Peršo Korinťanenge 6:1-20
6 Te pes maškar tumende vareko varekaha kerďa, ta sar oda, hoj sigeder kaleha kamel te džal pro sudos ke ajse manuša, save na paťan andro Del a na pal ola, saven peske o Del kidňa avri?*
2 Na džanen, hoj ola, saven peske o Del kidňa avri, sudzinena o svetos? Te na džanen te sudzinel ča vareso ajso cikno, ta akor sar sudzinena o svetos?
3 Na džanen, hoj sudzinaha le aňjelen? Ta soske te na sudzinel oda, so pes kerel andro dživipen?
4 Te tumenge kampel te sudzinel oda, so pes kerel andro dživipen, ta akor sar, hoj kaleha džan pal o manuša, savenge o phrala the o pheňa andal o zboros na paťan?
5 Ada tumenge phenav, kaj tumen te ladžan. Čačes maškar tumende nane aňi jekh goďaver murš, savo bi džanelas so te kerel, sar hin vareso maškar tumende?
6 Dikh ča, so keren! Phral phrales cirdel pro sudos a oda mek ke ajse manuša, so na paťan andro Del!
7 Imar ča kada, hoj jekh avres den pro sudos, hin tumenge bari ladž. Soske tumenge na phenen: „Ta so imar, mi el avka sar hin. Mi mukhel peske oda, so mange kamel.“
8 Aľe tumen ada na keren. Sigeder tumenge na paťan a keren pre choľi tumare phralenge!
9 Na džanen, hoj ola manuša, save keren o nalačhipen, na dživena andro Devleskero kraľišagos? Avka oda hin. A aňi ola, so keren lubipen,* aňi o modlara, aňi ola, so džan avreha avraha, aňi o murša, save domukhen, kaj lenca aver murša te keren, so kamen, aňi o murša, save pašľon le muršenca,
10 aňi o zloďeja, aňi ola, so kamen ča but, aňi ola, so maťuvkeren, aňi ola, so rakinen avrenge, aňi ola, so občorarkeren avren, na dživena andro Devleskero kraľišagos.
11 Varesave tumendar dživenas avka. Aľe kada džungipen čhiďan pal tumende tele. Sanas pošvecimen le Devleskere svatone duchoha a sas pre tumende phendo, hoj san spravodliva* andro menos le Rajeskero le Ježišoskero Kristoskero.
12 Savoro šaj kerav, aľe na savoro anel chasna. Savoro šaj kerav, aľe na domukhav, kaj man ada te scirdel.
13 O chaben hino pre kada, kaj te džal andre džombra.* A e džombra hiňi pre kada, kaj andre late te džal o chaben. Aľe o Del zňičinela soduj. O ťelos nane predal ada, kaj te kerel lubipen,* aľe kaj te kerel buťi predal o Raj. A o Raj pes pal o ťelos starinela.
14 Aľe o Del uštaďa andal o meriben le Rajes a peskera zoraha uštavela andal o meriben the amen.
15 Na džanen, hoj tumare ťeli patrinen le Kristoske? Majinav te lel oda, so patrinel le Kristoske a te thovel oda jekhetane la prostitutkaha? Ta kada na!
16 Či na džanen, hoj koda, ko džal la prostitutkaha, hino laha jekh ťelos? Sem o Del vakerel: „On dujdžene ena jekh ťelos.“
17 Aľe ko hino zajekh le Rajeha, ta premišľinel avka sar the ov.*
18 Denašen savorestar, so bi ľidžalas ko lubipen.* Ňisavo aver binos nane ajso sar kada. Bo ko kerel lubipen, dukhavel ča pes korkores.
19 Na džanen, hoj tumaro ťelos hino sar te bi chramos, andre savo hino o svato duchos, savo tumen diňa o Del? Tumare ťeli imar na patrinen tumenge.
20 Bo sas vaš tumenge poťimen igen but. Vaš oda keren tumare ťelenca avka, kaj te ašaren le Devles.
Poznamki tele čijarkica
^ Doslovňe: pal o svata.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Abo kužum, žaludkos.
^ Po grecki porneia. Dikh tuke buter adaj andro Slovňikos.
^ Doslovňe: jekhe duchoha.
^ Po grecki porneia. Dikh tuke buter adaj andro Slovňikos.
