Peršo Korinťanenge 2:1-16
2 Phralale, avľom, kaj tumenge te vakerav pal oda, so o Del beršenca delas te džanel.* Aľe na džalas mange pal oda, kaj tumenge pal mande te mišľinen sar džanav te vakerel a savo som goďaver.
2 Phenďom mange, hoj tumenge na vakerava pal ňisoste avreste ča pal o Ježiš Kristus a pal oda, hoj sas primardo pro drukos.
3 Sar ke tumende avľom, na džanavas či oda zvladňinava, daravas man a o jilo andre mande previsaľolas.
4 Mire lava the oda, so tumenge vakeravas pal e lačhi sprava, na phenďom varesave igen goďaver lavenca. Aľe andre oda, so vakeravas, šaj dikhľan, savi zor hin le Devleskere duchos.
5 Vaš oda kada phenav, kaj tumaro paťaviben te na el zathodo pre manušeskeri goďi. Aľe kaj te paťan andre Devleskeri zor.
6 Maškar ola, save hine zorale andro paťaviben, vakeras pal e goďi. Aľe na pal e goďi, savi hiňi andre kada svetos,* aňi na pal e goďi, savi hin andro svetos le bare rajen, save ena zňičimen.
7 Vakeras pal le Devleskeri goďi, savi šaj dikhas andre oda, so o Del beršenca delas te džanel. O Del peske imar čirla* phenďa, hoj pal adi goďi na phenela sa jekhvareste, kaj amen paľis kaleha te bararel.
8 Te bi ala bare raja andre kada svetos* džanlehas, savi goďi hin andre kada, so o Del beršenca delas te džanel, ta bi na primardehas pro drukos amare bare Rajes.
9 Avka sar hin pisimen: „E jakh na dikhľa, o kan na šunďa a le manušeske aňi pre goďi na avľa oda, so o Del kerďa predal ola, save les igen rado dikhen.“
10 Aľe amenge oda o Del diňa te džanel prekal peskero svato duchos.* Bo leskero svato duchos džanel pal savoreste a pomožinel amenge te achaľol oleske, so hino igen pharo te džanel pal o Del.
11 Ňiko le manušendar na džanel, so hin avres andre goďi, ča ov korkoro.* Avka istones ko šaj achaľol oleske sar rozmišľinel o Del? Ča leskero svato duchos.
12 Amen na priiľam oda sar rozmišľinel a kerel o svetos. Aľe mukhas, kaj amen te ľidžal le Devleskero svato duchos, kaj te achaľuvas oleske, so chudľam le Devlestar.
13 Pal ada the vakeras. Na le lavenca, save amen sikhľarde o manuša. Aľe le lavenca, save amen o Del sikhľarďa prekal peskero svato duchos. Te kamas te višvetľinel o lava pal o Del, ta len višvetľinas ajse lavenca, save amen sikhľarel o Del prekal peskero svato duchos.
14 O manuš, savo kerel oda, pre soste les cirdel leskero ťelos, na prilel oda, so o Del del te džanel prekal peskero svato duchos, bo oda predal leste hin diliňipen a našťi oleske achaľol. Bo kaj o manuš oleske te achaľol, kampel leske, kaj les te ľidžal le Devleskero svato duchos.
15 Aľe te le manušes ľidžal le Devleskero svato duchos, ta rozmišľinel sar pre savoreste dikhel o Del, vaš oda les ňiko našťi sudzinel.
16 Sem „ko sprindžarďa sar rozmišľinel o Jehovas,* kaj les te del goďi“? Aľe amen rozmišľinas sar o Kristus.
Poznamki tele čijarkica
^ Doslovňe: pal o Devleskero svato tajomstvos.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Dikh tuke buter adaj andro Slovňikos o lav duchos.
^ Doslovňe: leskero duchos.
^ Dikh o dodatkos A5.
