Peršo Korinťanenge 9:1-27
9 Na som slobodno? Na som apoštolos? Na dikhľom le Ježiš amare Rajes? Či na pomožinďom the tumenge te sprindžarel le Rajes?
2 A choč* predal o aver na som apoštolos, predal tumende isto som. Tumen san ola, save šaj phenen, hoj som le Rajeskero apoštolos.
3 Ada kamav te phenel olenge, save man sudzinen:
4 Nane amenge domukhlo te chal a te pijel?
5 Nane amenge domukhlo te lel peha la romňa, savi tiš služinel le Rajeske? Avka sar oda kerde aver apoštola, le Rajeskere phrala the o Kefas?*
6 Abo ča me the o Barnabaš amenge mušinas te zarodel o love, kaj amen te el sostar te dživel?
7 Ko služinel sar slugadžis a del andre kada peskere love? Ko sadzinel o hroznos a na chal lestar? Abo ko pasinel le bakroren* a na pijel lengere thudestar?
8 Oda, so tumenge vakerav, oda nane ča oda, so peske mišľinen o manuša. Na vakerel ada the o Zakonos?
9 Andro Mojžišoskero zakonos pes pisinel: „Na phandeha ňisoha o piskos le bikoske, sar pophirel pal o žužoďiv,* kaj les te rozkerel.“ Mišľinelas o Del kaleha ča pro biki?
10 Na phenel oda sigeder amenge? Sas oda pisimen predal amende. Bo koda, ko orinel the koda, ko rozkerel o žužoďiv, oda kerel vaš oda, bo paťal, hoj chudela oda, so leske patrinel la urodatar.
11 Phenďam tumenge pal o Devleskere lava a kada tumenge geľa andro jilo. Uľahas bi namištes, te bi amenge pomožinďanas andre koda, andre soste amenge kampel?
12 Te džanen, hoj majinen te pomožinel avrenge, o so buter bi majinďanas te pomožinel amenge. Aľe amen ada tumendar na užarahas. Andre dojekh pharipen ľikeras avri, ča kaj ňiko te na phenel ňič, sar vakeras e lačhi sprava pal o Kristus.
13 Na džanen, hoj ola, save keren svato buťi, chan olestar, so hin andro chramos? A ola, so služinen paš o oltaris, chuden vareso olestar, so hino obetimen pro oltaris?
14 Avka the o Raj phenďa, hoj olen, save vakeren e lačhi sprava, len aver majinen te del te chal.
15 Aľe me ňikastar ňič na lavas. Na pisinav tumenge ada, kaj akana predal mande vareso te keren. Muľomas bi andre ladž, te bi mange vareko čhivelas pro jakha, hoj e lačhi sprava vakerav ča vaš oda, bo hin man vareso olestar.
16 Sar vakerav e lačhi sprava, nane man soha pes te ašarel, bo oda mušinav te kerel. Aľe vigos* mange, te bi pal late na vakeravas!
17 Te oda kerav le jilestar, anel mange oda but lačhipen. A te man o jilo na cirdel, ta the avka oda mušinav te kerel, bo oda sas mange dino, kaj ada te kerav.
18 A so hin oda lačhipen? Ada, hoj sar vakerav e lačhi sprava, na kerav oda vaš o love a aňi tumendar na mangav ňič, kaj pes mange lokeder te dživel. The te bi ada šaj keravas, sar vakerav e lačhi sprava.
19 The te na som otrokos, kerďom mandar otrokos predal savore, kaj te pomožinav so nekbuter manušenge.
20 Predal o Židi ačhiľom Židos, kaj te pomožinav le Židenge. Predal ola, save hine tel o Zakonos, somas the me sar te bi tel o Zakonos (the te na som tel o Zakonos), kaj te pomožinav olenge, save hine tel o Zakonos.
21 Sar somas olenca, save na doľikeren o Zakonos, the me sar te bi na doľikerďomas o Zakonos (choč anglo Del doľikerav o Zakonos, bo dživav tel o Kristoskero zakonos), kaj te pomožinav olenge, save na doľikeren o Zakonos.
22 Sar somas ajsenca, saven mek nane ajso zoralo paťaviben, somas the me sar te bi ajso, saves mek nane ajso zoralo paťaviben, kaj lenge te pomožinav. Kerďom sa, kaj te pomožinav savorenge le manušendar a kaj te zachraňinav aspoň ča varesaven.
23 Savoro kerav predal e lačhi sprava, kaj pal late te vakerav avrenca.
24 Na džanen, hoj choč pro preťeki prastan* savore preťekara, ta ča jekh chudela e cena? Prastan avka, kaj la te chuden.
25 Dojekh, ko džal pro preťeki te prastal, pes mušinel te zľikerel andre savoreste. On oda keren vaš oda, kaj te chuden koruna, savi rozperel.* Aľe amen oda keras, kaj te chudas e koruna, savi ačhela pro furt.*
26 Vaš oda the me prastav, aľe džanav, kaj kamav te doavel. Avka sar o bokseristas džanel, kaj kamel te pekel,* ta the me pekav avka, kaj te na pekav andro vzduchos.
27 Aľe sar te bi marav mire ťelos a ľidžav les sar otrokos, kaj pre ma, savo vakerav avrenge pal e lačhi sprava, te na dikhel o Del namištes.
Poznamki tele čijarkica
^ Abo hoc.
^ Aver menos le Peteriskero.
^ Abo le ovečken.
^ Abo pal e pšeňica.
^ Abo koňec.
^ Abo denašen.
^ Doslovňe: savi pes zňičinela.
^ Doslovňe: savi na ela zňičimen.
^ Abo te čhinel.
