Dujto Korinťanenge 8:1-24
8 Phralale, kamas, kaj te džanen pal o baro lačhipen, savo o Del presikaďa le zborenge andre Macedonija.
2 Akor, sar pes lenge dživelas phares, bo zadživenas baro trapišagos, the avka nanašade o radišagos. Choč* sas igen čore, sikade, hoj hine barvale, bo igen presikade o jilo.
3 Šaj phenav, hoj dine ajci, keci pes lenge delas, mek až buter.
4 Korkore amen igen mangenas, kaj the on vareso te den a kavka te pomožinen le svatonenge.
5 Kerde buter sar amenge mišľinahas. Aľe so sas lendar igen šukar, hoj thode andre ada calo jilo, kaj te keren vareso predal o Raj, avka sar oda o Del kamel. A kerde vareso the predal amende.
6 Pomangľam le Titus, kaj te kidel avri o love, save mek kampľa te dokidel, save diňan le jilestar.
7 Andre savoreste keren igen mištes. Tumaro paťaviben hino zoralo. Džanen mištes te vakerel pal o Del. Igen but džanen. Andre savoreste, so keren, thoven calo jilo. Čačes rado dikhen avren avka sar amen rado dikhas tumen. Vaš oda presikaven avrenge o jilo the kaleha, hoj davkerena.
8 Na kamav tumen ke kada te ispidel. Aľe phenav tumenge oda vaš oda, kaj te džanen sar jilestar davkeren averdžene a kaj te dikhav sar rado dikhen avren.
9 Sem džanen, savo baro lačhipen presikaďa amaro Raj Ježiš Kristus. Choč les sas savoro, ačhiľa čoro angle* tumende, kaj angle leskero čoripen tumen te el savoro.
10 Phenav tumenge, so me mange mišľinav: Imar berš palal chudňan tumen te kidel avri o love, bo oda tumen kamľan. A ela pre tumaro lačhipen, te oda the dokerena.
11 Oda, so chudňan te kerel, akana the dokeren. Keren oda jilestar avka sar pes tumenge oda del.
12 Te manuš davkerel le jilestar, ta le Devleske oda kerel radišagos andro jilo. Dojekh mi davkerel olestar, so les hin a na olestar, so les nane.
13 Na kamav, kaj pes kada te kerel lokes avrenge a tumenge phares.
14 Aľe kamav, kaj tumaro barvaľipen te pomožinel olenge, save hine čore a kaj lengero barvaľipen tumenge te pomožinel andre koda, so tumen nane. Avka ňikas na ela buter abo čepeder,* aľe dojekhes ela kavka istones.
15 Avka sar hin pisimen: „Kas sas but, na sas les až igen but a kas sas čepo, na sas les až igen čepo.“
16 Paľikeras le Devleske vaš o Titus, saves bičhaďa, kaj tumenge te presikavel sar tumen rado dikhel.
17 Ov oda na kerďa ča angle oda, hoj les pomangľam. Aľe the vaš oda, bo igen kamel te pomožinel. Vaš oda džal ke tumende korkoro pestar.
18 Bičhavas leha the le phrales, saves andre savore zbori ašaren vaš oda, so kerel predal e lačhi sprava.
19 Aľe na ča kada. O zbori les pomangle, kaj amenca te džal a jekhetane te ľidžas koda daros. Aleha ašaras le Rajes a sikavas, hoj jilestar kamas te pomožinel.
20 Bo na kamas, kaj vareko te phenel, hoj so pes kerel ole lovenca, so bičhade o phrala.
21 „Andre ňisoste na kamas te klaminel a oda aňi anglo Jehovas,* aňi anglo manuša.“
22 Lenca ke tumende bičhavas mek amare phrales, pre savo na ča jekhvar dikhľam sar kamel igen te pomožinel. A akana kamel mek buter te pomožinel, bo tumenge igen paťal.
23 Te bi vareko phučelas pal o Titus, ov služinel jekhetane manca a keras oda pre tumaro lačhipen. Te vareko phučela pal o phrala, ta len bičhade o zbori.* Kala murša oleha, so keren, ašaren le Kristus.
24 Sikaven lenge, hoj len rado dikhen a sikaven le zborenge, hoj na jevavalom* andre tumende thovahas o baripen.
Poznamki tele čijarkica
^ Abo hoc.
^ Abo vaš, bijal, aščal, predal.
^ Abo frimeder, čuneder.
^ Dikh o dodatkos A5.
^ Doslovňe: apoštola, saven bičhade o zbori.
^ Abo hijaba.
