Dujto Korinťanenge 13:1-14
13 Akana hin oda tritovar, so ke tumende kamav te avel. „Paš savoreste, so pes ačhela, kampel, kaj te džan duj abo trin džene, kaj paľis on te phenen či pes oda čačes ačhiľa.“
2 The te tumenca akana na som, ciťinav sar te bi imar ke tumende uľomas dujtovar. Vaš oda anglal phenav olenge, save kerenas binos the tumenge savorenge, hoj sar avava pale, ta olenge, so keren nalačho, phenava avka, hoj ča šunena. Vaš oda len tumenge mire lava ko jilo.
3 Sem kamen te dikhel, hoj prekal mande vakerel o Kristus. Ov pes maškar tumende na presikavel sar kajso, saves nane zor, aľe sar kajso saves zor hin.
4 Choč* sas primardo pro drukos sar slabo manuš, the avka dživel, bo oda o Del kerďa peskera bara zoraha. Hin čačipen, hoj the amen sam kajse slaba sar sas the ov. Aľe vaš oda, hoj zadživen, savi bari hiňi le Devleskeri zor, ta jekhetane dživaha odoj kaj ov.
5 Rozmišľinen pal oda, či dživen avka sar pes patrinel pro kresťana a korkore pre tumende dikhen, save san. Abo na džanen olestar, hoj san zajekh le Ježišoha Kristoha? Te oda avka hin, ta oda sikavel, hoj pre tumende o Del na dikhel mištes.
6 Paťav, hoj džanen kalestar, hoj pre amende o Del furt dikhel mištes.
7 Modľinas amen, kaj te na keren ňič ajso, so hino nalačho. Na džal amenge pal oda, kaj o manuša te dikhen, hoj amen sas čačipen, aľe kaj te keren oda, so hino lačho. The te oda dičhiľahas, hoj amen na sas čačipen.
8 Našťi keras ňič proťi čačipen, savo hino le Devlestar. Aľe ča šaj sikavas, kaj hin o čačipen.
9 Radisaľuvas furt, sar san zorale, the te amen sam slaba. Vaš oda amen modľinas, kaj te prekeren oda, so kampel.
10 Pisinav tumenge oda, medik* som tumendar dur. Kaj paľis sar avava, kaj tumenge te na mušinav igen te dophenel. Bo adi zor, hoj ada šaj kerav, chudľom le Rajestar. Na kamav tumen kaleha te thovel tele, aľe te podhazdel.
11 Phralale, len tumenge ko jilo ala lava: radisaľon, prekeren oda nalačho, so keren, prilen oda, hoj tumen kamen aver te podhazdel, aven sar te bi jekhe jileha the jekha goďaha, dživen andro smirom a o Del, savo presikavel o kamiben a del o smirom andro jilo, ela tumenca.
12 Paš oda sar tumen pozdravinen, tumen the čumiden.*
13 Pozdravinen tumen savore svata.
14 Jilestar kamav, kaj tumenge amaro Raj o Ježiš Kristus te presikavel baro lačhipen. Kaj te ciťinen sar tumen o Del rado dikhel. A kaj tumen te el o svato duchos, saves jekhetane chudľam.
