Dujto Korinťanenge 12:1-21
12 Mušinav man te ašarel. Vakerava pal oda, so mange sikaďa o Raj the pal oda, so mange phenďa, choč* man kalestar na ela ňič.
2 Prindžarav jekhe manušes, le Kristoskere učeňikos, savo sas 14 berš palal ilo andro trito ňebos, či imar sas andre peskero ťelos abo na, na džanav, oda džanel ča o Del.
3 A džanav, hoj kada manuš, či imar sas andre peskero ťelos abo na, na džanav, oda džanel ča o Del,
4 sas ilo andro rajos a šunďa lava, save pes na majinen te phenel avri a save o manuš našťi vakerel.
5 Kajse manušeha man ašarava. Na ašarava man korkoro, ča oleha, so man thovel tele.*
6 The te bi man varekana ašarďomas, na uľomas dilino, bo vakerďomas čačipen. Aľe na kerava oda, kaj tumenge te na mišľinen pal mande ča oda, so dikhen the so mandar šunen. Na kamav, kaj tumenge pal mande te mišľinen buter sar kampel,
7 ča vaš oda, bo mange o Raj sikaďa vareso kajso baro.
Kaj mange pal ma te na mišľinav buter sar kampel, hin man ajso pharipen, savo hino sar te bi ostro kandro* andre miro ťelos a kaleha sar te bi man le Satanoskero aňjelos marďahas pal o muj, kaj te na avav barikano.
8 Trival mangavas le Rajes, kaj mandar ada te odlel.
9 Aľe ov mange phenďa: „Presikaďom tuke but baro lačhipen, bo miri zor pes presikavel akor, sar tut vareso thovel tele.“ Vaš oda man igen rado ašarava oleha, hoj zadživav pharipen, kaj furt te ciťinav, hoj o Kristus man del zor.*
10 Vaš oda, hoj som le Kristoskero učeňikos, ta radišagoha prilav mire pharipena. Kada, hoj mange rakinen, hoj man nane so te chal, hoj pre mande džan a hoj zadživav trapišagos. Bo akor, sar man vareso thovel tele, akor som zoralo.
11 Tumen man anďan ke ada, kaj te vakerav sar dilino. Majinďan man tumen te ašarel, bo na som andre ňisoste goreder sar tumare apoštola, pre save nane, choč pre ma phenen: „Ov na mol ňič“.
12 Korkore dikhľan pre tumare jakha, hoj som apoštolos. Oda, sar man ňigda na vzdiňom, save znameňa, zazraki the bare skutki keravas.
13 Andre soste sanas aver sar aver zbori? Ča andre oda, hoj tumenge na somas pro šero. Te tumenge kaleha kerďom vareso nalačho, ta aven ajse lačhe a odmukhen mange oda.
14 Imar tritovar ke tumende kamav te avel a aňi akana tumenge na kamav te el pro šero. Na džal mange pal tumare love, aľe pal tumende. Sem na užarel pes, hoj o čhave sthovena o love predal o dad the predal e daj, aľe o dad la daha predal o čhave.
15 Me vaš tumenge baripnaha dava savoro, the man korkores. Či na som dos lačho pre ada, kaj man rado te dikhen avka sar rado dikhav me tumen?
16 Šaj phenen, so kamen, aľe pro šero tumenge ňigda na somas. A the avka phenen, hoj somas vibito a thoďom tumenca avri.
17 Bičhaďom ke tumende le phralen. Či prekal lende kerďom vareso, kaj tumendar te cirdav o love?
18 Pomangľom le Titus, kaj ke tumende te džal a bičhaďom leha mek jekhe phrales. Či tumendar o Titus cirdňa varesar o love? Či amen na rozmišľinahas avka istones a či na kerahas the oda isto?
19 Mišľinen tumenge, hoj amenge džal ča pal oda, kaj tumenge te vakeras ča pal oda, hoj amen hin čačipen? Sar ola, so keren oda isto so o Kristus, vakeras čačipen anglo Del. Phralale mire, savoro keras, kaj tumen te zoraľaras.
20 Darav, hoj sar avava, na avena pre oda avka sar bi kamľomas. A hoj aňi me na avava ajso sar bi tumen kamľanas, kaj te avav. Aľe sigeder ela maškar tumende ada, hoj tumen vesekedinena,* zavidzinena tumenge, chana pre tumende choľi, džana jekh pre aver, ohovarinkerena tumen, kerena pľetki, avena barikane a na ela maškar tumende smirom.
21 Darav, hoj miro Del pre ma domukhela, kaj man te ladžav, sar pale avava. A ela mange asi the phares pro jilo olestar, hoj butdžene doakana na bajinenas olestar, so varekana kerenas: o baro džungaľipen, lubipen* the o binos bije ladž.*
Poznamki tele čijarkica
^ Abo hoc.
^ Abo andre soste som slabo.
^ Abo trňos.
^ Doslovňe: kaj le Kristoskeri zor te ačhel upral mande sar stanos.
^ Abo kerena, halasinena, hadinena.
^ Po grecki porneia. Dikh tuke buter adaj andro Slovňikos.
^ Po grecki aselgeia. Dikh tuke buter adaj andro Slovňikos.
