Peršo Timotejoske 6:1-21
-
O otroka mi presikaven paťiv peskere rajenge (1, 2)
-
Te vareko džal proťi čačikano sikhľariben the pal oda, te varekaske hine andro jilo buter o love (3 – 10)
-
So majinel te kerel oda, ko služinel le Devleske (11 – 16)
-
Te kerel but lačhe skutki (17 – 19)
-
„Ma omukh oda, so chudľal le Devlestar“ (20, 21)
6 Ola, so hine otroka, mi dikhen pre peskere raja sar pre ola, save peske zaslužinen, kaj lenge te el presikaďi e paťiv, kaj pes pal le Devleskero menos the pal leskero sikhľariben te na vakerel našukares.
2 Ola, savengere raja paťan andro Raj, te na en ke lende ajse, hoj lenge na presikavena e paťiv ča vaš oda, hoj hine lengere phrala. Aľe majinen lenge mek buter le jilestar te služinen. Bo olen, so hin chasna lengera lačha buťatar, on hine lengere phrala, jekhetane lenca služinen a rado len dikhen.
Ala lava sikhľar a phen, kaj pal lende the te keren.
3 Te vareko vakerel vareso aver a džal proťi čačikano sikhľariben amare Rajeskero le Ježišoskero Kristoskero a tiš džal proťi sikhľariben, savo sikavel pre oda, sar mušinas te služinel le Devleske,
4 ajso manuš hino barikano a ňisoske na achaľol. Džal leske ča pal oda, kaj pes avrenca te dokerel pal o lava. Ada sa ľidžal ke ada, hoj o manuš chudel te zavidzinel, furt les hin varekaha vareso, ohovarinkerel, na paťal
5 a furt pes ča vesekedinel* anglo* diliňipen. Ada keren ča ajse manuša, savenge hin andre goďi ča o nalačho, save na achaľon imar le čačipnaske a mišľinen peske, hoj te služinen le Devleske, ta len olestar vareso ela.
6 A hin čačipen. Te služinel le Devleske calone jileha anel igen but, aľe ča akor, te o manuš hino spokojno oleha, so les hin.
7 Sem sar uľiľam, ta pro svetos amenge na anďam ňič. A sar meraha aňi amenca našťi ňič laha.
8 Vaš oda te amen hin so te chal a so te urel, avas oleha spokojna.
9 Aľe ola, save kamen te zbarvaľol, peren andro binos the andre pasca a oda, so kamen, lenge anel ča bari dukh the oda, hoj keren diliňipen. A ada ľidžal ke ada, hoj ena zňičimen.
10 Bo te varekaske hine andro jilo buter o love, ada ľidžal ko igen baro nalačhipen. A vaš oda, hoj varesave andre oda pele, preačhile te paťal andro Del a kaleha peske korkore ande o trapišagos.
11 Aľe tu, savo služines le Devleske, kalestar ča denaš. Kam te kerel oda, so hino lačho andre Devleskere jakha,* služin le Devleske calone jileha, mi el tut o paťaviben, o kamiben, kam te ľikerel avri a džan te ačhel pokojno.
12 Kam furt te zaačhel* vaš o paťaviben. Zorales tut ľiker la naďejatar pro dživipen pro furt, predal savo salas kidlo avri a pal savo lačhes vakerehas anglo but manuša.
13 Anglo Del, savo kerel, kaj sa te dživel a anglo Kristus Ježiš, savo mištes vakerelas pal o Devleskero kraľišagos anglo Pontsko Pilatos, tuke phenav,
14 kaj te doľikeres sa, so tuke sas phendo. Ker oda avka, kaj tuke ňiko te na čhivel pro jakha sar oda keres, medik* amaro Raj o Ježiš Kristus na sikavela peskeri zor.
15 Ada bachtalo the jekh Vladcas sikavela peskeri zor andro časos, savo diňa o Del. Ov hino Kraľis upral o kraľa a Raj upral o raja.
16 Ča ov jekh lendar ňigda na merela. Bešel pre ajso than,* kaj hin ajso baro rajipen, hoj ňiko le manušendar odoj našťi džal a ňisavo manuš les na dikhľa aňi les našťi dikhel. Ča ov peske zaslužinel, kaj te el barardo pro furt a kaj les te el e zor pro furt. Amen.
17 Kalenge, so hine barvale andre kada svetos,* phen, kaj te na en barikane a kaj pes te na zmukhen pro barvaľipen, savo adaďives hin, aľe tajsa na mušinel te el, aľe pro Del. Ov amen del šťirones* savoro, kaj ča amen te radisaľuvas.
18 Vaker lenge, kaj te keren o lačhipen. Mi keren but lačhe skutki, mi en šťira a jilestar mi davkeren avren.
19 Te ada kerena, oda ela sar te bi peske skidenas o barvaľipen le Devlestar a ada lenge pomožinela, kaj te chuden o dživipen pro furt.
20 Timotej, miro lačho phral, ma omukh oda, so chudľal le Devlestar. Ma šun o lava, save na mon ňič, savenca džan proťi o Del. Aňi o lava le manušendar, save peske mišľinen, hoj but džanen, aľe oda, so on džanen, na džal jekhetane oleha, so hin čačipen.
21 Varesave pes avka chudne te ašarel oleha, so džanen a chudne te paťal vareso aver.
Mi del tumen o Del peskero baro lačhipen.
Poznamki tele čijarkica
^ Abo dokerel, halasinel, hadinel.
^ Abo vašo, bijalo, aščalo, predalo.
^ Doslovňe: spravodlivo. Dikh tuke buter adaj andro Slovňikos.
^ Abo sar te bi lačhes tut mar.
^ Abo pokim.
^ Doslovňe: andre ajso švetlos.
^ Dikh tuke buter adaj andro Slovňikos.
^ Abo šťedrones.
