Peršo Timotejoske 4:1-16
4 O lav, savo hino le Devlestar,* mištes vakerel, hoj avela časos, sar varesave preačhena te paťal andro Del. Bo šunena klamišagi, save dičhona, hoj hine le Devlestar a šunena o sikhľariben, savo hino le demonendar.
2 Dena pes te chudel avri ajse manušenca, save klaminen a hine dujemujengere, savenca lengero svedomje imar na kerel ňič. Bo hino sar te bi ajsi cipa, savi hiňi labarďi keradone trasteha a vaš oda imar na ciťinel ňič.
3 Ala manuša na domukhen, kaj o murš te lel romňa a kaj e romňi te džal romeste. A phenen avrenge, kaj te na chan o chabena, save o Del kerďa pre ada, kaj len te chan savore, save paťan a save lačhes prindžaren o čačipen a paľikeren vaš oda.
4 Sem savoro, so o Del kerďa, hino lačho. A te paľikeras vaš oda, so amen lestar hin, našťi pre ada phenas, hoj hin oda vareso nalačho.
5 Bo o chaben hino žužo* andre Devleskere jakha prekal o Devleskero lav the prekal e modľitba.
6 Sar pheneha le phralenge so a sar majinen te kerel, aveha lačho služobňikos le Kristoskero Ježišoskero. Služobňikos, savo barol the zoraľol olestar, andre soste paťal the čačikane sikhľaribnastar, savestar tut furt vernones ľikerehas.
7 Ma kam te šunel falošna pribehi, save vakeren o phure romňija. Sigeder ker buťi* pre ada, kaj te služines le Devleske calone jileha.
8 Te manuš cvičinel, hino oda lačho ča pre varesoste. Aľe te služinel le Devleske calone jileha, oda anel chasna andre savoreste. Na ela amen lačho dživipen ča akana, aľe the andro ďivesa, save hine angle amende.
9 Pre ala lava amen šaj zmukhas a šaj lenge paťas.
10 Vaš oda keras predal ada savoro, bo paťas andro džido Del. Ov kamel te zachraňinel savore le manušendar. Nekbuter olen, save leske paťan a služinen leske.
11 Ala lava sikhľar a phen, kaj pal lende the te keren.
12 Ňiko pre tute te na dikhel tele ča vaš oda, hoj sal terno. Aľe olenge, save paťan andro Del, av priklados andre oda sar vakeres, sar tut chovines, sar presikaves o kamiben, o paťaviben the andre oda, hoj sal žužo andro jilo the andre goďi.
13 Medik* na avava, dureder anglo manuša gen andal o Devleskero lav, podhazde len the sikhľar len.
14 Dureder ker lačhes odi buťi, savi chudľal sar daros le Devlestar, te tut kidne avri* o murša, save andro zboros služinen sar phuredera. Avka sar sas pal oda imar anglal phendo.
15 Rozmišľin pal ada savoro. Le tuke ada ko jilo, kaj sako te dikhel, hoj odi buťi, savi keres predal o Del, keres furt feder the feder.
16 De pozoris pre tute the pre oda, so sikhľares. Ker oda dureder. Bo te oda kereha, dživeha tu the ola, save tut šunen.
Poznamki tele čijarkica
^ Doslovňe: duchos.
^ Abo čisto.
^ Doslovňe: andre kada tut cvičin.
^ Abo pokim.
^ Doslovňe: sar pre tute thode o vasta.
