Dujto Korinťanenge 10:1-18
10 Me o Pavol, čačes kamav, kaj te doľikeren oda, so tumenge phenav. Te tumenge vareso phenav, kerav avka sar o Kristus, savo hino jileskero the pokorno. Choč* vareko tumendar phenel, hoj sar som tumenca, ta darav te phenel lav, aľe hoj sar som het, ta džanav zorales te dophenel.
2 Aven ajse lačhe, keren predal kada savoro, hoj sar avava, kaj te na mušinav te el pre tumende igen zoralo. A kaj zorales te na dophenav olenge, so peske mišľinen, hoj mišľinas avka sar o manuša andro svetos.
3 Dživas andre kada svetos, aľe na maras amen sar o manuša andre kada svetos.*
4 Bo o zbraňi, savenca amen maras, nane kajse sar le manušen andro svetos. Aľe hin len zor le Devlestar, kaj te araven* sa, so hino sar te bi zoralo muros.
5 Odčhivas dojekh mišľenka the savoro, so na domukhel le manušenge te sprindžarel le Devles. A prekeras amare mišľenki avka, kaj te šunen le Kristus.
6 Te sikavena, hoj šunen andre savoreste, avaha pripravimen te del trestos dojekhes, ko na kamela dureder te šunel.
7 Tumen sudzinen ča pal oda, so dikhen. Te peske hino vareko isto, hoj služinel le Kristoske, ta pes mi zamišľinel pre kada: te ov služinel le Kristoske, ta na služinel leske ča ov, aľe the amen.
8 O Raj amen diňa zor, kaj tumen te podhazdas a na te thovas tele. A choč bi man čeporo* kaleha poašarďomas, na mušinav man vaš kada te ladžal.
9 Na kamav, kaj te dičhol, hoj tumen kamav mire ľilenca te daravel.
10 Bo varesave vakeren: „Leskere ľila hine zorale až lendar avel dar, aľe sar avel a vakerel, ta koda, so vakerel, na mol ňič.“
11 Kaj te džanen tumen kajse manušale, hoj oda, so pisinas andro ľila, sar sam het, ta oda the keraha, sar ke tumende avaha.
12 Na kamas te en sar ajse, save pes korkore ašaren. Aňi na kamas te phenel, ko amendar hino feder. On pes korkore posudzinen pal oda, so hino lačho andre lengere jakha. A kalestar dičhol, hoj ňisoske na achaľon.
13 Amen pes na ašaras varesoha, so na keras. Ašaraha amen ča oleha, so chudľam le Devlestar a kaleha mišľinas the pre oda, hoj tumenge vakeras e lačhi sprava.
14 Sar avľam ke tumende, na kerďam vareso, so amenge o Del na phenďa. Samas perša, ko tumenge phenďa e lačhi sprava pal o Kristus.
15 Na ašaras amen la phara buťaha, savi kerďa vareko aver, hoj bi vakerďamas e lačhi sprava odoj, kaj na samas bičhade. Aľe paťas, hoj zoraľola tumaro paťaviben a sar zoraľola tumaro paťaviben, ta pes kerela the buter buťi odoj, kaj sam. Paľis šaj keraha mek buter buťi.
16 A vakeraha e lačhi sprava andro phuva, save hine dureder tumendar, kaj amen te na ašaras la buťaha, savi odoj kerďa vareko aver.
17 „Aľe ko pes ašarel, mi thovel baripen andro Jehovas.“*
18 Bo o Jehovas* na dikhela mištes pre koda, ko pes korkoro ašarel, aľe pre koda, saves ov ašarel.
Poznamki tele čijarkica
^ Abo hoc.
^ Doslovňe: andro ťelos.
^ Abo čhiven tele, zburinen.
^ Abo sikra, čuno, jegnaj.
^ Dikh o dodatkos A5.
^ Dikh o dodatkos A5.