Dujto Korinťanenge 4:1-18
4 Adi buťi chudľam, bo o Del sas ke amende kovlejileskero. Vaš oda amen na vzdas.
2 Odčhiďam savoro nalačho, so varekana kerahas, vaš soske pes kampel te ladžal. Ňikas na klaminas aňi na previsaras le Devleskero lav. Aľe amen sikavas o čačipen a avka sam anglal o Del lačho priklados predal savore manuša.
3 Te hiňi e lačhi sprava, savi vakeras sar te bi zaučharďi, ta hiňi zaučharďi olendar, save ena zňičimen.
4 Olendar, save na paťan, savenge o del kale svetoske* zakorarďa o jakha, kaj te na dikhen te švicinel o švetlos, sar pes bare rajipnaha vakerel e lačhi sprava pal o Kristus, savo sikavel, savo hino o Del.
5 Sar vakeras e lačhi sprava, na vakeras pal peste, aľe pal oda, hoj o Ježiš Kristus hino Raj. A amen sam otroka, save tumenge služinen, bo o Ježiš oda kamel.
6 Bo o Del phenďa: „Andal o kaľipen mi švicinel o švetlos.“ Amare jile chudne te labol, bo prekal o Kristus sprindžarďam le Devles.
7 Adi buťi amenge sas diňi, the te sam sar čikakere kanči,* andre save hin vareso igen draho. Avka šaj dičhol, hoj adi zor, savi amen hin pre adi buťi, hiňi le Devlestar a na amendar.
8 Dojekha seratar pre amende peren o problemi. Aľe furt olestar džanas varesar te avel avri. Sam hotova. Aľe na až avka, hoj bi na džanahas, so te kerel.
9 Džan pre amende. Aľe ňigda andre kada na sam korkore. Imar olestar savorestar na birinas,* aľe ľikerďam oda avri.*
10 Všadzik kaj sam, amenge džal pal o dživipen avka sar le Ježišoske. A kaleha sikavas le manušenge, hoj cerpinas avka sar cerpinelas the o Ježiš.
11 Dživas, aľe furt amenge džal pal o dživipen, bo keras oda, so o Ježiš. Kaleha kamas le manušenge te sikavel, hoj cerpinas avka sar cerpinelas o Ježiš.
12 The te amenge mušinel te džal pal o dživipen, aľe tumenge oda anel o dživipen.
13 Vaš oda, hoj hin amen oda isto paťaviben a ľidžal amen oda isto svato duchos, avka sar hin pisimen: „Paťavas a vaš oda the vakeravas.“ The amen paťas a vaš oda the vakeras.
14 Džanas, hoj koda, savo uštaďa andal o meriben le Ježiš, uštavela andal o meriben the amen. A anela amen the tumen anglo Ježiš.
15 Ada savoro hin pre tumari chasna, kaj pes mek buter te presikavel le Devleskero baro lačhipen. Bo furt buter manuša paľikeren le Devleske a kaleha les ašaren.
16 Vaš oda amen na vzdas. The te amaro ťelos phurol, aľe andral sam ďives so ďives zoraleder.
17 A choč* o trapišagos ľikerel ča čeporo* a nane až ajso baro, anel amenge oda ajsi bari odmena, savi našťi čhivkeras ke ňisoste a savi hiňi pro furt.
18 Vaš oda na sam la goďaha paš oda, so amare jakha šaj dikhen, aľe paš oda, so našťi dikhen. Bo oda, so dikhen, nane pro furt. Aľe oda, so na dikhen, ačhel pro furt.
Poznamki tele čijarkica
^ Dikh tuke buter adaj andro Slovňikos.
^ Abo khore, džbani.
^ Doslovňe: thoven amen tele.
^ Abo na muľam.
^ Abo hoc.
^ Abo jegnajoro, čunoro.