Peršo Korinťanenge 3:1-23
-
O Korinťana pes mek furt den te ľidžal le svetoha (1 – 4)
-
O Del kerel, kaj te barol (5 – 9)
-
Keras jekhetane buťi le Devleha (9)
-
-
Te budinel pre ajse zakladi, save na zlabona (10 – 15)
-
„San sar te bi le Devleskero chramos“ (16, 17)
-
E goďi, so del ada svetos, hiňi andre Devleskere jakha diliňipen (18 – 23)
3 Vaš oda phralale mire, tumenca našťi vakeravas sar ajsenca, save pes den te ľidžal le Devleha, aľe sar ajsenca, save pes den te ľidžal kale svetoha. Bo sar džal pal tumaro paťaviben, ta san sar cikne čhave, save mek pijen čuči.
2 Vaš oda, hoj tumen na sas ajso zoralo paťaviben a mek furt tumen nane, ta tumen davas te pijel thud a na te chal chaben.
3 Bo furt rozmišľinen sar o manuša andro svetos. A či na san sar on, te furt pre peste džan a vesekedinen* tumen?
4 Sem te jekh vakerel: „Me som le Pavloha.“ A aver: „Me som le Apoloha.“ Či na keren oda, so keren the averdžene andro svetos?
5 Aľe ko hino o Apolo? A ko hino o Pavol? Običajna služobňika avka sar the tumen. On tumenge ča pomožinde, kaj te paťan a kerde buťi, savi len diňa o Raj.
6 Me sadzinavas, o Apolo čhivkerelas o paňi, aľe o Del sas koda, savo kerelas, kaj te barol.
7 Akor na džal pal koda, ko sadzinel. Aňi pal koda, ko čhivkerel paňi. Aľe pal o Del, savo kerel, kaj te barol.
8 Koleske, so sadzinel the koleske, so čhivkerel paňi, džal pal jekh. Aľe dojekhes o Del požehňinela pal oda sar kerelas peskeri buťi.
9 Avka jekhetane keras buťi le Devleha. Tumen san sar te bi e maľa, pre savi o Del kerel buťi a tiš san sar te bi e stavba, savi o Del budinel.
10 Vaš oda, hoj mange o Del presikaďa peskero baro lačhipen, ta sar lačho stavbaris kerďom o zakladi, aľe e buťi pre lende imar dokerel vareko aver. Dojekh peske mi del pozoris sar pre lende dureder budinel.
11 Ňiko našťi kerel zakladi, te imar hine kerde. O Ježiš Kristus hino sar te bi ala zakladi.
12 Vareko pre ala zakladi kerel o kher le somnakajistar,* le strjebrostar, le drahe barendar a vareko le kaštestar abo le phusendar.
13 Aľe avela ďives, sar pes sikavela, ko savo kher kerďa. Bo sar chudela te labol, akor pes sikavela, sostar sas oda kher budimen.
14 Te e jag na zlabarela oda, so vareko budinďa pre ala zakladi, kajse manušes o Del požehňinela.
15 Aľe te varekaske oda, so budinďa, zlabola, koda manuš but našavela. Ov korkoro ela zachraňimen, aľe ajci, hoj na zlabiľa.
16 Či na džanen, hoj san sar te bi le Devleskero chramos a hoj andre tumende hin le Devleskeri zor?*
17 Te vareko meľarel le Devleskero chramos, o Del les zňičinela. Bo le Devleskero chramos hino svato a koda chramos san tumen.
18 Te peske vareko mišľinel, hoj hino goďaver, bo pre leste avka dikhen o manuša andre kada svetos,* ta kaleha pes klaminel korkoro. Feder te ela akana dilino, kaj paľis te el goďaver.
19 Sem e goďi, so del ada svetos, hiňi andre Devleskere jakha diliňipen. Avka sar hin pisimen: „O Del lel tele pal e goďi le goďaveronen.“
20 A tiš hin pisimen: „O Jehovas* džanel, hoj oda sar rozmišľinen o goďaver, ta oda na ľidžal ke ňisoste.“
21 Avka ňiko te na thovel o baripen andro manuša, bo sa patrinel tumenge,
22 či o Pavol, či o Apolos, či o Kefas,* či o svetos, či o dživipen, či o meriben, či oda, so pes kerel akana, či oda, so mekča pes kerela. Savoro patrinel tumenge.
23 Tumen patrinen le Kristoske a o Kristus le Devleske.
Poznamki tele čijarkica
^ Abo halasinen, keren, hadinen.
^ Abo le zlatostar.
^ Doslovňe: le Devleskero duchos.
^ Dikh tuke buter adaj andro Slovňikos.
^ Dikh o dodatkos A5.
^ Aver menos le Peteriskero.
