Dujto Korinťanenge 9:1-15
9 Sem aňi tumenge na mušinav te pisinel pal oda sar pomožinen le svatonenge.*
2 Bo džanav sar jilestar davkeren a aleha man ašarav le phralenge andre Macedonija. Vakerav lenge, hoj tumen andre Achaja kamen imar berš te pomožinel. A oda, hoj kamen igen te pomožinel, podhazdľa but lendar.
3 Aľe bičhavav le phralen, kaj oda, hoj amen ašaras oleha sar jilestar pomožinen, te na en ča lava. Aľe kaj te aven pripravimen te pomožinel avka sar pal tumende vakeravas.
4 Bo te bi manca avlehas o phrala andal e Macedonija a dikhlehas, hoj oda daros nane pripravimen, ta amen, aľe buter tumen, bi amen mušinďamas te ladžal vaš koda, hoj tumenge paťahas.
5 Vaš oda mange phenďom, hoj ela mištes te podhazdel le phralen, kaj ke tumende te aven sigeder. A kaj te len oda tumaro baro daros, pal savo phenďan, hoj dena. Sar avaha a oda daros ela imar pripravimen, ta dičhola, hoj oda na den, bo mušinen, aľe hoj oda den le jilestar.
6 Aľe ma bisteren pre ada: Ko hino hamišno a del čepo,* ajso the chudela čepo. Aľe ko hino jileskero a del but, ajses ela mek buter.
7 Sako mi davkerel avka sar peske phenďa andro jilo. Na vaš oda, bo mušinel, abo hoj les vareko ke kada ispidel. Bo o Del rado dikhel ajses, ko davkerel le radišagoha.
8 O Del džanel te del tumen igen but peskero baro lačhipen, kaj tumenge ňigda ňič te na chibinel a kaj tumen te el but the pre kada, kaj mek kaleha te keren lačhipen avrenge.
9 (Avka sar hin pisimen: „Ov del but avren, del le čoren a ada, hoj hino spravodlivo,* ľikerela pro furt.“
10 Koda, savo del but semjački oles, so džal te sadzinel a savoren čaľarel but mareha, dela the tumen sar te bi ajso semjačkos, kaj te sadzinen a oda igen but. Ov kerela, kaj oda lačhipen, so keren, te anel sar te bi but uroda.)
11 O Del tumen andre savoreste žehňinel, kaj te davkeren andre savoreste jilestar. A sar tumaro daros daha le phralenge, ta oda, hoj tumen davkeren le jilestar, podhazdela avren, kaj on te paľikeren le Devleske.
12 Avka na pomožinen ča le svatonenge andre oda, andre soste lenge kampel, aľe kada len the podhazdela, kaj te paľikeren le Devleske.
13 Ašarena le Devles, bo kaleha sar pomožinen, pes sikavela, hoj the keren pal oda sar vakeren e lačhi sprava pal o Kristus. A tiš ada sikavel, hoj jilestar davkeren len the savore avre manušen.
14 Rado tumen dikhena a paľikerena le Devleske, hoj džanen te presikavel ajso baro lačhipen, savo andre tumende diňa o Del.
15 Aňi pes na del te phenel sar igen paľikeras le Devleske vaš leskero baro daros!
Poznamki tele čijarkica
^ Dikh tuke buter adaj andro Slovňikos.
^ Abo frima, čuno.
^ Dikh tuke buter adaj andro Slovňikos.
