Dujto Korinťanenge 5:1-21
5 Sem džanas, hoj ada sar te bi amaro kher pre phuv, ada stanos, ela arado tele.* A amen chudaha le Devlestar andro ňebos sar te bi ajso kher, andre savo dživaha pro furt, savo nane kerdo le manušikane vastenca.
2 Andre ada kher amenge hin igen phares a igen kamas te džal* andro kher, savo predal amende hino pripravimen andro ňebos.
3 Te andre džaha, ela amen kaj te bešel.*
4 Amenge, save sam sar te bi andre ada stanos, amenge hin igen phares pro jilo. Oda na sikavel, hoj andal leste kamas te džal het.* Ča kamas te džal* andre oda aver, kaj te na avas andre oda ťelos, savo merel, aľe kaj te chudas nevo ťelos, savo dživel pro furt.
5 Koda, ko amen pre ada pripravinďa, hino o Del. Ov amen diňa peskero svato duchos, kaj amenge te avas ista, hoj chudaha odi odmena, savi phenďa, hoj amen dela.
6 Igen kaleske paťas a džanas, hoj medik* dživas andre ada ťelos, sam dur le Rajestar.
7 Sem ľidžal amen o paťaviben a na oda, so dikhas.
8 Igen kaleske paťas. Uľamas igen rade, te bi imar na džiďiľamas andre ada ťelos, aľe uľamas paš o Raj.
9 Vaš oda keras predal ada savoro, kaj amendar te radisaľol, či imar sam leha abo dur lestar.
10 Bo savore mušinas te terďol anglo Kristus, kaj amen te sudzinel.* Hin oda vaš oda, kaj dojekh te chudel pal oda, so kerelas, sar mek dživelas pre phuv sar manuš, či kerelas lačho abo nalačho.
11 Amen džanas, so oda hin te daral le Rajestar. Vaš oda vakeras le manušenge, kaj te paťan oleske, so sikhľaras. O Del amen prindžarel a paťav, hoj the tumen* amen prindžaren.
12 Na kamas amen korkore te ašarel. Aľe keras savoro predal ada, kaj tumen amenca te ašaren. Paľis tumen ela so te phenel le manušenge, save pes ašaren oleha, so dikhen le jakhenca, aľe na oleha, so hin andro jilo.
13 Te samas sar ajse, so hine diline, kerahas oda anglo* Del. A te sam sar goďaver, hin oda angle tumende.
14 Ľidžal amen le Kristoskero kamiben, bo achaľiľam, hoj jekh manuš muľa vaš savore, bo sar te bi savore mulehas.
15 Muľa vaš savore, kaj ola, so dživen, imar te na dživen predal peste, aľe predal koda, savo vaš lenge muľa a sas uštado andal o meriben.
16 Vaš oda akanastar imar pre ňikaste na dikhas manušikane jakhenca. Te dikhahas pro Kristus manušikane jakhenca, ta akana pre leste imar avka na dikhas.
17 Te vareko kerel oda, so o Kristus, ajso manuš hino kerdo le Devlestar.* Oda, so sas purano, našľiľa a chudňa pes te kerel o nevo.
18 Ada savoro hin le Devlestar, savo kerďa, kaj leha prekal o Kristus te avas pale lačhe. A diňa amen ajsi buťi, kaj avrenge te pomožinas, kaj leha te en pale lačhe.
19 Oda sikavel, hoj o Del kerel, kaj leha o manuša te en pale lačhe prekal o Kristus. Na čhivkerel lenge pro jakha oda nalačho, so keren. A amenge phenďa, kaj te vakeras le manušenge sar leha šaj en pale lačhe.
20 Sam bičhade le Devlestar. Sam ola, so keren oda, so o Kristus. Avka sar te bi o Del prekal amende phenelas le manušenge. Sar ola, so keren oda, so o Kristus, mangas: „Aven lačhe le Devleha.“
21 Oles, savo na džanelas, so oda hin binos, les diňa sar obeť vaš amare bini. Bo kamelas, kaj prekal leste te avas lačhe* andre Devleskere jakha.
Poznamki tele čijarkica
^ Abo čhido tele, zburimen.
^ Doslovňe: te urel amenge.
^ Doslovňe: te amenge les uraha, na avaha nange.
^ Doslovňe: kamas les te čhivel tele.
^ Doslovňe: te urel.
^ Abo pokim.
^ Abo pro than, kaj bešel o Kristus sar sudcas.
^ Doslovňe: tumaro svedomje.
^ Abo vaš, bijal, aščal, predal.
^ Doslovňe: hino nevo stvoreňe.
^ Doslovňe: spravodliva. Dikh tuke buter adaj andro Slovňikos.
