Dujto Korinťanenge 3:1-18
3 Majinas tumenge pal amende pale vareso te phenel? Kampel amenge avka sar avrenge ľila, andre save ela pal amende pisimen mištes? Kampel, kaj tumen te pisinen ajse ľila? Na.
2 Tumen san sar te bi ajso ľil, savo hino amenge pisimen andre amaro jilo, savo prindžaren a genen savore manuša.
3 Dičhol, hoj san sar te bi ľil le Kristoskero, savo pisinďam amen le Devleskere služobňika. Ada ľil nane pisimen la tintaha,* aľe la zoraha, savi hin le džidone Devles. A nane pisimen pre varesave bara, aľe andre tumare jile.
4 Amen paťas, hoj prekal o Kristus šaj avas lačhe služobňika anglo Del.
5 Na kamas te phenel, hoj adi buťi džanas te kerel amara zoratar. Aľe vaš kada savoro paľikeras le Devleske.
6 Ov amendar kerďa ajsen, save šaj doľikeren e nevi zmluva. Na koda, so hino pisimen andro Zakonos, aľe oda, so del o Del prekal peskero svato duchos. Sem o Zakonos anel o meriben, aľe le Devleskero svato duchos del o dživipen.
7 O Zakonos, savo anel o meriben a savo sas pisimen pro bar, sas dino ajse ašaribnaha, hoj o Izraelčana našťi dikhle pre le Mojžišoskero muj. Bo lestar džalas ajso šukariben the švetlos, savo paľis našľiľa.
8 Te o Zakonos sas dino ajse rajipnaha, ta akor na anel oda, so del le Devleskero svato duchos mek buter rajipen the ašariben?
9 Te sas ašardo o Zakonos, savo anel o meriben, o so buter majinel te el ašarďi e buťi, savi kerel le manušendar, hoj hine lačhe andre Devleskere jakha.*
10 Oda sar sas ašardo o Zakonos, nane ňič proťi koda sar hiňi ašarďi e nevi zmluva.
11 Sem te sas o Zakonos dino le rajipnaha a paľis majinďa te preačhel, o so buter mušinel te el ašarďi e nevi zmluva.
12 Vaš oda, hoj hin amen ajsi naďej, ta šaj pal ada vakeras bije dar.*
13 Na keras oda, so o Mojžiš, savo peske garuvelas o muj le khosneha, kaj o Izraelčana te na dikhen oda, so pes ačhela oleha, so majinel te el odčhido.
14 Aľe on kaleske našťi achaľile. Oda dži doadaďives sar pes genel e puraňi zmluva, hino lenge o muj furt sar te bi zaučhardo le khosneha. Bo ada khosno* pes šaj lel tele ča akor, te o manuš paťal andro Kristus.
15 Avka dži doadaďives, sar pes genel oda, so pisinďa o Mojžiš, ta lengero jilo hino sar te bi zaučhardo le khosneha.
16 Aľe te pes o manuš visarel ko Jehovas,* o khosno hino odčhido.
17 O Jehovas* hino duchos. A ola, kas hin le Jehovaskero* svato duchos, hine slobodna.
18 Amen savore, saven nane pro muja o khosno, sikavas, savo hino baro le Jehovaskero* rajipen. A vaš oda, hoj amenge pomožinel o Jehovas,* leskero svato duchos, ta šaj avas sar ov a mek buter sikavas, savo hino baro.
Poznamki tele čijarkica
^ Abo le atramentoha, le inkoustoha.
^ Doslovňe: spravodliva. Dikh tuke buter adaj andro Slovňikos.
^ Dikh tuke buter adaj andro Slovňikos.
^ Abo dikhloro.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.