Peršo Timotejoske 1:1-20
1 Me o Pavol, savo ačhiľom apoštolos le Ježišoskero Kristoskero, bo oda avka phenďa o Del, amaro Zachrancas a o Kristus Ježiš amari naďej.
2 Pisinav tuke Timotej,* saves igen rado dikhav, mire čhaske, savo vernones služinel le Rajeske:
Mi presikavel tuke o Del, o Dad the o Kristus Ježiš, amaro Raj, peskero baro lačhipen, kovlo jilo a mi el tut o smirom andro jilo.
3 Sar kamľom te džal andre Macedonija, pomangľom tut, kaj te ačhes andro Efez. A mangav tut, kaj odoj te ačhes the akana, kaj te dophenes ole manušenge, te na sikhľaren vareso aver.
4 A kaj te na vakeren pal o falošna pribehi the pal oda, ko andal savi fajta hino. Bo paľis ča špekuľinen a na anel oda ňisavi chasna. Nane oda ňič ajso, soha bi o Del kamelas te zoraľarel o paťaviben.
5 Vaš oda tumenge ada phenav, kaj tumenge savore te presikaven o kamiben, savo džal čačes le jilestar. Kaj tumen te el žužo* svedomje a kaj te na en dujemujengere andre koda sar paťan.
6 Bo varesave ada preačhile te kerel a chudne te vakerel pal kajso, so na mol ňič.
7 Kamen te sikhľarel andal o zakonos, aľe na achaľon oleske, so vakeren aňi oleske, so avka igen kamen te sikhľarel.
8 Džanas, hoj o Zakonos hino lačho, te pes doľikerel avka sar pes majinel.
9 Na bisteras, hoj o zakoni nane predal koda, ko kerel oda, so hino lačho. Hine predal o manuša, save len na šunen, save džan proťi, save na kamen te šunel le Devles, predal o binošna, predal ajse, save omukhen avren, predal o manuša, save peske na keren ňič olestar, so hino svato, save murdaren peskere daden, dajen the aver manušen.
10 Predal ola, so keren lubipen,* predal o murša, save pašľon le muršenca, predal ola, so čorkeren avren, predal ola, save klaminen, predal ola, save na doľikeren peskero lav a predal ola, save keren savoro aver, so džal proťi čačikano sikhľariben.
11 Ada sikhľariben hino zathodo pre igen šukar rajikaňi lačhi sprava. Hino le Devlestar, savo hino bachtalo a adi lačhi sprava mange sas diňi.
12 Paľikerav amare Rajeske le Ježišoske Kristoske, savo man diňa zor. Paľikerav, hoj mange paťal a hoj mange diňa adi svato buťi.
13 Choč* varekana džavas proťi o Del the proťi leskero ľudos a chovinavas man sar barikano manuš bijo jilo. Aľe o Kristus mange presikaďa kovlo jilo, bo akor na džanavas, so kerav a na sas man čačikano paťaviben.
14 Amaro Raj mange presikaďa baro, čačes igen baro lačhipen. A o Kristus Ježiš mange presikaďa o kamiben a sikaďa mange o čačikano paťaviben.
15 Oda, so akana phenav, hino čačipen a šaj kaleske paťan: O Kristus avľa andro svetos, kaj te zachraňinel le binošnen a me som lendar oda nekgoreder.
16 Aľe sas mange presikado kovlo jilo. A avka pre ma, pre koda nekgoreder binošno manuš, o Ježiš Kristus sikaďa, savo hino trpezlivo.* A ačhiľom priklados predal ola, save andre leste paťana a dživena pro furt.
17 Ča jekhe Devleske na preačhaha te presikavel e paťiv a te bararel les. Bo ov hino Kraľis pro furt, savo ňigda na merela a saves našťi dikhas. Amen.
18 Timotej, mro čho, ala lava tuke phenav avka sar len pal tute imar anglal phenďa o Del. Ala lava tut dena zor avka sar lačhe slugadžis, savo pes džanel mištes te marel,
19 kaj tut te el igen zoralo paťaviben a lačho svedomje. Varesave ada na kerde a lengero paťaviben rozpeľa avka sar e loďa, savi demel andro skali.
20 Dopele avka o Himenejos the o Aleksander, saven diňom le Satanoske,* kaj te achaľon sar doperela vareko, ko džal proťi o Del.
Poznamki tele čijarkica
^ Znameňinel: koda, savo peske ceňinel le Devles.
^ Abo čisto.
^ Dikh tuke buter adaj andro Slovňikos.
^ Abo hoc.
^ Oda hin: pokojnones ľikerel avri a sig pes na choľarel.
^ Oda hin: kaj imar te na en andro zboros.
