Dujto Korinťanenge 11:1-33
11 The te dičhuvav čeporo* sar dilinoro, ta kamľomas, kaj oda manca te ľikeren avri. A tumen manca oda the ľikeren avri!
2 Igen man pal tumende starinav avka sar pes pal tumende starinel o Del.* Bo diňom lav, hoj avena sar te bi sphandle andro manželstvo le Kristoha, kaj tumen leske te anav sar te bi paťivaľa čha.
3 Aľe darav, kaj pes tumenge te na ačhel oda, so la Evake, sava o sap scirdľa avka, hoj la zdiliňarďa. Vaš oda darav, kaj tumen vareko te na zdiliňarel, kaj te ačhen verna the žuže* andre Devleskere jakha. Bo o Kristus peske zaslužinel, kaj leske avka te služinen.
4 Nane oda avka, hoj tumen prilen ajses, so avel a vakerel pal o aver Ježiš a na pal oda, pal savo vakeras amen? Či na prilen ajses, savo kamel, kaj tumari goďi* te ľidžal vareso aver a na e goďi, so chudľan le Devlestar? Či na prilen the ajses, savo vakerel pal aver lačhi sprava a na pal odi, savi priiľan?
5 Na mišľinav mange, hoj uľomas andre varesoste goreder sar tumare apoštola, pre save nane.
6 Na džanav až avka te vakerel, aľe te džal pal o Del, ta džanav but. Sar pes ča delas, tumenge ada sikaďam.
7 Abo kerďom binos, hoj tumenge radišagoha vakeravas lačhi sprava pal o Del a na kamavas vaš kada love, kaj tumen te hazdav upre, aľe man poňižinďom?
8 Aver zbori mange pomožinde andre oda, andre soste mange kampelas a oda sas sar te bi len občorarďomas, kaj ča tumenge te služinav.
9 A sar somas ke tumende a na sas man čačes imar ňič, ta ňikaske tumendar na somas pro šero. Bo o phrala, save avle andal e Macedonija, man dine sa, so mange kampelas. Kerďom predal ada savoro, kaj ňikaske tumendar te na avav pro šero a kamava ada te kerel the dureder.
10 Avka sar som le Kristoskero nasledovňikos a vakerav čačipen, ta avka man the kaleha ašarava andro fora andre Achaja.
11 Soske mange tumendar ňič na iľom? Vaš oda, hoj tumen narado dikhav? O Del džanel, hoj tumen rado dikhav.
12 Avka sar keravas doakana, kerava the dureder. Kaj pre ma te na phenen ňič ola, so pre ada ča užaren. Manuša, save pes ašaren, hoj the on hine apoštola a kamen te en ajse sar amen.
13 On hine falošna apoštola, klamara, save pestar ča keren, hoj hine le Kristoskere apoštola.
14 A nane pes soske te čudaľinel, sem the o Satan pestar kerel, hoj hino lačho aňjelos.*
15 Vaš oda amenge ňič na keras olestar, sar the leskere služobňika pestar ča keren, hoj keren oda, so hino lačho. Aľe the avka chudena oda, so peske zaslužinen.
16 Pale phenav: Ňiko peske pal mande te na mišľinel, hoj som dilino. Aľe the te tumenge ada mišľinďanas, ta len man ajses, savo som, kaj man the me kaleha čeporo te poašarav.
17 Sar man akana igen ašarav, ta na kerav oda avka sar bi oda kerelas o Raj. Aľe kerav sar ajso manuš, savo hino dilino.
18 Te pes butdžene ašaren oleha, soha pes ašaren o manuša andro svetos, ta the me man poašarava.
19 Sem pre tumende, save san ajse goďaver, aňi pre tumende nane. Ta na avka rado dikhen le dilinen!
20 Dojekhes, ko peske tumendar kerel otroken, ko tumen občorarel, ko tumenge na del oda, so tumenge patrinel, ko pestar kerel, hoj hino feder sar tumen abo tumen marel pal o muj, kajseske oda cerpinen.
21 Kaleha, so vakerav, amenge kerav ladž. Aľe kerav oda vaš oda, bo tumenge mišľinen, hoj daras.
Te aver pes na daran te ašarel, ta aňi me man na darava te ašarel, choč* pre ma dikhena sar pro dilino.
22 Hine Hebreji? The me som. Hine Izraelčana? The me som. Hine andal e Abrahamoskeri fajta? The me som.
23 Služinen le Kristoske? Odphenav sar dilino: Me o keci buter! Kerďom buter buťi. Buterval bešľom harešta.* Buterval man marde a buterval mange džalas pal o dživipen.
24 O Židi man pandžvar marde. A furt, sar man marenas, chudľom 39 rani.
25 Trival man marde le paľicenca. Jekhvar andre ma čhivkerenas le barenca. Trival zadžiďiľom sar demaďam la loďaha. Caľi rat the ďives ačhiľom pro moros andro paňi.
26 Furt varekhaj somas. Buterval mange džalas pal o dživipen akor, sar džalas baro paňi. Na ča jekhvar man kamle te prepadňinel. Džalas pre ma miro vlastno ľudos the o manuša andal aver narodi. Všadzik mange kamle vareso te kerel, či somas andro foros, či pre pušťa, či pro moros abo maškar o falošna phrala.
27 Na odcirdavas man la buťatar a keravas phari buťi. Kecivar raťi na sovavas. Buterval bokhaľuvavas a šuťarelas man. Na sas man furt so te chal, somas andro šil a na sas man so te urel.
28 A mek ke ada mange sako ďives kerav pharo šero pal savore zbori.
29 Te varekaske kampel te pomožinel,* či mange pre leste nane pharo? Či andre mande na taďol, te vareko angle* varekaste omukhel o paťaviben?
30 Te man imar mušinav te ašarel, ta man ašarava oleha, so mange až avka igen na džal.
31 O Del the o Dad amare Rajeskero le Ježišoskero, koda, savo majinel te el pro furt ašardo, džanel, hoj na klaminav.
32 Andro foros Damask o vladcas, savo služinelas le kraľiske Aretoske, thoďa le slugadžen, kaj te stražinen o brani andro foros, bo man kamľa te phandel andre.
33 Aľe mukhle man tele le košariha prekal e oblaka, prekal savi pes delas lokes te denašel andal o foros a avka leske denašľom.
Poznamki tele čijarkica
^ Abo sikra, čuno, jegnaj.
^ Doslovňe: žjarľinav pre tumende avka sar pre tumende žjarľinel o Del.
^ Abo čista.
^ Doslovňe: tumare duchos. Dikh tuke buter adaj andro Slovňikos.
^ Doslovňe: aňjelos, savo anel o švetlos.
^ Abo hoc.
^ Abo bertena.
^ Abo te varekas nane zor, či the me na som bije zor.
^ Abo vaš, bijal, aščal, predal.
