Peršo Tesaloničanenge 4:1-18
4 Phralale, sikhľarahas tumen sar te dživel avka, kaj pes oda te pačinel le Devleske. A tumen avka the keren. Aľe akana tumen mangas a kamas tumen te podhazdel andro menos le Rajeskero Ježišoskero, kaj ada te keren mek feder.
2 Sem džanen, savo sikhľariben* le Rajestar Ježišostar tumenge phenďam.
3 O Del kamel, kaj te aven svata a kaj te na keren lubipen.*
4 Dojekh tumendar majinel te zľikerel peskero ťelos, kaj te el svato a kaj les o Del te prilel.*
5 A ma aven ajse sar o manuša andal aver narodi, save na prindžaren le Devles. Bo ča kamen te džal le džuvľenca abo le muršenca a ňigda len nane dos.
6 Sar džal pal ada, ňiko te na kerel buter sar hino domukhlo, kaj te na kerel dukh peskere phraleske. Bo o Jehovas* vaš ajse bini anel o trestos. Avka sar tumenge imar vakerahas a na ča jekhvar tumenge ada phenďam.
7 Sem o Del amen na kidňa avri, kaj te keras ajso džungaľipen, aľe kaj te avas svata.
8 Te peske vareko kalestar na kerel ňič, ta na kerel peske ňič na le manušestar, aľe le Devlestar, savo tumen del peskero svato duchos.
9 Kaj tumen te kamen sar phrala, pal kada tumenge na kampel te pisinel. Bo o Del tumen sikhľarel, kaj tumen jekh avres rado te dikhen.
10 A tumen ada the keren. Rado dikhen savore phralen andre caľi Macedonija. Phralale, kamas tumenge te phenel, kaj tumenge mek buter te presikaven o kamiben.
11 Keren so pes del, kaj te dživen andro smirom. Ma mišinen tumen andre oda, andre soste tumen nane ňič. A keren pre tumende buťi avka sar tumenge phenďam.
12 Kaj o manuša te dikhen, hoj dživen šukares a hoj tumenge ňič na kampel.
13 A kamas phralale, kaj te džanen sar hin oda olenca, so mule, kaj tumen te na roven sar aver manuša, saven nane ňisavi naďej.
14 Sem te paťas, hoj o Ježiš muľa a paľis ušťiľa andal o meriben, ta the paťas, hoj o Del uštavela andal o meriben olen, so mule sar le Ježišoskere učeňika, kaj te en leha.
15 Avka sar phenel le Jehovaskero* lav tumenge vakeras, hoj ola amendar, save dživaha akor, sar pes visarela pale o Raj, avaha uštade andro ňebos. Aľe peršo ena uštade ola, so mule a paľis amen.
16 Bo korkoro o Raj avela tele andal o ňebos le Devleskera trubkaha. Sar archaňjelos phenela lav, savo zorales šunďola a ola, so mule sar le Ježišoskere učeňika, ušťena sar perša.
17 Paľis amen, save mek akor dživaha, avaha jekhetane lenca ile andro chmari,* kaj amen te zdžas le Rajeha andro ňebos. A paľis le Rajeha imar avaha pro furt.
18 Jekhetane tumen podhazden kale lavenca.
Poznamki tele čijarkica
^ Abo prikazi.
^ Po grecki porneia. Dikh tuke buter adaj andro Slovňikos.
^ Abo kaj tuke o manuša te presikaven paťiv.
^ Dikh o dodatkos A5.
^ Dikh o dodatkos A5.
^ Abo mraki.
