Dujto Timotejoske 1:1-18
1 Me o Pavol, savo ačhiľom apoštolos le Kristoskero Ježišoskero, bo oda o Del kamľa, saveske dine lav, hoj dživava, bo kerav oda so the o Ježiš Kristus.
2 Pisinav tuke, Timotej, mire čhaske, saves igen rado dikhav:
Mi presikavel tuke o Del, o Dad the o Kristus Ježiš, amaro Raj, peskero baro lačhipen, kovlo jilo a mi el tut o smirom andro jilo.
3 Paľikerav le Devleske, saveske žuže* jileha služinav avka sar mire dada, save dživenas čirla. Sar man ďives the rat jilestar modľinav, na bisterav te leperel andre mire modľitbi aňi tut.
4 Sar mange leperav pre tire apsa, igen tut kamav te dikhel, kaj man te el andro jilo but radišagos.
5 Leperav mange pre tiro paťaviben, savo imar sas tira baba la Lojda the tira da la Evnika a savo paťav, hoj hin the tut. A džanav, hoj andre kada na san dujemujengere.
6 Vaš oda tuke leperav, kaj andre buťi, pre savi tut kidľom avri a savi chudľal le Devlestar te thoves calo tiro jilo.*
7 Sem oda svato duchos, savo amen del o Del, amendar na kerel ajsen, so daran. Aľe del amen zor, kamiben the goďi.
8 Vaš oda tut ma ladža te vakerel čačipen pal amaro Raj. A ma ladža tut aňi vaš ma, bo som phandlo angle leste. Aľe sar kampela te zadživel o trapišagos angle lačhi sprava, ta ma dara ada te zadživel a zmukh tut pre zor le Devlestar.
9 Ov amen zachraňinďa a kidľa amen avri, kaj te avas svata. Na angle oda, so amen keras, aľe vaš oda, bo oda ov kamľa a angle peskero baro lačhipen. Ada amenge imar čirla presikaďa prekal o Kristus Ježiš.
10 Akana pes mek buter presikaďa oda baro lačhipen, sar sikaďa peskeri zor amaro Zachrancas o Ježiš Kristus. Ov odčhiďa o meriben a prekal e lačhi sprava amenge sikaďa sar te chudel o dživipen the ajso ťelos, savo ňigda na kirňola.
11 A me somas kidlo avri, kaj te vakerav, kaj te avav apoštolos a kaj te sikhľarav pal adi lačhi sprava.
12 Vaš oda zadživav trapišagos. Aľe na ladžav man vaš oda. Bo prindžarav oles, andre savo paťanďiľom a som mange isto, hoj ov džanel te chraňinel dži koda ďives oda, so leske diňom andro vasta.
13 Ľiker tut lačhe lavendar, save mandar šunďal a ker pal lende.* Presikav o paťaviben the o kamiben, savo amen hin vaš oda, hoj sam zajekh le Kristoha Ježišoha.
14 Ada sar te bi barvaľipen, savo tuke sas dino, chraňin. A oda avka, hoj tut zmukheha pre le Devleskero svato duchos, savo hino andre amende.
15 Isto džanes, hoj savore andre Azija* man omukhle. Kerde ada the o Figelos the o Hermogenes.
16 O Raj mi presikavel kovlo jilo le Oneziforuske the olenge, so leha hine andro kher. Bo ov man furt podhazdelas a na ladžalas pes vaš kada, hoj som phandlo andre harešta.*
17 Sar sas andro Rimos, kerelas predal ada savoro, kaj man te rodel a the arakhľa man.
18 Mi del o Raj, kaj leske oda ďives o Jehovas* te presikavel kovlo jilo. Mištes džanes, so savoro predal mande kerďa andro Efez.
Poznamki tele čijarkica
^ Abo čistone.
^ Doslovňe: sar pre tute thoďom o vasta.
^ Abo mi en predal tute sar vzoros.
^ Mišľinel pes varesavo kotor andal e Rimsko riša.
^ Abo bertena.
^ Dikh o dodatkos A5.