Dujto Tesaloničanenge 1:1-12
1 Me o Pavol, jekhetane le Silvanoha* the le Timotejoha bičhavas ada ľil le phralenge andro zboros Tesaloniki, savo patrinel le Devleske le Dadeske the le Rajeske le Ježišoske Kristoske:
2 Mi del tumen o Del, amaro Dad the o Raj Ježiš Kristus baro lačhipen a mi el tumen o smirom.
3 Phralale, mušinas vaš tumenge furt te paľikerel le Devleske. A hin vaš soske. Bo tumaro paťaviben hino furt zoraleder a furt buter rado dikhen jekhe avres.
4 Vaš oda andre tumende thovas baripen maškar o savore Devleskere zbori. A na ča vaš kada. Bo choč* pre tumende džan a zadživen pharipena, tumen ľikeren avri a sikaven, hoj zorales paťan.
5 Ada sikavel, hoj o Del sudzinel spravodlivones. A ada ľidžala ke oda, hoj avena hodna, kaj te džan andre Devleskero kraľišagos, angle* savo zadživen trapišagos.
6 A ela oda le Devlestar spravodlivo, hoj anela o trestos pre ola, save tumenge keren trapišagos.
7 Aľe tumen, save zadživen o trapišagos, imar na cerpinena a avka na cerpinena aňi tumen, aňi amen. Ela oda akor, sar pes pro ňebos sikavela o Raj Ježiš peskere zorale aňjelenca andre bari jag.
8 Dela pale olenge, save na prindžaren le Devles the olenge, save na prilen e lačhi sprava pal amaro Raj Ježiš.
9 Ena zňičimen pro furt. O Raj pre lende imar na dikhela aňi lenge na pomožinela peskera bara zoraha,
10 sar avela, kaj te el barardo peskere svatonenca* a ašardo maškar ola, save andre leste paťan. A tumen san maškar lende, bo paťanďiľan oleske, so tumenge vakerahas.
11 Vaš oda amen na preačhas vaš tumenge te modľinel. Bo kamas, kaj pre tumende amaro Del te dikhel avka, hoj šaj chuden o dživipen, pre savo tumen kidňa avri. A tiš kaj peskera zoraha te dokerel oda savoro lačhipen, so peske phenďa, hoj kerela a the savoro, so keren vaš oda, bo paťan.
12 Avka ela o menos amare Rajeskero le Ježišoskero barardo prekal tumende a tumen prekal leste, bo amaro Del the o Raj Ježiš Kristus presikaven peskero baro lačhipen.
Poznamki tele čijarkica
^ Vičinenas les tiš Silas.
^ Abo hoc.
^ Abo vaš, bijal, aščal, predal.
^ Dikh tuke buter adaj andro Slovňikos.
