Dujto Korinťanenge 2:1-17
2 Phenďom mange, hoj sar ke tumende avava pale, na ela oda vaš oda, kaj tumenge te kerav phares pro jilo.
2 Sem te tumenge kerava phares pro jilo, ta ko kerela, kaj me te radisaľuvav? Ča ola, savenge kerďom phares pro jilo.
3 Pisinavas tumenge vaš oda, hoj sar avava, te na el mange phares pro jilo olendar, savendar bi majinavas te radisaľol. Bo som mange isto, hoj tumen savore radisaľon olestar, sostar radisaľuvav me.
4 Pisinavas tumenge, sar zadživavas baro trapišagos, bara dukhaha andro jilo the but apsenca. Aľe na vaš oda, kaj tumenge te kerav phares pro jilo, aľe kaj te džanen, hoj tumen igen rado dikhav.
5 Aľe te vareko varekaske kerďa phares pro jilo, na kerďa phares pro jilo mange, aľe del pes te phenel, hoj kerďa phares pro jilo tumenge savorenge.
6 Ajse manušeske kampel ča te dophenel, avka sar oda buter džene tumendar kerďan.
7 Aľe akana leske jilestar odmukhen a phenen, hoj savoro ela mištes, kaj leske te na el igen phares pro jilo až avka, hoj les oda thovela tele.
8 Vaš oda tumenge phenav, kaj pre tumende te dikhel, hoj les rado dikhen.
9 Sem the vaš oda tumenge pisinavas, kaj te džanav či tumen šunen andre savoreste.
10 Te tumen varekaske vareso odmukhena, odmukhava leske the me. Aľe te džal pal mande, te varekaske vareso odmukhľom, kerav oda, kaj tumenge te pomožinav. O Kristus olestar džanel.
11 Na das amen te zdiliňarel* le Satanoha. Sem mištes džanas, so kamel te kerel.
12 Sar avľom andre Troada te vakerel e lačhi sprava pal o Kristus, ta dikhľom, hoj hin adaj but buťi predal o Raj, savi šaj kerav.*
13 Aľe igen daranďiľom, bo na arakhľom mire phrales le Titus. Avka man le phralenca rozlučinďom a geľom andre Macedonija.
14 Paľikeras le Devleske, savo amen ľidžal sar le slugadžen, save avle pale le Kristoha, save radisaľon, hoj vihrajinde. Prekal amende kerel, kaj pal leste všadzik te vakeras. A oda hin sar te bi vareso ajso, so šukares pachinel.
15 Bo te vakeras pal o Kristus, sam predal o Del sar te bi vareso, so šukares pachinel, so ciťinen ola, so ena zachraňimen the ola, so ena zňičimen.
16 Predal varesave sam sar te bi pacha, savi anel o meriben. Predal o aver sam sar te bi pacha, savi anel o dživipen. A ko kadi buťi šaj kerel?
17 Ča amen. Bo na sam manuša, save pal o khera bikenkeren le Devleskero lav sar oda butdžene keren. Aľe vakeras le jilestar sar le Kristoskere učeňika, saven bičhaďa o Del. A oda, so keras, dikhel the o Del.
Poznamki tele čijarkica
^ Mišľinel pes, kaj pes te na den te zdiliňarel kaleha, hoj bi jilestar na kamlehas te odmukhel.
^ Doslovňe: phundriľa mange vudar, kaj te kerav buter buťi.