo te bi la na uľahas o khosno pro šero, oda bi elas koda isto sar te bi la na enas ňisave bala pro šero.
6 Te peske e džuvľi na thovel o khosno pro šero, ta mi strihinel peske o bala. Aľe te hiňi predal late ladž, hoj bi la na enas ňisave bala pro šero abo ča igen charnore, ta mi thovel khosno pro šero.
7 O murš peske na majinel te thovel ňič pro šero, bo o Del les kerďa avka, kaj te el ajso sar ov. A kaleha ašarel le Devles. Aľe e romňi mi kerel avka, kaj kaleha te ašarel peskere romes.
8 Sem o murš na sas kerdo la džuvľatar, aľe e džuvľi sas kerďi le muršestar.
9 Na o murš sas kerdo predal e džuvľi, aľe e džuvľi sas kerďi predal o murš.
10 Vaš oda peske e romňi mušinel te thovel o khosno pro šero, kaj kaleha te sikavel, hoj na oj hiňi odi, so ľidžal, aľe lakero rom. A tiš kaj ada te dikhen o aňjela.
11 Andro zboros maškar o Rajeskere učeňika kampel sodujen, the le muršen the le džuvľijen.
12 Bo avka sar sas kerďi e džuvľi le muršestar avka the o murš hino la džuvľatar. Aľe the avka hino sa le Devlestar.
13 Tumen korkore phenen: Hin oda lačhes, te pes e džuvľi modľinel ko Del a na thovel peske o khosno pro šero?
14 Nane oda avka, hoj te hin le muršes bare bala, ta peske kaleha kerel ča ladž?
15 Aľe te hin la džuvľa bare bala, hin oda pre lakero šukariben? Bo o bala sas lake dine, kaj te na bisterel, kas majinel te šunel.*
16 Te peske vareko mišľinel, hoj oda pes avka na majinel te kerel, ta mi džanel, hoj amen a the andro zbori, save patrinen le Devleske, amen kalestar ľikeras.
17 Phenav tumenge, so majinen te kerel, aľe našťi tumen poašarav. Bo oda, hoj tumen avka zdžan pre tumare zhromažďeňa, anel sigeder vareso nalačho sar o lačho.
18 A džanen soske? Avrendar šunav, hoj sar tumen jekhetane zdžan andro zboros, ta tumen maškar tumende keren. A so tumenge phenava, paťav oleske.
19 Sem maškar tumende isto avena the ajse, save kamena te sikhľarel ča peskero,* kaj pes te sikavel, kaha čačes hino o Del.
20 Te tumen jekhetane zdžan, kaj te chan ole marestar a kaj te pijen ola moľatar* pro Rajeskero leperiben, ta oda na keren avka sar kampel.
21 Bo sigeder sar chuden te chal pre ada leperiben, chan chaben, savo tumenge anďan a paľis hino vareko bokhalo a vareko mato.
22 Nane tumen khera, kaj odoj te chan a te pijen? Abo tumenge o zboros, savo patrinel le Devleske, nane dos lačho a kamen te kerel ladž olendar, save hine čore? So tumenge pre ada phenava? Vaš kada tumen ašarava? Isto, hoj na.
23 Phenďom tumenge oda, so sikhľiľom le Rajestar. Odi rat, savi majinďa te el o Raj o Ježiš zraďimen, iľa o maro
24 a sar paľikerďa le Devleske, phagerďa les a phenďa: „Ada hino sar te bi miro ťelos, savo hino dino vaš tumenge. Keren ada pre miro leperiben.“
25 Avka istones pal o chaben kerďa the le pohariha a phenďa: „Kada poharis sikavel pre nevi zmluva, savi ela platno, sar ela čhido avri miro rat vaš tumenge. Furt sar pijena adi mol, keren oda pre miro leperiben.“
26 Furt sar chan kale marestar a pijen andal ada poharis, vakeren pal o Rajeskero meriben, medik* ov na avela.
27 Vaš oda sako, ko bi chaľahas kale marestar abo piľahas andal ada poharis, savo hino le Rajeskero a te leske oda na patrinel, kerďahas baro binos proťi Rajeskero ťelos the proťi leskero rat.
28 O manuš peršo mušinel lačhes te rozmišľinel, so les hin andro jilo, kaj peske te el isto, či šaj chal ole marestar a či šaj pijel ola moľatar.
29 Bo ko chal a pijel, aľe na achaľol mište oleske, hoj oda sikavel pro Rajeskero ťelos, ta korkoro pre peste anel le Devleskeri choľi.
30 Vaš oda hin maškar tumende ajci džene slaba, nasvale a but tumendar hine sar te bi mule.*
31 Te bi pal ada buter rozmišľinďamas, ta bi amen o Del vaš kada na sudzinďahas.
32 Aľe te imar sam sudzimen, ta o Jehovas* amen del goďi, kaj te na doperas avka sar ada svetos.
33 Vaš oda phralale mire, te tumen jekhetane zdžan, kaj te chan ada chaben, mangav tumen, užaren jekh pre avreste, kaj te chan jekhetane.
34 Te hino vareko bokhalo, ta mi chal khere. Bo te ada kerela, ta pes na ačhela, hoj sar tumen jekhetane džana, hoj bi tumen o Del vaš varesoske sudzinďahas. Mek hin man vareso pro jilo, aľe pal oda mek tumenca povakerava, sar avava.
Poznamki tele čijarkica
^ Doslovňe: hino leske šero.
^ Abo dikhloro.
^ Abo kaj imar te na thovel ňič pro šero.
^ Abo pes kerena sekti.
^ Abo ole vinostar.
^ Abo pokim.
^ Na mišľinel pes kaj čačes slaba, nasvale, mule, aľe hoj duchovňe sas pre oda avka.
^ Dikh o dodatkos A5.
