Dujto Tesaloničanenge 3:1-18
3 Vaš oda phralale, modľinen tumen vaš amenge, kaj pes le Jehovaskero* lav so neksigeder dureder te vakerel. A kaj les te prilen paťivaha avka sar pes oda kerel ke tumende.
2 Tiš tumen modľinen, kaj amen o Del te chraňinel le nalačhe the kajse manušendar, save amenge kamen vareso te kerel. Bo na savore manuša paťan.
3 Aľe o Raj doľikerela peskero lav a ov tumen zoraľarela a chraňinela le Satanostar.*
4 Sam amenge ista, hoj keren a kerena oda, so tumenge phenas, bo keras oda isto so the o Raj.
5 O Raj mi kerel, kaj tumaro jilo te kamel le Devles a kaj te ľikeren avri andre buťi, savi keren predal o Kristus.
6 Phralale, phenas tumenge andro menos le Rajeskero Ježišoskero Kristoskero, kaj te na aven ajse phraleha, savo na kamel te šunel a na kerel pal oda, so tumen sikhľarahas.
7 Sem korkore džanen, hoj majinen te dživel avka sar tumenge sikaďam. Bo sar samas tumenca, ta amen na samas ola, so na kamenas te šunel.
8 Ňikastar na mangahas hijaba* te chal a phares kerahas buťi ďives the rat, kaj ňikaske tumendar te na avas pro šero.
9 Choč* sas amenge domukhlo, kaj ada te keras. Aľe na kamľam ada te kerel, bo kamľam tumenge te sikavel sar the tumen majinen te kerel.
10 Mek sar samas ke tumende, vakerahas tumenge: „Te vareko na kamel te kerel buťi aňi te na chal.“
11 Aľe šunas, hoj varesave tumendar peske na kamen te del te phenel. Ňič na keren, aľe ča pes mišinen andre koda, andre soste lenge ňič nane.
12 Ajsenge phenas a kamas lendar andro menos le Rajeskero Ježišoskero Kristoskero, kaj šukares te keren buťi a kaj te chan o chaben, pre savo peske korkore zaroden.
13 Aľe tumen phralale, ma preačhen te kerel o lačhipen.
14 Te vareko na kamela te šunel oda, so tumenge pisinďam andre ada ľil, den tumenge pre leste pozoris* a ma aven leha jekhetane, kaj pes te ladžal.
15 Ma dikhen pre leste sar pro ňeprjaťeľis, aľe šukares leske dophenen sar phraleske.
16 O Raj, savo del o smirom, mi kerel, kaj andre savoreste te zadživen o smirom. Mi el o Raj tumenca savorenca.
17 Ala lava tumenge pisinav me o Pavol, kaj čačes te paťan, hoj oda pisinďom me.
18 O Raj Ježiš Kristus tumenge savorenge mi presikavel peskero baro lačhipen.
Poznamki tele čijarkica
^ Dikh tuke o dodatkos A5.
^ Doslovňe: ole nalačhestar.
^ Abo jeva.
^ Abo hoc.
^ Doslovňe: označinen tumenge les.
