Peršo Timotejoske 2:1-15
2 Kamav tumen te podhazdel ke kada, kaj tumen te modľinen vaš savore le manušendar, jilestar mangen le Devles, kaj lenge te pomožinel a paľikeren leske vaš lenge.
2 Vaš o kraľa, vaš savore bare raja, kaj te dživas andro smirom a te na keras amenge pharo šero. A kaj te služinas le Devleske calone jileha, vernones a kaj oda te na las ča avka.*
3 Pre kada o Del, amaro Zachrancas, dikhel mištes a kerel leske oda radišagos.
4 Ov kamel, kaj te en zachraňimen savore le manušendar a kaj mištes te sprindžaren o čačipen avka sar oda kampel.
5 Bo hin jekh Del a jekh manuš, savo pomožinel, kaj te el platno e zmluva maškar o Del the maškar o manuša, o Kristus Ježiš.
6 Ov diňa pes korkores a poťinďa ajci, keci kampľa, kaj savore manušen te premukhel le binostar. Pal kada pes vakerela akor, sar oda časos avela.
7 Vaš oda somas kidno avri, kaj ala lava te vakerav a kaj te avav apoštolos. Phenav čačipen, na klaminav, somas kidno avri, kaj te sikhľarav olen, save nane Židi pal o paťaviben the pal o čačipen.
8 Igen kamav, kaj o murša všadzik kaj pes zdžana, kaj pes te modľinen vernones the žuže* jileha* bije choľi a kaj pes te na vesekedinen.*
9 Le džuvľijenge phenav, kaj pes te uren slušnones, nabarikanes the goďaverones. A tiš sar pes uchanen, kaj te keren goďaverones.* Te na thoven pre peste but somnakaj,* perli a te na uren igen draho uraviben.
10 Aľe kaj pre lende te dičhol, hoj keren lačhipen avka sar pes patrinel pro džuvľija, save služinen le Devleske calone jileha.
11 Paš oda sar pes sikhľarel,* o džuvľija mi en čit a mi šunen le muršen.
12 Na domukhav la džuvľijake, kaj te sikhľarel aňi kaj te ľidžal le muršes, aľe mi el čit.
13 Sem peršo sas kerdo o Adam až paľis e Eva.
14 Na sas oda o Adam, ko sas oklamimen, aľe e romňi. La o Beng lačhes iľa pal e goďi a vaš oda kerďa binos.
15 E romňi ela chraňimen kaleha, hoj la ena čhave, bo na kerela diliňipen, te pes zmukhela pro Del, presikavela o kamiben, ela žuži andre Devleskere jakha a sikavela, hoj kerel goďaverones.
Poznamki tele čijarkica
^ Abo te las oda važnones.
^ Abo čiste.
^ Doslovňe: a te hazden upre o vasta.
^ Abo te na keren, na halasinen, na hadinen.
^ Doslovňe: te na prehaňinen kaleha sar peske khuven o bala.
^ Abo zlatos.
^ Mišľinel pes andro zboros.
