Peršo Timotejoske 5:1-25
5 Le phuredere muršeske ma dophen zorales, aľe vaker leha šukares sar le dadeha. Le ternedere muršenca vaker sar le phralenca.
2 Le phuredere džuvľijenca vaker sar le dajenca. Le ternedere džuvľijenca sar le pheňenca, aľe ker oda lačhe jileha.
3 Starin tut pal o vdovi, save čačes hine vdovi, bo len ňiko nane.
4 Aľe te hin varesava vdova čhave abo vnučati, mi sikaven, hoj služinen calone jileha le Devleske kaleha, hoj pes starinena pal peskeri fameľija. Te oda kerena, sikavena peskere dajenge dadenge, la babake le papuske, hoj lenge paľikeren vaš oda sar pes pal lende starinenas a ada kamel o Del.
5 Odi vdova, savi čačes ačhiľa korkori a nane ňiko ko bi lake pomožinďahas, pes zmukhel pro Del, jilestar pes ke leste mangel a ďives the rat pes modľinel.
6 Aľe odi, savake džal ča pal oda, kaj te kerel oda, pre soste la cirdel lakero ťelos, hiňi sar te bi muli, the te dživel.
7 Phen lenge, kaj pes kalestar te ľikeren, kaj aňi pre jekh vdova ňiko te na phenel, hoj kerel vareso nalačho.
8 Te vareko na bajinel peskera fameľijatar a nekbuter olendar, save leha dživen andro kher, sikavel kaleha, hoj na kamel ňič le Devleha a hino goreder sar manuš, savo na paťal andro Del.
9 Pisin andre ča kola vdova, savake hin buter sar 60 berš, sava sas ča jekh rom
10 a prindžaren la sar ajsa, hoj kerelas but lačhipen: sar bararďa avri le čhaven, sar presikavelas o jilo,* sar morelas* o pindre le svatonenge,* sar pomožinelas olenge, save cerpinenas a hoj sas buťakeri andre dojekh buťi, savi kerelas.
11 Ma zapisin andre terneder vdovi, save kamen te džal romeste. Bo te len cirdela, kaj te džan romeste a džana romeste, imar našťi kerena buter buťi predal o Kristus.
12 Kaleha pre peste anena sar te bi sudos, bo na doľikerena oda lav, savo sigeder dine le Devleske.
13 A mek ke ada, hine sikade pre ada, hoj ňič na keren, ča phiren pal o khera. A na ča, hoj ňič na keren, aľe mek keren pľetki, mišinen pes andre oda, andre soste len ňič nane a vakeren pal oda, pal soste bi na majinenas.
14 Vaš oda kamav, kaj o ternender vdovi te džan romeste, te uľon lenge čhave a kaj pes te starinen pal peskere khera. Avka phandena o muja olenge, so pre amende džan.
15 Bo varesave vdovi omukhle oda lačho drom a džan pal o Satan.
16 Te varesava pheňa andro zboros hin andre fajta vdovi, ta lenge mi pomožinel, kaj kaleha le zboros te na el but pro šero a kaj pes o zboros te starinel pal ola vdovi, saven ňiko nane.
17 Le phurederenge, save lačhes ľidžan o zboros kampel te presikavel mek buter paťiv. Nekbuter olenge, so den calo jilo andre oda, kaj te vakeren pal o Devleskero lav a kaj te sikhľaren avren.
18 Sem le Devleskero lav phenel: „Na phandeha ňisoha o piskos le bikoske, sar pophirel pal o žužoďiv,* kaj les te rozkerel“ a „O robotňikos peske zaslužinel, kaj leske te el poťimen“.
19 Te vareko vareso phenel proťi phureder andro zboros, ma šun oda. Šun ča akor, te tuke oda phenena duj abo trin džene.
20 Olenge, so keren binos, dophen angle savorende, kaj ola averdžene te daran te kerel binos.
21 Phenav tuke anglo Del, anglo Kristus Ježiš the anglo aňjela, saven peske o Del kidňa avri, kaj ada sa te doľikeres avka, hoj na kereha rozďjeli a na ľikereha ňikaske sera.
22 Ma siďar, sar varekastar kames te kerel zborovo phureder abo pomocno služobňikos.* Te na chal tut ňič avrengere binenca. Ačh žužo* andro jilo the andre goďi.
23 Imar ma pi paňi, aľe de tuke the čeporo* moľori* pre tiri džombra,* kaj tuke oda te pomožinel, kaj te na aves furt nasvalo.
24 Varesave manuša keren ajse bini, kaj pal lende sako džanel a takoj hine odsudzimen. Aľe vareko kerel ajse bini, save avena avri až paľis.
25 Avka isto oda hin the le lačhe skutkenca. Pal varesave džanen savore a pal ola, pal save pes na džanel, na ena pro furt garude.
Poznamki tele čijarkica
^ Kale grecike laveha pes mišľinel, hoj presikavel o kamiben the olenge, saven na prindžarel.
^ Abo thovelas avri, sthovelas.
^ Dikh tuke buter adaj andro Slovňikos.
^ Abo pšeňica.
^ Abo ma siďar pre varekaste te thovel o vasta.
^ Abo čisto.
^ Abo jegnaj, čuno, sikra.
^ Abo vinocis.
^ Abo kužum, žaludkos.
