Dujto Timotejoske 2:1-26
2 Mro čho, chude zor le bare lačhipnastar, savo presikavel o Kristus Ježiš.
2 Oda, so šunďal mandar a so phende butdžene, hoj oda hin čačipen, sikhľar le manušen, save hine verna le Devleske, save tiš džanena lačhes te sikhľarel avren.
3 Sar lačho slugadžiš le Kristoskero Ježišoskero ma dara te zadživel o trapišagos.
4 Ňisave slugadžiske na džal pal oda, kaj te zarodel but love. Bo kamel, kaj pre leste lačhes te dikhel oda, savo les iľa pre buťi sar slugadžis.
5 A ňiko ko džal te prastal* pro preťeki,* aľe na doľikerel o pravidli, na chudela e cena.
6 Koda, ko kerel phari buťi pre maľa, majinel te chudel vareso la urodatar sar peršo.
7 Rozmišľin pal mire lava. O Raj tuke pomožinela te achaľol savoreske.
8 Ma bister, hoj o Ježiš Kristus sas andal e Davidoskeri fajta a sas uštado andal o meriben. Ada hiňi e lačhi sprava, savi vakerav.
9 Angle* adi lačhi sprava zadživav trapišagos a som phandlo andre le lancenca sar varesavo igen nalačho manuš. Aľe ňiko našťi zastavinel le Devleskero lav.
10 Angle ola, saven peske o Del kidňa avri ada sa ľikerav avri, kaj the on te en zachraňimen prekal o Kristus Ježiš a kaj te en bararde pro furt.
11 Oleske, so akana phenava, šaj paťan: Te muľam avka istones sar ov, paťas, hoj dživaha odoj, kaj ov.
12 Te ľikeraha avri, vladňinaha leha sar kraľa. Te phenaha, hoj les na prindžaras, the ov phenela, hoj amen na prindžarel.
13 Te amen na doľikeras o lav, ov furt peskero lav doľikerel, bo našťi džal korkoro proťi peste.
14 Leper lenge oda a sikhľar len anglo Del, kaj pes te na vesekedinen* pal o lava. Bo ada na anel ňisavi chasna, ča thovel oda tele o paťaviben olenge, so oda šunen.
15 Ker predal ada savoro, kaj tut te sikaves anglo Del sar ajso, savo šaj kerel leskeri buťi. Sar ajso robotňikos, saves pes nane vaš soske te ladžal a savo lačhes sikhľarel a višvetľinel le Devleskero lav.
16 Ma šun o lava, save na mon ňič a savenca džan proťi o Del. Bo ala lava ľidžana ke oda, hoj mek buter džana proťi o Del.
17 Ala lava pes širinena sar rana pro ťelos, savi kirňol. Avrenge len vakerena ajse manuša sar o Himeneos the Filetos.
18 Ala murša omukhle o čačipen. Vakeren, hoj o manuša imar sas uštade andal o meriben a thoven tele o paťaviben varesave manušenge.
19 Aľe o Del thoďa zoralo zaklados, savo na perela, pre savo hin pečať a hin odoj pisimen: „O Jehovas* prindžarel olen, save hine leskere“ a „Sako, ko pes mangel ko Jehovas* a ašarel leskero menos, mi preačhel te kerel o nalačhipen“.
20 Andro baro kher nane ča somnakune* abo strjeborna čare, aľe the ajse, so hine le kaštestar abo la čikatar. Varesave lendar las avri ča akor, sar hin varesavo baro ďives a ola aver sako ďives.
21 Te pes vareko odcirdel ole aver čarendar, ela lestar sar te bi ajso čaro, savo las avri ča akor, sar hin varesavo baro ďives. Ela svato, anela chasna peskere rajeske a ela pripravimen pre dojekh lačhi buťi.
22 Denaš olestar, pre soste cirden le terne manušen lengere ťeli. Kam te kerel oda, so hino lačho andre Devleskere jakha.* Mi el tut paťaviben, kamiben the o smirom olenca, save pes mangen ko Raj a ašaren les žuže* jileha.
23 Ma thov tut avrenca andro dilino vakeriben, savestar nane ňič. Sem džanes, hoj ada ľidžal ča ko vesekedišagos.
24 Koda, ko služinel le Rajeske, pes na majinel te vesekedinel, aľe majinel te el ke savorende jileskero. Majinel te džanel te sikhľarel a te zľikerel pes, the te leske phenen vareso nalačho.
25 Olenge, so džan proťi leskere lava, majinel te dophenel avka, hoj džanela te ačhel pokojno. Šaj el, hoj lenge o Del domukhela, kaj te bajinen a te preačhen te kerel oda nalačho, so keren a avka mištes sprindžarena o čačipen.
26 Šaj el, hoj lenge doavela, hoj o Beng len chudľa pre oda, kaj te keren oda, so ov kamel. Chudena goďi a avka sar te bi denašena andal leskere vasta.*
Poznamki tele čijarkica
^ Abo te denašel.
^ Doslovňe: pro hri.
^ Abo vaš, bijal, aščal, predal.
^ Abo na keren, na halasinen, na hadinen.
^ Dikh o dodatkos A5.
^ Dikh o dodatkos A5.
^ Abo zlata.
^ Doslovňe: spravodlivo. Dikh tuke buter adaj andro Slovňikos.
^ Abo čistone.
^ Doslovňe: andal leskeri pasca.
