Peršo Korinťanenge 5:1-13
5 Došunďom man, hoj maškar tumende andro zboros, kerel vareko igen baro lubipen.* Dživel le dadeskera romňaha. A oda aňi maškar o manuša andro svetos pes kajso vareso na kerel.
2 Tumen san andre kada barikane? Na majinenas bi sigeder te rovel a te čhivel avri ajse manušes andal o zboros, te kerel ajso baro binos?
3 The te odoj na som tumenca, aľe mira goďaha* som paš tumende. Me ole dženes imar čhiďom avri* andal o zboros sar te bi uľomas odoj.
4 Sar tumen zdžana jekhetane andro menos amare Rajeskero le Ježišoskero, ma bisteren, hoj leskeri zor hiňi tumenca a hoj the me som andre goďi jekhetane tumenca.
5 Mukhen ajse manušes le Satanoske, kaj imar te na el andro zboros. Avka na scirdela avre dženen ke oda isto. Kaj akor sar avela o Raj, sako andro zboros te dikhel, hoj oda binos, so kerďa, hino nalačho.
6 Andre kada san barikane? Na džanen, hoj čepo* kvasos kerel, hoj calo chumer avel upre?
7 Odčhiven tumendar oda nalačho kvasos, kaj te aven sar te bi nevo chumer. Sem maškar tumende na majinel te el ňisavo kvasos. Bo o Kristus, amaro barankos, savo pes obetinelas pro Pesach, imar diňa peskero dživipen.
8 Keras ada inepos Pesach, aľe na le nalačhe kvasoha aňi le kvasoha, savo sikavel pro nalačhipen the džungaľipen. Aľe mušinas te chal ajso maro, andre savo nane o kvasos a savo sikavel pre oda, so hino lačho a so hin čačipen.
9 Andre miro ľil tumenge pisinďom, kaj te na aven ajsenca, save dživen avka, hoj keren lubipen.*
10 Na mišľinavas le manušen andre kada svetos, so keren lubipen, kamen ča but, so občorarkeren avren a hine modlara. Bo či kamen či na, ta maškar ala manuša andro svetos mušinen te dživel.
11 Aľe akana tumenge pisinav, kaj te na aven ňikaha, ko pal peste phenel, hoj hino phral, aľe kerel lubipen, kamel ča but, hino modlaris, rakinel avrenge, maťuvkerel abo občorarkerel avren. Kajseha aňi ma chan.
12 Ada nane pre mande, kaj te sudzinav le manušen andro svetos. Či na majinen te sudzinel olen, so hine andro zboros?
13 Le manušen andro svetos sudzinel o Del. „Odčhiven andal o zboros le manušes, savo kerel ada baro binos.“
Poznamki tele čijarkica
^ Po grecki porneia. Dikh tuke buter adaj andro Slovňikos.
^ Doslovňe: mire duchoha.
^ Doslovňe: odsudzinďom.
^ Abo sikra, čuno, jegnaj.
^ Dikh tuke buter adaj andro Slovňikos.
