Peršo Tesaloničanenge 2:1-20
2 Phralale, sem korkore džanen, hoj sar samas ke tumende, na sas oda jevavalom.*
2 Sar džanen, andro Filipi zadžiďiľam pharipena a igen našukares amenca kerenas. Aľe o Del amenge pomožinďa a diňa amen zor, kaj tumenge te vakeras e lačhi sprava le Devlestar bije dar, choč* pre amende igen džanas.
3 Bo oda, hoj tumen kamas te podhazdel, nane klamišagi, aňi oda na kamas te kerel nalačhe jileha a aňi tumen na kamas te oklaminel.
4 Vaš oda tumenge oda avka phenas, bo o Del amen pre ada kidňa avri, kaj te vakeras e lačhi sprava. A na keras oda, kaj amen te pačinas le manušenge, aľe le Devleske, savo dikhel, so hin amen andro jile.
5 Sar džanen ňigda ňikaske amen na guľarahas a aňi amendar na kerahas lačhe manušen ča vaš oda, kaj tumendar vareso te cirdas. O Del ada savoro džanel!
6 Na kamahas, kaj o manuša aňi tumen, aňi aver, pre amende te dikhen, hoj sam vareko buter. Choč sar le Kristoskere apoštola tumendar šaj užarahas vareso buter, kaj tumen pal amende te postarinen.
7 Aľe avka tumen igen rado dikhahas sar e daj, savi del te pijel peskere čhavoren a jilestar khatar* lende kerel.
8 Avka tumen rado dikhahas, hoj tumenge na kamľam ča te vakerel pal e lačhi sprava le Devlestar. Aľe te kampľahas, diňamas the amaro dživipen, kaj ča tumenge te pomožinas. Až avka igen tumen rado dikhahas.
9 Phralale, isto tumenge leperen pre amari phari buťi, savi kerahas. Sar tumenge vakerahas e lačhi sprava le Devlestar, ta ďives the rat kerahas buťi, kaj ňikaske tumendar te na avas pro šero.
10 Ke tumende, so paťan, samas verna, kerahas oda, so hino lačho andre Devleskere jakha,* na kerahas ňikaske ňič nalačho. A ada šaj phenel o Del the tumen.
11 Džanen, hoj dojekhes tumendar podhazdahas, kerahas, kaj tumenge te el feder pro jilo a bararahas tumen avri avka sar o dad peskere čhaven.
12 Kerahas oda vaš oda, kaj te dživen avka sar pes pačinel le Devleske, savo tumen kidel avri andre peskero kraľišagos the rajipen.
13 Vaš oda na preačhas te paľikerel le Devleske. Bo sar amendar šunďan le Devleskero lav, na priiľan les sar manušeskero lav, aľe sar oda, so čačes hino sar le Devleskero lav. A ada lav le Devlestar pomožinel tumenge, so paťan.
14 Sem tumen phralale, keren oda, so keren le Devleskere zbori andre Judeja, save hine zajekh le Kristoha Ježišoha. Zadžiďiľan tumenge ola ista pharipena olendar, so bešen odoj, kaj tumen. Avka istones sar peske on zadžiďile le Židendar.
15 On murdarde le Rajes Ježiš, murdarkerenas le proroken a pre amende džanas. Na pačinen pes le Devleske a savore manušenge keren ča nalačho.
16 Bo amenge na domukhen te vakerel e lačhi sprava le manušenge andal aver narodi, kaj the on te en zachraňimen. A kaleha keren buter a buter bini. Aľe lačhes, hoj imar zadživen le Devleskeri choľi.
17 Phralale, sar pre amende ispidle, kaj tumen te omukhas, the te oda sas ča pro čeporo* (a amen odoj tumenca našťi uľam, aľe le jileha samas furt tumenca), kerahas predal ada savoro, kaj tumen pale te dikhas.
18 Vaš oda ke tumende kamľam te avel. A me o Pavol ada kamľom te kerel na ča jekhvar, aľe duvar. Aľe o Satan kerďa, kaj amen ke tumende te na dochudas.
19 Sem so hin amari naďej abo amaro radišagos, abo e odmena,* andre savi avaha barikane angle amaro Raj Ježiš, sar pes visarela pale? Či oda na san tumen?
20 Andre tumende thovas baripen a radisaľuvas tumendar.
Poznamki tele čijarkica
^ Abo hijaba.
^ Abo hoc.
^ Abo pašal.
^ Abo spravodlivo. Dikh tuke buter adaj andro Slovňikos.
^ Abo čunoro, jegnajoro, sikrica.
^ Doslovňe: koruna.
