Peršo Tesaloničanenge 3:1-13
3 Sar ada imar našťi ľikerďam* avri, phenďam amenge, hoj ela nekfeder te ačhel andro Ateni.
2 A te bičhavel ke tumende le Timotej, amare phrales the le Devleskere služobňikos, savo vakerel e lačhi sprava pal o Kristus, kaj tumen te zoraľarel a te podhazdel tumaro paťaviben.
3 Kerďam oda vaš oda, kaj ňikas te na thoven tele ala pharipena.* Sem džanen, hoj pes ada savoro mušinel te ačhel.
4 Mek sar samas ke tumende, anglal phenďam, hoj amen ala pharipena užaren. A avka sar oda the korkore dikhen, imar pes oda kerel.
5 Vaš oda sar ada imar našťi ľikerďom avri, bičhaďom les, kaj man te dodžanav, savo zoralo hino tumaro paťaviben. A tiš či tumen o Beng varesar na scirdňa, kaj te peren andro binos, kaj e buťi, savi kerahas predal tumende te na el jevavalom.*
6 O Timotej akana avľa khatar tumende a anďa amenge lačhi sprava pal tumaro paťaviben the kamiben. Vakerel, hoj tumenge pre amende furt leperen andro lačho a igen amen kamen te dikhel avka sar the amen tumen.
7 Phralale, samas barikane, sar amen šunďam pal tumaro paťaviben. A ada amenge kerďa mištes pro jilo, sar zadživahas pharipen the trapišagos.
8 Sar akana džanas, hoj ňič na thoďa tele tumaro paťaviben andro Raj, ta kada kerďa, hoj sar te bi chudňamas pale te dživel.
9 Paľikeras le Devleske vaš oda, save san, bo kaleha amenge keren igen baro radišagos.
10 Ďives the rat amen igen mangas, kaj tumen pale te dikhas a te zoraľaras tumaro paťaviben. Hin jekh sar oda kampela te kerel.
11 Igen mangas amare Devles the Dades, amare Rajes le Ježiš, kaj amenge akana te domukhen ke tumende te avel.
12 O Raj tumenge mi pomožinel, kaj buter rado te dikhen jekhe avres a the avren. A oda avka sar amen rado dikhas tumen.
13 Tiš mi kerel, kaj tumare jile te en žuže* the svata anglo amaro Del the Dad akor, sar pes visarela pale amaro Raj o Ježiš peskere savore svatonenca.*
Poznamki tele čijarkica
^ Abo ľikerďom. Šaj el, hoj o Pavol adaj pal peste vakerel sar te bi pal o duj džene.
^ Abo kaj ala pharipena te na keren, hoj peske vareko na ela isto.
^ Abo hijaba.
^ Abo čista.
^ Dikh tuke buter adaj andro Slovňikos.
