Peršo Korinťanenge 16:1-24
16 Sar džal pal o love, save pes kiden avri predal o svata,* ta keren avka sar phenďom the le zborenge, save hine andre Galacija.
2 Sako peske mi thovel peršo ďives andro kurko varesave love pre sera. Sako ajci, keci pes leske del, kaj pes te na kiden avri o love, sar avava.
3 Aľe sar ke tumende avava, bičhavava olen, pal save mange pisinena andro ľila, hoj lenge paťan, kaj te len tumare love a te ľidžan len andro Jeruzalem.
4 A te kampela, kaj odoj te džav the me, ta džava lenca.
5 Avava ke tumende, sar predžava prekal e Macedonija, bo odarig kamav te džal.
6 Varesavo časos možno ke tumende ačhava, abo ačhava the prekal o jevend. Paľis varesavo kotor le dromeha šaj aven manca odoj, kaj džava.
7 Na kamav ke tumende te džal akana, bo bi tumenca našťi ačhiľomas buter. Bo paťav, hoj te o Jehovas* kamela, ta ačhava ke tumende the buter.
8 Andro Efez ačhava dži o inepos, sar pes skidel e peršo uroda.*
9 Bo akana hin adaj but buťi,* savi šaj kerav predal o Raj. Aľe hin adaj the but ajse džene, save pre ma džan.
10 Te avela o Timotej, šukares les maškar tumende prilen, kaj maškar tumende te na ciťinel e dar, bo the ov kerel buťi predal o Jehovas* avka sar the me.
11 Dojekh tumendar leske mi presikavel e paťiv. Varesavo kotor le dromeha leha džan a den leske savoro, so leske kampel, bo pre leste le phralenca užarav.
12 Sar džal pal amaro phral pal o Apolo, igen les mangavas, kaj ke tumende le phralenca te džal. Aľe akana ke tumende našťi džal. Avela, sar pes leske oda dela.
13 Ma soven. Aven zorale andro paťaviben. Ma daran a aven zorale.
14 Savoro, so keren, keren le kamibnaha.
15 Džanen, hoj o Šťefan the ola, so leha bešen andro kher, sas perša učeňika andre Achaja. A tiš jilestar služinen le svatonenge. Vaš oda tumenge phralale phenav:
16 Šunen olen, so tumen ľidžan the dojekhes, ko amenca jekhetane kerel phari buťi predal o Raj.
17 Radisaľuvav olestar, hoj avľa o Šťefan, o Fortunatus the o Achajikus, bo džanav, hoj tumen mange našťi pomožinďan, ta on mange pomožinde vaš tumenge.
18 Podhazdle man the tumen. Paľikeren vaš ajse manuša.
19 Pozdravinen tumen o phrala pheňa andal o zbori, so hine andre Azija. Jilestar tumen pozdravinel o phral Akvila peskera romňaha la Priskaha the o phrala pheňa andal o zboros, savo pes zdžal andre lengero kher.
20 Pozdravinen tumen savore phrala. Paš oda sar tumen pozdravinen, tumen the čumiden.*
21 Ala lava tumenge pisinav me, o Pavol.
22 Te vareko narado dikhel le Rajes, mi el odsudzimen. Av Rajeja amaro!
23 Mi presikavel tumenge amaro Raj o Ježiš peskero baro lačhipen.
24 Tumenge savorenge, so san le Ježišoskere Kristoskere učeňika, phenav, hoj tumen rado dikhav.
Poznamki tele čijarkica
^ Dikh tuke buter adaj andro Slovňikos.
^ Dikh o dodatkos A5.
^ Mišľinel pes Letňice.
^ Doslovňe: phundriľa mange vudar, kaj te kerav buter buťi.
^ Dikh o dodatkos A5.
^ Doslovňe: pozdravinen tumen le svatone bozkoha.