Peršo Korinťanenge 4:1-21
4 Sako mi džanel, hoj sam le Kristoskere služobňika. A tiš mi džanen, hoj lačhes dodikhas pre oda, so o Del beršenca delas te džanel.*
2 Ajse manušendar, so pre ada dodikhen, o Raj užarel, hoj peskeri buťi kerena so nekfeder.
3 Na džal mange igen pal oda sar pre mande dikhen tumen abo o bare šere pro sudos. Sem aňi me korkoro man na sudzinav.
4 Na džanav olestar, hoj bi kerďomas vareso nalačho. Aľe kaleha na kamav te phenel, hoj kerav savoro mištes. Ča o Jehovas* šaj phenel či oda, so kerav, hino lačho abo nalačho.
5 Vaš oda ňikas anglal ma sudzinen, medik* na avela o Raj. Bo ov oda, so hino garudo andro kaľipen, anela avri pro švetlos a kaleha sikavela, so kas hin andro jilo. Paľis o Del dojekhes poašarela pal oda, so kerelas.
6 Phralale, pheňale, pisinav tumenge pal mande the pal o Apolo ča pre tumaro lačhipen. Len tumenge amendar priklados a šunen ala lava: „O manuš našťi prithovel buter ke oda, so hin pisimen.“ Paľis ňikas na hazdena upre a pre aver na dikhena tele. Avka tumendar na kerena, hoj san vareso buter.
7 Soske tuke mišľines, hoj sal feder sar aver? Či oda, so tut hin, na chudľal le Devlestar? A te oda chudľal lestar, ta soske tut ašares sar te bi oda lestar na chudľalas?
8 Imar tumen hin savoro, so kamľan? Imar san barvale? Chudľan te vladňinel sar kraľa bijal amende? Kamľamas, kaj imar te vladňinen, bo avka bi vladňinďamas the amen tumenca.
9 Avka mange dičhol, hoj amen le apoštolen o Del thoďa sar te bi poslednonen pro javiskos, kaj pre amende savore te dikhen, bo samas odsudzimen, kaj te meras. Dikhel pre amende calo svetos, o aňjela the o manuša.
10 Tumen tumenge mišľinen, hoj te keren oda, so o Kristus, ta san bare goďaver a pre amende phenen, hoj sam diline, the te keras oda isto. Amen sam ola slaba, aľe tumen san ola zorale. Tumenge o manuša presikaven e paťiv, aľe pre amende dikhen sar pro rukone.
11 Ča cerpinas andre bokh, šuťarel amen, phiras čorikanes urde, maren amen, nane amen kaj te sovel
12 a keras phari buťi. Sar amenge o manuša rakinen, phenas lenge šukar lava. Sar pre amende džan, džanas te ľikerel avri.
13 Sar pal amende vakeren oda, so nane čačipen, šukares lenge odphenas. Dži doakana pre amende o manuša andro svetos dikhen sar pro džungipen, sar pre kajse, so jevavalom* dživen.
14 Ala lava tumenge na phenav, kaj tumen te ladžan, aľe dophenav tumenge sar mire čhavenge, saven rado dikhav.
15 Choč* bi tumen ulehas 10 000 učiťeľa, save bi tumen sikhľardehas pal o Kristus, aľe šaj phenen, hoj hin tumen but dada? Me predal tumende som sar dad akorestar sar tumenge vakeravas e lačhi sprava pal o Kristus Ježiš.
16 Igen tumen mangav, kaj te keren oda, so the me.
17 Vaš oda ke tumende bičhavav le Timotej, savo hino sar miro čhavo, saves rado dikhav, savo vernones služinel le Rajeske. Ov tumenge leperela lava, savendar man ľikerav andre služba predal o Kristus Ježiš a save sikhľarav všadzik, andre dojekh zboros.
18 Varesave peske mišľinenas, hoj ke tumende imar na avava, vaš oda pestar chudne te kerel, hoj pre lende nane.
19 Aľe so časos ke tumende avava, te oda o Jehovas* kamela. Ela mange jekh, so vakeren o barikane, aľe kamava te džanel či len ľidžal le Devleskeri zor abo na.
20 Te džal pal o Devleskero kraľišagos, ta na stačinen ča o lava. Džal pal kada či amen hin le Devleskeri zor.
21 So kamen? Kaj pre tumende te lav e paľica, sar ke tumende avava? Abo kamen, kaj ke tumende te avav le kamibnaha the šukare lavenca?
Poznamki tele čijarkica
^ Doslovňe: pro Devleskere svata tajomstvi.
^ Dikh o dodatkos A5.
^ Abo pokim.
^ Abo hijaba.
^ Abo hoc.
^ Dikh o dodatkos A5.
