Peršo Korinťanenge 8:1-13
8 Akana tumenge pisinav pal o chaben, savo hino obetimen le modlenge: Amen savore pal kada vareso džanas. Koda, ko džanel but, ačhel barikano, aľe o kamiben podhazdel.
2 Te vareko peske mišľinel, hoj vareso džanel, oda mek na znameňinel, hoj pal kada imar džanel savoro.
3 Aľe te vareko rado dikhel le Devles, ole dženes prindžarel the o Del.
4 A te džal pal kada či te chal o chaben, savo sas obetimen le modlenge, džanas, hoj e modla na mol ňič. Bo hin ča jekh Del, aver nane.
5 O manuša phenen, hoj hin but devla andro ňebos the pre phuv. Vaš oda vakeren le manušenge, hoj hin but „devla“ the „raja“.
6 Aľe predal amende hin ča jekh Del, jekh Dad, savestar hin savoro a predal savo dživas. A hin ča jekh Raj, Ježiš Kristus, angle* savo hin savoro a leske paľikeras, hoj dživas.
7 Aľe na savore kada džanen. Varesave varekana služinenas le modlenge, vaš oda the akana, sar chan kala chabena, dikhen pre lende sar te bi enas obetimen le modlenge. A vaš oda len marel o jilo,* bo nane ajse zorale andro paťaviben.
8 Aľe anglo chaben na avaha pašeder paš o Del. Te na chas, na sam pre ada goreder. A te chas, na sam pre kada feder.
9 Den tumenge pozoris, kaj koda, pal soste tumenge mišľinen, hoj oda šaj keren, te na podmarel o pindre olenge, save mek nane ajse zorale andro paťaviben.
10 So te koda, savo mek nane ajso zoralo andro paťaviben, dikhela tut, savo pal kada džanes but sar chas o chaben andro chramos predal o modli? Či les oda na anela ke kada, kaj the ov te chal kajso chaben a paľis kerela oda, so leske o jilo na domukhel?
11 The te džanes, hoj tu oda šaj chas, aľe kaleha thoves tele oles, savo mek nane ajso zoralo andro paťaviben. Ma bister, hoj ov hino tiro phral, vaš savo tiš muľa o Kristus.
12 Te kavka keren binos proťi tumare phrala a kaleha thoven tele olen, save mek nane ajse zorale andro paťaviben, ta keren binos proťi Kristus.
13 Vaš oda, te o chaben thovel tele o paťaviben mire phraleske, ta imar ňigda na chava o mas, kaj te na podmarav o pindre mire phraleske.
