Dujto Korinťanenge 7:1-16
7 Phralale mire, vaš oda, hoj amen o Del diňa ada lav, odčhivas amendar savoro, so meľarel amaro ťelos the e goďi.* Vaš oda, hoj daras le Devlestar, ta keras savoro predal ada, kaj te avas mek buter svata.
2 Phundraven* amenge tumaro jilo. Ňikaske na kerďam ňič nalačho, ňikas na anďam pro nalačho, ňikaha na thoďam avri, kaj amen vareso olestar te el.
3 Na phenav oda vaš oda, kaj tumen te sudzinav. Bo kavka sar imar phenďom, san andre amare jile a aňi o meriben, aňi o dživipen kaleha na kerela ňič.
4 Phenav tumenge avka sar oda hin* a thovav andre tumende baro baripen. Som igen podhazdlo. A choč* zadživas igen but pharipena, igen radisaľuvav.
5 Sar avľam andre Macedonija, na sas amenge feder. Savore serendar pre amende avelas ča but trapišagos. O manuša pre amende igen džanas a amen amenge kerahas pharo šero pal o zbori.
6 Aľe o Del, savo podhazdel olen, save predživen o pharipen, amen podhazdľa kaleha, hoj ke amende avľa o Titus.
7 A na ča kaleha, hoj avľa, aľe the kaleha sar les podhazdľan. Phenďa amenge pal oda sar man kamen igen te dikhel, sar tumenge hin phares pro jilo, sar igen kamen te džanel sar mange hin a kavka man sas mek buter radišagos.
8 Te tumenge oleha, so pisinďom andro ľil, kerďom phares pro jilo, na bajinav oda. Peršo oda bajinavas (sar dikhľom, hoj tumenge ala lava kerde phares pro jilo, choč oda na ľikerelas but),
9 aľe akana radisaľuvav. Na radisaľuvav olestar, hoj sas tumenge phares pro jilo, aľe olestar, hoj tumen ada anďa ke kada, kaj te bajinen oda nalačho, so kerenas. Bajinenas avka sar pes pačinel le Devleske a kada tumenge pomožinďa. Vaš oda o lava, save tumenge pisinďam andro ľil, na sas ňič, so bi elas vareso nalačho.
10 Kada anel ča lačho, te o manuš bajinel avka sar kamel o Del. Bo oda ľidžal ke oda, hoj o manuš preačhel te kerel oda nalačho, so kerel a ada ľidžal ke oda, hoj šaj el zachraňimen. Aľe te vareko bajinel avka sar o manuša andro svetos, ada ľidžal ko meriben.
11 Dikhen, so tumenca kerďa oda, hoj bajinenas avka sar pes oda pačinel le Devleske! Kaleha tumenge kerďan pale lačho menos, sanas choľamen pre oda nalačho, so kerďan, daranas le Devlestar, jilestar služinenas le Devleske, igen kamľan te preačhel oleha, so hino nalačho. Avka sikaďan, hoj kerďan savoro, so kampľa.
12 Choč tumenge pisinďom, na kerďom oda anglo* manuš, savo kerďa binos, aňi angle oda, savo jevavalom* cerpinelas. Pisinďom tumenge, kaj pes anglal o Del te sikavel či amen jilestar šunena.
13 Ada amen podhazdľa.
A mek bareder radišagos amenge kerďa oda, sar dikhľam sar o Titus radisaľol, bo les savore podhazdľan.
14 Bo leske pal tumende vakeravas a thovavas andre tumende baripen. A akana džanav, hoj mange na kerďom ladž. Avka sar tumenge andre savoreste vakerahas čačipen, ta the kaleha, soha amen ašarahas le Titoske, pes sikaďa, hoj hin čačipen.
15 Mek buter tumen rado dikhel, sar peske leperel pre oda sar savore priiľan oda, so kampľa te šunel. A tiš sar dikhľa, savi bari paťiv leske presikaďan.
16 Som barikano, hoj tumenge andre savoreste šaj paťav.
Poznamki tele čijarkica
^ Doslovňe: duchos. Dikh tuke buter adaj andro Slovňikos.
^ Abo phuteren.
^ Dikh tuke buter adaj andro Slovňikos o lav te vakerel bije dar.
^ Abo hoc.
^ Abo vaš, bijal, aščal, predal.
^ Abo hijaba.