Peršo Korinťanenge 14:1-40
14 Dureder tumenge presikaven o kamiben. Aľe jilestar tiš keren buťi pre ada, kaj tumen o Del prekal peskero svato duchos te del dari. Nekbuter oda daros, kaj te vakeren le Devleskere lava.
2 Oda, kas hin oda daros, hoj džanel te vakerel aver čhibenca, oda na vakerel le manušenge, aľe le Devleske. Bo choč* o svato duchos les ľidžal, kaj te vakerel oda, so o Del beršenca delas te džanel,* ta ňiko oleske na achaľol.
3 Aľe ko vakerel le Devleskere lava, ov ole lavenca avren del zor, podhazdel a kerel, kaj lenge te el mištes pro jilo.
4 Ko vakerel aver čhibenca, zoraľarel ča pes, aľe ko vakerel le Devleskere lava, zoraľarel calo zboros.
5 Kamľomas, kaj tumen savore te vakerďanas aver čhibenca. Aľe mek bareder radišagos man uľahas, te bi tumen savore vakerenas le Devleskere lava. Bo oda, ko vakerel le Devleskere lava, anel bareder chasna sar koda, ko vakerel aver čhibenca. Bo kaj ov te zoraľarel o zboros, ta bi lenge oda mušinelas te prethovel.
6 Phralale, sem so bi tumen elas olestar, te bi ke tumende avľomas a vakerďomas ajse čhibenca, savenge na achaľon? Te tumenge kamav varesar te pomožinel, mušinav tumenge te phenel oda, so džanav, varesavo proroctvos abo sikhľariben, abo vareso, so mange diňa te džanel o Del.
7 Hin oda ajso isto sar le nastrojenca, pre save pes bašavel, sar hiňi e flauta abo e harfa. Te vareko na džanel mište te bašavel pre flauta abo pre harfa, ňiko na džanela, savi giľi bašavel.
8 Te o slugadžis na bašavel mištes pre trubka, ta ko džanela, hoj maj kampel te džal andro mariben?
9 Avka isto the tumen. Te tumen vakerena avka, hoj tumenge ňiko na achaľola, ta sar o manuša džanena, so phenďan? Akor vakerena jevavalom.*
10 Andro svetos pes vakerel but čhibenca a dojekhake pes del te achaľol.
11 Aľe te vareko vakerel ajsa čhibaha, savake me na achaľuvav, ta dikhava pre leste, hoj ov asi nane adarig a ov dikhela avka pre mande, hoj asi me na som adarig.
12 Avka oda hin the tumenca. Te avka igen kamen, kaj tumen o Del prekal peskero svato duchos te del o dari, ta nekbuter kamen te presikavel ola dari, savenca zoraľarena o zboros.
13 Vaš oda koda, ko vakerel aver čhibenca, mi mangel le Devles vaš koda, kaj te džanel te prethovel oda, so phenďa.
14 Te man modľinav ajsa čhibaha, savake na achaľuvav, na som oda me, ko vakerel ola lava, aľe oda daros, savo man diňa o Del prekal peskero svato duchos. Vaš oda na achaľuvav oleske, so vakerav.
15 So akor oleha? Modľinava man kale daroha, savo man diňa o Del prekal peskero svato duchos. A tiš man modľinava vaš kada, kaj oda, so vakerav, kaj oleske the achaľuvav. Sar giľavava, giľavava the ole daroha, savo man diňa o Del prekal peskero svato duchos. Aľe tiš giľavava avka, kaj te achaľuvav oleske, so giľavav.
16 Te tut modľines ko Del, bo ov tut diňa oda daros prekal peskero svato duchos, hoj vakeres avra čhibaha, ta sar šaj phenel o manuš pro agor amen, te na achaľol, vaš soske tu paľikeres le Devleske?
17 The te šukares paľikerďal le Devleske, aľe ole manušes oda ňisar na podhazdela.
18 Me vakerav buter čhibenca sar tumen savore a paľikerav vaš kada le Devleske.
19 Aľe the avka andro zboros feder phenďomas ča pandž lava kajsa čhibaha, savake sako achaľola, kaj len kaleha te sikhľarav sar 10 000 kajse lava kajsa čhibaha, savake ňiko na achaľola.
