Dujto Tesaloničanenge 2:1-17
2 Mangas tumen phralale, te džal pal oda sar pes amaro Raj o Ježiš Kristus visarela pale a sar džal pal oda časos, sar leha avaha jekhetane,
2 ma aven ajse, hoj sig paťana a dena tumen te zdiliňarel kaleha, te vareko vakerela, hoj le Jehovaskero* ďives hino imar adaj. A oda aňi akor, te bi tumenge vareko furt vakerelas, hoj oda hine lava le Devlestar* abo hoj oda varekastar šunďa abo hoj oda gende andro ľil, savo tumenge pisinďam.
3 Ma den tumen ňikaha aňi ňisoha te scirdel. Bo sigeder sar avela oda ďives, peršo mušinena varesave te džal proťi o Del* a presikavela pes, ko hino oda igen nalačho manuš, savo ela zňičimen.
4 Ov džal igen zorales proťi savoreste. Bo kerel pestar, hoj hino bareder savorestar, pre soste pes phenel, hoj oda hino del a soske pes presikavel nekbareder paťiv. Bešela peske andro Devleskero chramos a anglo savore pestar kerela, hoj ov hino del.
5 Na džanen, hoj tumenge pal ada vakeravas, sar somas ke tumende?
6 Vaš oda imar džanen, so les na domukhel, kaj te kerel oda, so kamel mek sigeder, sar avela leskero časos.
7 Šaj phenas, hoj kada igen nalačho manuš imar počoral kerel peskeri buťi. Aľe kerela oda počoral dži akor, medik* na ela odčhido koda, ko na kamel, kaj ada te kerel.
8 Paľis pes koda igen nalačho manuš presikavela. A o Raj Ježiš les odčhivela peskere zorale lavenca, save aven avri andal leskero muj* a zňičinela les akor, te sako dikhela, hoj pes visarďa pale.
9 Aľe oda, hoj adaj hin koda igen nalačho manuš, oda hin le Satanoskeri buťi. Bo ov les dela zor, kaj te kerel igen bare skutki, o znameňa, savenca klaminel avren the o zazraki.
10 O Satan les dela adi zor, kaj te klaminel le manušen, save merena a kaj lenca te thoven avri. Bo na priile a na rado dikhen o čačipen, savo bi lenge anďahas oda, hoj šaj en zachraňimen.
11 Vaš oda len o Del mukhel andre kada, kaj te en avka zdiliňarde, kaj te paťan andro klamišagi,
12 kaj te en odsudzimen savore, save na paťanďile andro čačipen, aľe radisaľonas le nalačhipnastar.
13 Aľe tumen phralale, saven o Jehovas* igen rado dikhel, amen vaš tumenge mušinas furt te paľikerel. Bo o Del peske tumen imar začjatkostar kidňa avri, kaj te en zachraňimen. Akor, sar tumen žužarďa* peskere svatone duchoha vaš oda, bo igen paťan andro čačipen.
14 Kidňa tumen avri,* kaj te en zachraňimen prekal e lačhi sprava, savi vakeras, kaj te en bararde avka sar amaro Raj Ježiš Kristus.
15 Vaš oda phralale, zorales tumen ľikeren le paťavibnastar the olestar, so sikhľiľan. Či oda imar varekastar šunďan abo oda genďan andro ľil, savo tumenge bičhaďam.
16 Amaro Raj o Ježiš Kristus the o Del amaro Dad amen igen rado dikhel. Vaš oda, hoj amenge presikaďa peskero baro lačhipen, amen diňa naďej a tiš kerela, kaj amenge furt te el mištes pro jilo.
17 Igen mangav, kaj tumen te podhazdel a te zoraľarel, kaj furt te keren a te vakeren oda, so hino lačho.
Poznamki tele čijarkica
^ Dikh o dodatkos A5.
^ Abo duchostar. Dikh tuke buter adaj andro Slovňikos.
^ Po grecki apostasia, so hin odpadlikos. Dikh tuke buter adaj andro Slovňikos.
^ Abo pokim.
^ Doslovňe: duchoha andal leskero muj.
^ Dikh o dodatkos A5.
^ Abo očisťinďa, pošvecinďa.
^ Doslovňe: vičinďa.
