Peršo Tesaloničanenge 1:1-10
1 Me o Pavol, jekhetane le Silvanoha* the le Timotejoha bičhavas ada ľil le phralenge andro zboros andro Tesaloniki, savo patrinel le Devleske le Dadeske the le Rajeske le Ježišoske Kristoske:
Mi el tumenge presikado o baro lačhipen a mi el tumen o smirom.
2 Furt sar amen modľinas, paľikeras le Devleske vaš tumenge savorenge.
3 O Del džanel, hoj na bisteras pre tumari buťi, savi keren, bo paťan a hin tumen kamiben. Tiš na bisteras pre oda sar ľikeren avri, bo hin tumen naďej, savi hiňi zathoďi pre amaro Raj Ježiš Kristus.
4 Džanas phralale, hoj o Del tumen rado dikhel a hoj tumen peske kidňa avri.
5 Bo e lačhi sprava, savi tumenge vakerahas, oda na sas ča lava. Aľe ľidžalas amen le Devleskero svato duchos. Samas amenge ista, hoj oda, so tumenge phenďam, sas čačipen. A vaš oda tumenge kada geľa andre tumare jile. Sem džanen, hoj oda sar dživahas maškar tumende, tumenge ča pomožinďa.
6 A tumen kerenas oda isto so the amen the o Raj. Choč* angle* ada zadživenas bare pharipena, priiľan o lav le Devlestar le radišagoha, savo del le Devleskero svato duchos.
7 Avka sikaďan savorenge, so paťan andro Raj a dživen andre Macedonija the Achaja, so majinen te kerel.
8 Bo tumendar šunde le Jehovaskero* lav na ča andre Macedonija the Achaja. Aľe pal tumaro paťaviben andro Del pes vakerel všadzik. Avka amen imar na mušinas te phenel ňič.
9 Sem o manuša korkore vakeren pal oda sar ke tumende avľam a sar tumen odvisarďan tumare modlendar a visarďan tumen ko Del, kaj te služinen džidone the čačikane Devleske.
10 A vakeren the pal oda sar tumen užaren pre oda, sar avela andal o ňebos leskero Čhavo o Ježiš, saves uštaďa andal o meriben a savo amen zachraňinela le Devleskera choľatar, savi avel.
Poznamki tele čijarkica
^ Vičinenas les tiš Silas.
^ Abo hoc.
^ Abo vaš, bijal, aščal, predal.
^ Dikh o dodatkos A5.