20 Phralale, ma rozmišľinen sar cikne čhavore. Sar cikne čhave aven ča akor, sar džal pal o nalačhipen. Rozmišľinen sar ola, saven hin goďi.*
21 Andro Mojžišoskero zakonos hin: „‚Kerava, kaj o manuša, so vakeren aver čhibenca a so bešen andre aver phuv te vakeren mire lava. Aľe the avka man na kamena te šunel,‘ phenel o Jehovas.“*
22 Te hin varekas oda daros, hoj džanel te vakerel aver čhibenca, ta oda nane predal ola, so paťan andro Raj, aľe predal ola, so na paťan. Aľe te vareko vakerel le Devleskere lava, ta oda nane predal ola, so na paťan andro Raj, aľe predal ola, so paťan.
23 Sar pes tumen zdžana sar calo zboros a dojekh tumendar chudela te vakerel avra čhibaha a akor andre avela vareko, ko nane igen avrisikado abo vareko, ko na paťal andro Raj, či na phenena ola manuša, hoj tumen avľan pre diliňi goďi?
24 Aľe te tumen savore vakerena le Devleskere lava a avela andre vareko, ko na paťal andro Raj abo nane igen avrisikado, ta oda, so odoj šunela, les šaj prekerel ko feder a tiš kaj pal peste te rozmišľinel buter.
25 Avka pes sikavela, so les hin andro jilo. Ov perela pro khoča,* ašarela le Devles a phenela: „Čačes hino o Del tumenca!“
26 Phralale, so kalestar avel avri? Sar tumen zdžan, ta jekh giľavel o žalmi, dujto sikhľarel, aver vakerel oda, so leske o Del diňa te džanel, aver vakerel aver čhibenca a aver prethovkerel oda, so phenďa, kaj sako te achaľol. Savoro pes mi kerel, kaj pes te zoraľarel o zboros.
27 Te vareko vakerel aver čhibenca, ta mi vakeren dujdžene, nekbuter trin. A oda jekh pal aver. A aver mi prethovkerel oda, so phende, kaj aver te achaľon.
28 Aľe te andro zboros nane vareko, ko bi prethovkerelas, mi en čit a mi vakeren ča predal peste a predal o Del.
29 Ola, so vakeren le Devleskere lava, mi vakeren dujdžene abo trin. Aver len mi šunen, kaj te achaľon, so oda znameňinel.
30 Aľe te varekaske olendar, so hine odoj, o Del dela te džanel, so majinel te phenel, ta koda, so vakerel, mi el čit.
31 Bo savore šaj vakeren le Devleskere lava, aľe jekh pal aver, kaj tumen savore vareso te sikhľon a avka tumen te podhazden.
32 A ola, so vakeren le Devleskere lava, pes mušinen te džanel te zľikerel, sar džal pal oda daros, so len diňa o Del prekal peskero svato duchos.
33 Sem o Del kamel, kaj andre savoreste te el šoros* a mi el o smirom.
Avka sar oda hin andre savore zbori, kaj hine o svata.*
34 O džuvľija pro zhromažďeňe mi en čit, bo lenge nane domukhlo te vakerel. Mi šunen olen, ko len ľidžan, avka sar pes oda phenel the andro Zakonos.
35 A te varesoske na achaľon, mi phučen khere peskere romendar, bo hin ladž, te e romňi kamel pro zhromažďeňe te vakerel.
36 Či hino le Devleskero lav tumendar? Abo sas dino ča tumenge?
37 Aľe te peske vareko mišľinel, hoj vakerel le Devleskere lava abo hoj hin les oda daros, savo les o Del diňa prekal peskero svato duchos, ta mi udžanel,* hoj oda, so tumenge pisinav, o Raj kamel, kaj te doľikeren.
38 Aľe te vareko kaleske na kamel te achaľol, ta kaleske aňi na achaľola.
39 Avka phralale mire, keren sa, kaj te vakeren le Devleskere lava, aľe ňikaske na braňinen, kaj te vakerel aver čhibenca.
40 Savoro pes mi kerel šukares a le šoroha.
Poznamki tele čijarkica
^ Abo hoc.
^ Doslovňe: svata tajomstvi.
^ Abo hijaba, jeva.
^ Abo sar dospela.
^ Dikh o dodatkos A5.
^ Abo kľončki.
^ Abo porjatkos.
^ Dikh tuke buter adaj andro Slovňikos.
^ Abo uznajinel.